ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីថ្ងៃទី២៥ខែតុលា ឆ្នាំ២០១៨ បានអនុញ្ញាតឲ្យលោក Christian Vigouroux ប្រធានក្រុមប្រឹក្សាភិបាល នៃវិទ្យាស្ថានប៉ាស្ទ័រ ប្រទេសបារាំងចូលជួបពិភាក្សាការងារនៅទីស្តីការក្រសួងក្រសួងសុខាភិបាល។
លោកសាស្ត្រាចារ្យម៉ម ប៊ុនហេង បានសម្តែងការស្វាគមន៍ដល់ លោក Christian Vigouroux និងថ្លែងអំណរគុណដល់វិទ្យាស្ថានប៉ាស្ទ័រ ដែលបានផ្តល់ការឧបត្ថម្ភគាំទ្រដល់វិទ្យាស្ថានបាស្ទ័រកម្ពុជា និងសាកលវិទ្យាល័យវិទ្យាសាស្ត្រសុខាភិបាលកម្ពុជា លើវិស័យសិក្សាស្រាវជ្រាវ និងការបណ្តុះបណ្តាលធនធានមនុស្ស។
លោក Christian Vigouroux ប្រធានក្រុមប្រឹក្សាភិបាល នៃវិទ្យាស្ថានប៉ាស្ទ័រ ប្រទេសបារាំងបានជម្រាបជូន លោករដ្ឋមន្ត្រីថាវិទ្យាស្ថានប៉ាស្ទ័របានសហការជាមួយ សាកលវិទ្យាល័យវិទ្យាសាស្ត្រសុខាភិបាល ក្នុងការសិក្សាស្រាវជ្រាវទៅលើជំងឺឆ្លង ដូចជាគ្រុនឈាម រលាកសួត ជំងឺឆ្កែឆ្កួត ជំងឺផ្តាសាយ និងជំងឺឆ្លងដទៃទៀត និងជួយបង្កើនសមត្ថភាពរបស់អ្នកស្រាវជ្រាវវ័យក្មេង។
លើសពីនេះទៀត វិទ្យាស្ថានប៉ាស្ទ័រ ក៏បានជួយដល់ផ្នែកបង្កើនសមត្ថភាពរបស់មន្ត្រីសុខាភិបាលកម្ពុជាវ័យក្មេង តាមរយៈការបញ្ជូននិស្សិត វ័យក្មេងទៅសិក្សាអនុវត្តអំពីវិទ្យាសាស្ត្រវេជ្ជសាស្ត្រ នៅប្រទេ សបារាំងផងដែរ។
លោក Christian ក៏បានស្នើសុំ លោករដ្ឋមន្ត្រី បន្តការគាំទ្រដល់សកម្មភាពរបស់វិទ្យាស្ថានបាស្ទ័រកម្ពុជាផងដែរ។ ជាការឆ្លើយតប លោករដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ លោក Christian និងវិទ្យាស្ថានបាស្ទ័រ ដែលតែងតែឧបត្ថម្ភគាំទ្រដល់គម្រោងសិក្សាស្រាវជ្រាវ និងសុំឲ្យបន្តជួយដល់ការអភិវឌ្ឍន៍ធនធានមនុស្ស ជាពិសេសនិស្សិត នៃសាកលវិទ្យាល័យវិទ្យាសាស្ត្រសុខាភិបាល ដើម្បីក្លាយជាធនធានមនុស្សទៅថ្ងៃអនាគគ៕
Source: Kampuchea Thmey Daily
0 Comments