កណ្តាល ៖ ក្លិបកំសាន្តរាត្រីស្ថិតនៅភូមិអំពិលដាំទឹក ឃុំវិហ៊ារលួង ស្រុកពញាឮដែលសាងសង់ហើយជាស្ថាពរ តែមិនទាន់បើកដំណើរការនោះ ត្រូវភ្លើងឆាបឆេះទាំងស្រុងបណ្តាលឲ្យស្លាប់មនុស្សម្នាក់ និង របួស២នាក់ ដែលដើមហេតុផ្តើមចេញពីជាងតបណ្តាញភ្លើងម៉ាស៊ីនត្រជាក់ធ្វើឲ្យឆ្លងចរន្តទុសេតែម្តង។
អគ្គីភ័យនេះកើតឡើងនៅ ថ្ងៃសៅរ៍ ទី១៣ខែតុលា ឆ្នាំ២០១៨ វេលាម៉ោង១៤នឹង០៦នាទី។
សមត្ថកិច្ចនៅកន្លែងកើតហេតុបានឲ្យដឹងថា ជនរងគ្រោះដែលស្លាប់ក្នុងហេតុការណ៍អគ្គិភ័យនេះត្រូវបានគេស្គាល់ឈ្មោះអាត សុវណ្ណ ភេទប្រុស អាយុ២៤ឆ្នាំ មុខរបរជាងម៉ាស៊ីនត្រជាក់មានទីលំនៅភូមិតាសេកក្រោម ឃុំព្រែកអំបិល ស្រុកស្អាង។
ចំណែកអ្នករបួស២នាក់ទៀត ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យរាជធានី ភ្នំពេញ ដោយឡែកសំណង់ក្លិបទាំងមូលខូចខាតទាំងស្រុង ដែលមានទំហំ ទទឹងប្រវែង៣០ម៉ែត្របណ្តោយប្រវែង៥០ម៉ែត្រ ស្នងការនគរបាលខេត្តកណ្តាលលោកឧត្តមសេនីយ៍ទោ អ៊ាវ ចំរើនបានឲ្យដឹងថា អគ្គិភ័យនេះ ប្រើប្រាស់រថយន្តពន្លត់អគ្គិភ័យអស់ចំនួន ១៦គ្រឿង គឺមានរថយន្តខេត្តកណ្តាល០៥គ្រឿង រថយន្តខេត្តកំពង់ឆ្នាំង០២គ្រឿង រថយន្តខេត្តកំពង់ស្ពឺ០១គ្រឿង រថយន្តរោងចក្រថៃយ៉ា០២គ្រឿង រថយន្តនាយកដ្ឋានបង្ការពន្លត់អគ្គិភ័យ០៤គ្រឿងរថយន្តរាជធានីភ្នំពេញ០២គ្រឿង។
លោកស្នងការបានបញ្ជាក់ថា អគ្គិភ័យនេះផ្តើមចេញពីជាងភ្លើងតភ្លើងម៉ាស៊ីនត្រជាក់បណ្តាលឲ្យឆ្លងចរន្តទុសេតែម្តង តែយ៉ាងណាកម្លាំងសមត្ថកិច្ចគ្រប់គ្រងបាននៅម៉ោង១៥និង៣០នាទី៕
Source: Kampuchea Thmey Daily
0 Comments