សហព័ន្ធកីឡាបាល់ទាត់កម្ពុជា (ស.ប.ក) បានប្រកាសដាក់លក់សំបុត្រជូនអ្នកគាំទ្រចូលទស្សនាពេលក្រុមជម្រើសជាតិកម្ពុជា ធ្វើជាម្ចាស់ផ្ទះក្នុងពានរង្វាន់ធំប្រចាំតំបន់អាស៊ាន AFF Suzuki Cup 2018 ខណៈសំបុត្រនេះមានតម្លៃថ្លៃជាងពេលប្រកួតមិត្តភាពអន្តរជាតិរាល់លើកកន្លងទៅ។
សូមបញ្ជាក់ថាសំបុត្រដែលនឹងដាក់លក់មុនគេនេះគឺសម្រាប់ជំនួបរវាងក្រុមជម្រើសជាតិកម្ពុជា ជាមួយក្រុមភ្ញៀវម៉ាឡេស៊ី ពោលគឺចាប់ផ្តើមលក់នៅថ្ងៃទី២៩ ខែ១០ឆ្នាំ២០១៨ តទៅចាប់ពីម៉ោង ៩:០០ព្រឹក ដល់ម៉ោង ៦:០០ល្ងាចនៅពហុកីឡដ្ឋានជាតិ ដោយសំបុត្រមានតម្លៃ១២,០០០៛សម្រាប់ប្រភេទទី១និងតម្លៃ៦,០០០៛ សម្រាប់ប្រភេទទី២។ ចំពោះព័ត៌មានបន្ថែមសូមទាក់ទងក្នុងម៉ោងធ្វើការទៅលេខ០៧១ ៤៨ ៦៩ ៤៧៥ ឬ ០១៥ ៤៤ ៧៦ ៨០។
បើនិយាយពីពានរង្វាន់ AFF Suzuki Cup 2018 ឆ្នាំនេះពូល A មានវៀតណាម ម៉ាឡេស៊ី មីយ៉ាន់ម៉ា កម្ពុជា និងឡាវ ខណៈពូល B មានថៃ ឥណ្ឌូណេស៊ី ហ្វីលីពីន សិង្ហបុរី និងក្រុមឈ្នះនៅវគ្គជម្រុះទីម័រខាងកើត។ តាមគម្រោងការវគ្គជម្រុះតាមពូលនេះ នឹងធ្វើឡើចាប់ពីថ្ងៃទី៨ ខែវិច្ឆិកា ដល់ថ្ងៃទី១៥ខែធ្នូ ឆ្នាំ២០១៨។ ព្រឹត្តិការណ៍ទាំងមូលនេះនៅកម្ពុជា គឺទទួលសិទ្ធិផ្សាយផ្ទាល់ដោយប៉ុស្តិ៍ BTV News ផងដែរ។
សម្រាប់កម្មវិធីប្រកួតជម្រុះពូល A របស់ក្រុមកម្ពុជា វិញនឹងប្រកួតបើកឆាកប៉ះក្រុមម៉ាឡេស៊ី នៅថ្ងៃទី៦ ខែវិច្ឆិកា វេលាម៉ោង៦:៣០នាទីល្ងាចលើទីលានពហុកីឡដ្ឋានជាតិក្នុងរាជធានីភ្នំពេញ ខណៈក្រុមនេះត្រូវប៉ះម្ចាស់ផ្ទះមីយ៉ាន់ម៉ា នៅថ្ងៃទី១២ ខែវិច្ឆិកា នៅទីក្រុងរ៉ង់ហ្គូន រហូតដល់ថ្ងៃទី២០ ខែវិច្ឆិកា ក្រុមកម្ពុជា ត្រូវប៉ះឡាវ នៅរាជធានីភ្នំពេញ ហើយនៅថ្ងៃទី២៤ ខែវិច្ឆិកា ត្រូវធ្វើដំណើរទៅប៉ះម្ចាស់ផ្ទះវៀតណាម នៅទីក្រុងហាណូយ។
ក្រុមជម្រើសជាតិកម្ពុជា បានប្រមូលផ្តុំឡើងវិញកាលពីថ្ងៃទី២០ខែតុលា ឆ្នាំ២០១៨ ថ្មីៗនេះ ក្រោយបញ្ចប់បេសកកម្មប្រកួតមិត្តភាពអន្តរជាតិកន្លងទៅ។ កីឡាករចំនួន២៥នាក់ដែលស.ប.ក កោះហៅចុងក្រោយនេះមានដូចជាកីឡាករ សេត រ៉ស៊ីប,ចាន់ វឌ្ឍនាកា,ហុង ផេង របស់ក្រុមបឹងកេត ហើយក្លិបក្រសួងការពារជាតិមានកីឡាករ៤នាក់គឺ ឈិន ឈឿន,រ៉ឹម ប៊ុនហៀង, ស ពិសិដ្ឋ និង អ៊ុំ វិចិត្រ។ ក្រុមណាហ្គាវើល បានជ្រើសរើសកីឡាករ ស៊ុះ ស៊ូហាណា,គួច សុកុម្ភៈ,ឆេង ម៉េង និងគួច ដានី។ ចំណែកភ្នំពេញក្រោន មានកីឡាករ អ៊ន ចាន់ប៉ូលីន, អ៊ិន សូដាវីដ,ប្រាក់ ធីវ៉ា និងស៊ិន កក្កដា។ សារ៉េត គ្រីយ៉ា,នេន សុធារ័ត្ន,សឿយ វិសាល និងប្រាក់ មុន្នីឧត្តម មកពីព្រះខ័នរាជស្វាយរៀង។ ធារី ចន្ថាប៊ីន របស់ក្លិប Terengganu FA មកពីលីគម៉ាឡេស៊ី។ កីឡាករ ជា វណ្ណសាក់, កែវ សុខផេង, កែវ សុខសិលា, ទិត្យ ឌីណា របស់ណាហ្គាវើល និងកីឡាករវ័យក្មេង សៀង ចន្ធា របស់ក្រុមមជ្ឍមណ្ឌលនិងសាលាបាល់ទាត់ជាតិបាទី៕
Source: Kampuchea Thmey Daily
0 Comments