អ្នកប្រដាល់ជើងខ្លាំងរបស់កម្ពុជាផាន់ គ្រាន់ អ្នកប្រដាល់ក្លិបពុទ្ធសេរីវង្សកីឡានិងជាម្ចាស់ខ្សែក្រវាត់Barrley Black ទម្ងន់៦៣,៥០០គីឡូក្រាម ត្រូវគេផ្គូអោយជួបប្រកួតជាមួយថៃ Yuok Phit នៅយប់ថ្ងៃសៅរ៍ទី២២ ខែកញ្ញា ឆ្នាំ២០១៨នេះ នៅសង្វៀនGanzberg Top Fighter នៅអាស៊ីអាគ្នេយ៍។
Yuok Phit នេះ កាលពីឆ្នាំ២០១៧ គេបានមកប្រកួតនៅសង្វៀនអាស៊ីអាគ្នេយ៍ចំនួន៣លើក ដោយជួបប្រកួតជាមួយធន់ ចាន់តាក់ សូត្រ ប៊ុនធី និងចុងក្រោយជួបប៉ោ ភារិទ្ធ(យ៉េនឌីណា) ហើយវាយឈ្នះប៉ោភារិទ្ធ ក្នុងពេលដែលភារិទ្ធកំពុងស្រុតធ្លាក់នោះ ។ ទោះជាយ៉ាងណា សម្រាប់ជំនួបជាមួយផាន់ គ្រាន់លើកនេះ មិនដឹងថា Yuok Phit អាចបានឈ្នះទៀតឬអត់នោះទេ ? ។
យ៉ាងណា ផាន់ គ្រាន់ មិនអាចមើលស្រាល ឬ ធ្វេសប្រហែសនោះទេ ព្រោះ Yuok Phit អ្នកប្រដាល់ថៃរូបនេះ គឺមានស្នៀតប្រដាល់និងបច្ចេកទេសមិនជាអន់នោះឡើយ ។អ្នកប្រដាល់ថៃរូបនេះ មានកំនត់ត្រាប្រកួតចំនួន ៧៦លើក ឈ្នះ៦៥លើក ចាញ់១១លើក និងស្មើ០១លើក ។ រីឯ ប្រវត្តិប្រកួតរបស់ផាន់ គ្រាន់ វិញ គឺ ប្រកួត១១៩លើក ឈ្នះ៩៨លើក ចាញ់១៨លើកនិងស្មើ០៣លើក ។
ផាន់ គ្រាន់ មិនដឹងថា អាចយកឈ្នះ Yuok Phit បានឬអត់នោះទេ ?ព្រោះថា អ្នកប្រដាល់ថៃរូបនេះ គេមានផ្លែល្អ និងរឹងមាំណាស់ ។ ដូច្នេះ ចាំមើលរវាងផាន់ គ្រាន់ និង Yuok Phit ជួបគ្នាលើកដំបូងនេះ តើនរណាឈ្នះ ? ។
ចំណែក នន់ ជំនិត អ្នកប្រដាល់ក្លិបស្វាយរលំឫទ្ធីជ័យ ដែលជាជើងខ្លាំងជើងចាស់របស់កម្ពុជានោះ នឹងជួបប្រកួតជាមួយអ្នកប្រដាល់ជនជាតិបារាំងឈ្មោះJulien ដោយប្រកួតគ្នាក្នុងប្រភេទទម្ងន់៧១ គីឡូក្រាម ។
នេះជាលើកទី១០ របស់នន់ជំនិត ដែលបានជួបប្រកួតជាមួយអ្នកប្រដាល់បរទេស ។ក្នុង៩ប្រកួតជាមួយថៃនិងអឺរ៉ុបកន្លងមកនេះ នន់ ជំនិត វាយឈ្នះ៥លើក និងចាញ់៤លើក ។ ការប្រកួតលើកចុងក្រោយរបស់ជំនិត គឺវាយឈ្នះអ្នកប្រដាល់បារាំង Naser ដោយពិន្ទុ ។ ចាំមើល លើកនេះ នន់ ជំនិត អាចយកឈ្នះអ្នកប្រដាល់ជនជាតិបារាំងឈ្មោះJulienនេះ បានឬអត់ ? ។
នន់ ជំនិត ជាជើងខ្លាំងជើងចាស់ គេមានបទពិសោធន៍ច្រើនក្នុងការប្រកួត ដោយគេវាយជាមួយបរទេស គឺគ្មានញញើតខ្លាចអ្វីបន្តិចទេ ។ គេមានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត ។ ក្នុងកំនត់ត្រាប្រកួតចំនួន៧៥លើកជំនិតវាយឈ្នះ៥៨លើក ចាញ់១៥លើក និងស្មើ០២លើកប៉ុណ្ណោះ ។
ទោះជាបែបនេះក្តី មិនទាន់ហ៊ានសន្និដ្ឋានថា នន់ ជំនិត ជួបសំណាងល្អនៅក្នុងការប្រកួតជាមួយJulien នេះឡើយ ? ព្រោះអ្នកប្រដាល់បារាំងរូបនេះ ថ្វីត្បិតតែមានកំនត់ត្រាប្រកួតត្រឹម៣៩លើក ឈ្នះ៣២លើកនិងចាញ់០៧លើកក្តី តែគេមានស្នៀតប្រដាល់ល្អ មានបច្ចេកទេសវាយល្អ ដែលមិនអាចមើលស្រាលបាន ។ Julienកាលពីថ្ងៃទី០១កញ្ញា នៅលើសង្វៀនSEATVនេះ គេបានវាយឈ្នះជើងចាស់ហេង សំរាំង ដោយពិន្ទុ ដូច្នេះគេមិនធម្មតានោះឡើយ៕
Source: Kampuchea Thmey Daily
0 Comments