ក្នុងបទសម្ភាសន៍មួយក្នុងប្រព័ន្ធផ្សព្វផ្សាយរបស់រុស្ស៊ីកាលពីថ្ងៃព្រហស្បតិ៍ បុរសពីរនាក់ ដែលត្រូវបានចោទប្រកាន់ដោយក្រុងឡុងដ៍ពីបទបំពុលអតីតចារកម្មរបស់ក្រុងមូស្គូលោក Sergei Skripal បានបដិសេធការជាប់ពាក់ព័ន្ធក្នុងការប៉ុនប៉ងធ្វើឃាត។
ថ្លែងជាមួយប្រមុខនៃបណ្ដាញព័ត៌មាន RT ដែលគាំទ្រដោយវិមានក្រឹមឡាំង អ្នកទាំងពីរបានបញ្ជាក់ថា ពួកគេគឺជាបុរសនៅក្នុងរូបភាពដែលអាជ្ញាធរអង់គ្លេសបានបញ្ចេញនៅខែនេះប៉ុន្តែបានទទូចថា ពួកគេកំពុងធ្វើដំណើរកម្សាន្តទីក្រុង Salisbury របស់ប្រទេសអង់គ្លេសក្នុងនាមជាអ្នកទេសចរ។
សេវាសន្តិសុខអង់គ្លេសបានដាក់ឈ្មោះបុរសទាំងពីរថា Alexander Petrov និង Ruslan Boshirov ប៉ុន្តែបាននិយាយថា ឈ្មោះទាំងនេះអាចជាឈ្មោះក្លែងក្លាយ។
នៅក្នុងបទសម្ភាសន៍រយៈពេល២៥នាទី បុរសទាំងពីរបាននិយាយថា ទាំងនេះគឺជាឈ្មោះពិតរបស់ពួកគេប៉ុន្តែបានទទូចថា ពួកគេមិនបានធ្វើការឲ្យទីភ្នាក់ងារចារកម្មយោធា GRU របស់រុស្ស៊ីដូចដែលអង់គ្លេសបានអះអាងនោះទេ។
RT បានផ្សាយថា បុរសទាំងនេះមើលទៅមានអារម្មណ៍តានតឹងហើយបែកញើសនៅពេលពួកគេនិយាយ។ ពួកគេទាំងពីរនាក់មានអាយុប្រហែល៤០ឆ្នាំហើយពួកគេពាក់អាវពណ៌ខៀវដែលដូចគ្នាស្ទើរតែទាំងស្រុង។
ស្ថានីយទូរទស្សន៍នេះបានថតបទសម្ភាសន៍កាលពីល្ងាចថ្ងៃពុធក្នុងរយៈពេលត្រឹមតែប៉ុន្មានម៉ោងប៉ុណ្ណោះបន្ទាប់ពីលោកប្រធានាធិបតី វ្ល៉ាឌីមៀរ ពូទីន និយាយថា ប្រទេសរុស្ស៊ីបានកំណត់អត្តសញ្ញាណបុរសដែលស្វែងរកដោយចក្រភពអង់គ្លេសបានហើយនិងបានជំរុញឲ្យអ្នកទាំងពីរនិយាយទៅកាន់ប្រព័ន្ធផ្សព្វផ្សាយ។
លោក ពូទីន បាននិយាយថា “ពួកគេគឺជាជនស៊ីវិល”។ លោកបានបន្ថែមថា មិនមានបទឧក្រិដ្ឋអ្វីពាក់ព័ន្ធនឹងពួកគេទេ។
ការប៉ុនប៉ងធ្វើឃាតលោក Skripal បានបង្កឲ្យមានការប្រៀបធៀបទៅនឹងការបំពុលលើអ្នករិះគន់វិមានក្រឹមឡាំងលោក Alexander Litvinenko ជាមួយនឹងសារធាតុប៉ូឡូញ៉ូមវិទ្យុសកម្មខ្ពស់នៅទីក្រុងឡុងដ៍ក្នុងឆ្នាំ២០០៦។
វិមាន Downing Street របស់ចក្រភពអង់គ្លេសកាលពីថ្ងៃព្រហស្បតិ៍បានហៅបទសម្ភាសន៍របស់ RT ថាជា “ការប្រមាថដល់ចារកម្មសាធារណៈ”។
អ្នកនាំពាក្យនាយករដ្ឋមន្ត្រី Theresa May បាននិយាយថា “សំខាន់ជាងនេះទៅទៀត ពួកគេកំពុងប្រមាថមើលងាយយ៉ាងខ្លាំងដល់ជនរងគ្រោះនិងអ្នកដែលរងគ្រោះក្នុងការវាយប្រហារដ៏សាហាវនេះ”៕ AFP
Source: Kampuchea Thmey Daily
0 Comments