ភ្នំពេញ ៖ ក្រសួងមហាផ្ទៃ បាននឹងកំពុងសហការជាមួយក្រសួងសេដ្ឋកិច្ច និងហិរញ្ញវត្ថុ និងក្រសួងពាក់ព័ន្ធនានា ដើម្បីរៀបចំសេចក្តីព្រាងអនុក្រឹត្យស្ដីពីការគ្រប់គ្រង និងការបែងចែកចំណូល ដែលបានមកពីកម្រៃនៃការផ្ដល់សេវារដ្ឋបាលរបស់អង្គភាពច្រកចេញចូលតែមួយរបស់រាជធានី ខេត្ត ហើយនៅក្នុងអំឡុងពេលដែលសេចក្តីព្រាងអនុក្រឹត្យនេះ មិនទាន់ត្រូវបានដាក់ចេញជាផ្លូវការ និងដើម្បីធានាដល់ការគ្រប់គ្រង ការចាត់ចែង និងការប្រើប្រាស់ចំណូលពីកម្រៃសេវារដ្ឋបាលនេះ ឲ្យបានត្រឹមត្រូវ ទាន់ពេលវេលា និងសមស្របតាមនីតិវិធីហិរញ្ញវត្ថុជាធរមានក្រសួងមហាផ្ទៃបានដាក់ចេញនូវផែនការមួយចំនួន។
តាមលិខិតរបស់ក្រសួងមហាផ្ទៃ ដែលទើបទទួលបាននៅថ្ងៃទី២៦ ខែតុលា បានបញ្ជាក់ថា ចំពោះ ចំណូលដែលបានមកពីកម្រៃសេវារដ្ឋបាលផ្ទាល់របស់រដ្ឋបាលរាជធានី ខេត្ត រដ្ឋបាលរាជធានី ខេត្ត ត្រូវបន្តការគ្រប់គ្រងការចាត់ចែង និងការប្រើប្រាស់ចំណូលពីកម្រៃសេវារដ្ឋបាលផ្ទាល់របស់ខ្លួន ដូចបានកំណត់ក្នុងតារាងឧបសម្ពន្ធនៃប្រកាសអន្តរក្រសួងចុះថ្ងៃទី២៩ ខែធ្នូ ឆ្នាំ២០១៦ និងប្រកាសអន្តរក្រសួងចុះថ្ងៃទី៥ ខែកក្កដា ឆ្នាំ២០១៨ រវាងក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ តាមគោលការណ៍ និងនីតិវិធីជាធរមាន។ រដ្ឋបាលរាជធានី ខេត្ត ត្រូវផ្ដល់អាទិភាពក្នុងការបែងចែកប្រាក់រង្វាន់ពីសេវាទាំងនេះ និងប្រាក់រង្វាន់ ដែលបានពីប្រភពស្របច្បាប់ផ្សេងទៀត សម្រាប់លើកទឹកចិត្តដល់មន្ត្រី ដែលបំពេញការងារនៅអង្គភាពច្រកចេញចូលតែមួយរបស់រាជធានីខេត្ត។
ចំណែកចំណូលពីកម្រៃសេវារដ្ឋបាលតាមវិស័យជំនាញ ក្រសួងបានបញ្ជាក់ថា ចំណូលពីកម្រៃសេវារដ្ឋបាលតាមវិស័យជំនាញនីមួយៗ ដែលបានប្រមូលដោយអង្គភាពច្រកចេញចូលតែមួយ របស់រាជធានី ខេត្ត ត្រូវបែងចែក និងបើកផ្ដល់ជូនក្រសួង មន្ទីរជំនាញ តាមអត្រាដែលបានកំណត់ ដោយប្រកាសអន្តរក្រសួង រវាងក្រសួងសេដ្ឋកិច្ច និងហិរញ្ញវត្ថុ ជាមួយក្រសួងសាមី ដូចបានអនុវត្តកន្លងមក រហូតដល់មានការដាក់ចេញលិខិតបទដ្ឋាន ឬ ការណែនាំថ្មីជំនួស។
ចំពោះការបែងចែក និងការបើកប្រាក់ចំណូលកម្រៃសេវារដ្ឋបាលជូនក្រសួង មន្ទីរជំនាញពាក់ព័ន្ធ ត្រូវអនុវត្តតាមគោលការណ៍ និងនីតិវិធីមួយចំនួនរួមមាន ទី១. រដ្ឋបាលរាជធានី ខេត្ត ដែលមានទីចាត់ការហិរញ្ញវត្ថុជាសេនាធិការ ត្រូវរៀបចំរបាយការណ៍ ស្តីពីស្ថានភាពអនុវត្តចំណូលប្រចាំខែ និងបញ្ជីចំណូលប្រចាំខែ ដែលអង្គភាពច្រកចេញចូលតែមួយរបស់រាជធានី ខេត្ត ប្រមូលបានក្នុងដែនសមត្ថកិច្ចរបស់ខ្លួន តាមប្រភេទសេវា និងតាមវិស័យនីមួយៗ ដោយបែងចែកចំណូល ជាចំណែកចំណូលថវិកា និងចំណាយប្រាក់រង្វាន់តាមអត្រា ដែលបានកំណត់ដោយប្រកាសអន្តរក្រសួងរវាងក្រសួងសេដ្ឋកិច្ច និងហិរញ្ញវត្ថុ ជាមួយក្រសួងពាក់ព័ន្ធ ដូចមានគំរូភ្ជាប់មកជាមួយ។ បន្ទាប់មក ទីចាត់ការហិរញ្ញវត្ថុ ត្រូវផ្ញើរបាយការណ៍ ស្ដីពីស្ថានភាពអនុវត្តចំណូលប្រចាំខែ និងបញ្ជីចំណូលប្រចាំខែខាងលើ ជូនទៅមន្ទីរជំនាញសាម៉ីនីមួយៗ ដើម្បីធ្វើការពិនិត្យ និងផ្ទៀងផ្ទាត់។
ទី២. រជ្ជទេយ្យករ ចំណូលនៃរដ្ឋបាលរាជធានី ខេត្ត ត្រូវបង់សាច់ប្រាក់ចំណូល ដែលជាចំណែកថវិការបស់ក្រសួងមន្ទីរជំនាញទៅក្នុងគណនីចរន្តរបស់រតនាគារជាតិរាជធានី ខេត្ត នៅធនាគារពាណិជ្ជតាមនីតិវិធី និងបែបបទ ដែលកំណត់ដោយក្រសួងសេដ្ឋកិច្ច និងហិរញ្ញវត្ថុ និងត្រូវបើកផ្តល់សាច់ប្រាក់ចំណូល ដែលជាប្រាក់រង្វាន់ទៅឲ្យមន្ទីរជំនាញសាមីនីមួយៗសម្រាប់ចាត់ចែងតាមគោលការណ៍ និងនីតិវិធីជាធរមាន។
ទី៣. អភិបាលរាជធានី ខេត្ត ត្រូវជូនដំណឹងទៅមន្ទីរសាមី អំពីការបង់សាច់ប្រាក់ចំណូល ដែលជាចំណែកថវិការបស់ក្រសួងមន្ទីរជំនាញទៅក្នុងគណនីចរន្តរបស់រតនាគាររាជធានី ខេត្ត នៅធនាគារពាណិជ្ជ ដើម្បីឲ្យរជ្ជទេយ្យរកចំណូលរបស់មន្ទីរសាមីរៀបចំសលាកប័ត្រ បង់ចំណូលថវិកាក្រសួង មន្ទីរជំនាញរបស់ខ្លួនតាមនីតិវិធី ជាធរមាន។
ទី៤. អភិបាលរាជធានី ខេត្ត ត្រូវណែនាំ និងជំរុញដល់ក្រសួង មន្ទីរជំនាញនីមួយៗ ដែលទទួលបានប្រាក់រង្វាន់ពីចំណូលកម្រៃសេវារដ្ឋបាល ឲ្យធ្វើការចំណាយប្រាក់រង្វាន់លើកទឹកចិត្ត និងទូទាត់ប្រាក់រង្វាន់នេះតាមរយៈអាណត្តិនិយ័តកម្ម និងសលាកប័ត្របង់ប្រាក់ចំណូលថវិកា (ថវិកាប្រាក់រង្វាន់) ឲ្យបានមុនដំណាច់ឆ្នាំ២០១៨ និងស្របតាមគោលការណ៍ និងនីតិវិធីផ្តល់រង្វាន់លើកទឹកចិត្តលើការផ្ដល់សេវាសាធារណៈ ដែលកំណត់ដោយក្រសួងសេដ្ឋកិច្ច និងហិរញ្ញវត្ថុ៕
Source: Kampuchea Thmey Daily
0 Comments