បាត់ដំបង ៖ ជនសង្ស័យចំនួន ៤ នាក់ ដែលជាមុខសញ្ញាដើរលូកកាបូបក្នុងថ្ងៃបុណ្យទាន ត្រូវបានកម្លាំងសមត្ថកិច្ច នៃក្រុមបង្ការ បង្ក្រាប ធ្វើការឃាត់ខ្លួនបានជាបន្តបន្ទាប់ក្នុងថ្ងៃតែមួយ បន្ទាប់ពីពួកគេបានធ្វើសកម្មភាពជាក់ស្តែងនៅតាមទីអារាម។
ការឃាត់ខ្លួននេះបានធ្វើឡើង កាលពីថ្ងៃទី ៩ ខែ តុលា ឆ្នាំ ២០១៨ គឺជាថ្ងៃបុណ្យភ្ជុំដំបូង ដោយសារតែមានករណីចោរដើរលូកកាបូបនៅក្នុងសាលាឆាន់ ក្នុងទីអារាម វត្តភ្នំសំពៅ ក្នុងឃុំភ្នំសំពៅ ស្រុកបាណន់ ខេត្តបាត់ដំបង ទាំងព្រឹក ខណៈដែលពុទ្ធបរិស័ទកំពុងនាំគ្នាយកចង្ហាន់ទៅប្រគេនព្រះសង្ឃ។
ក្រោយ ពីទទួលបានពាក្យ បណ្តឹង របស់ជនគ្រោះឈ្មោះ ចេង ប៊ុនរ៉ានី ភេទស្រី អាយុ៣១ ឆ្នាំ រស់នៅភូមិទួលតាឯក សង្កាត់ទួលតាឯក ក្រុងបាត់ដំបង ខេត្តបាត់ដំបង រួចមក កម្លាំងក្រុមអន្តរាគមន៍ បង្ការ បង្ក្រាប នៃស្នងការដ្ឋាន នគរបាលខេត្ត បានចុះ ប្រត្តិបត្តិការ ទៅកាន់ចំណុចកើតហេតុខាងលើ ដើម្បីស្រាវជ្រាវរកមុខសញ្ញា ដោយសារតែរបស់ដែលបាត់បង់គឺមានទឹកប្រាក់ប្រមាណជាង ១០០០ ដុល្លារ ។
នៅក្នុងកិច្ចប្រតិបត្តិការនេះដែរ សមត្ថកិច្ចបានឃាត់ខ្លួនជនសង្ស័យចំនួន ៤ នាក់ក្នុងនោះគឺ ១. ឈ្មោះ ផល អ៉ីម ភេទស្រី អាយុ ២៨ឆ្នាំ ២. ឈ្មោះ ហង្ស ណារី ភេទស្រី អាយុ ២៩ឆ្នាំ ៣. ឈ្មោះ ពេជ្រ សុភក្ត្រ័ ភេទប្រុស អាយុ ៣០ឆ្នាំ និង ៤. ឈ្មោះ ផល ផា ភេទប្រុស អាយុ ២៩ឆ្នាំ ពួកគេទាំងអស់គ្នា មានទីលំនៅ នៅភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
បច្ចុប្បន្នក្រោយពីទទួលបាននូវចម្លើយសារភាពរួចមក សមត្ថកិច្ចបានប្រគល់ជនសង្ស័យទាំង ៤ នាក់ ទៅអោយផ្នែកជំនាញ នៃស្នងការដ្ឋាននគរបាលខេត្តចាត់ការបន្ត៕
Source: Kampuchea Thmey Daily
0 Comments