អ្នកនាំពាក្យ​ ៖ ការ​ដក​ប្រព័ន្ធ​អនុគ្រោះ​ពន្ធ EBA មិន​មានន័យថា ឈប់​ឲ្យ​កម្ពុជា​នាំ​ទំនិញ​ចូល​សហគមន៍​អឺរ៉ុប​នោះទេ

ភ្នំពេញ ​៖ លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា​បាន​អះអាង​ថា ការដក​ប្រព័ន្ធ​អនុគ្រោះ​ពន្ធ EBA មិន​មានន័យថា ឈប់​ឲ្យ​កម្ពុជា​នាំ​ទំនិញ​ចូល​សហគមន៍​អឺរ៉ុប​នោះទេ គឺ​នៅតែ​អាច​នាំ​ទំនិញ​ចូល​បណ្តា​ប្រទេស​អឺរ៉ុប​ដដែល គ្រាន់តែ​គេ​យកពន្ធ​នាំចូល​ប៉ុណ្ណោះ ដែល​អាចធ្វើ​ឲ្យ​តម្លៃ​ទំនិញ​កើន​មួយចំនួន​។

លោក សុខ ឥសាន បញ្ជាក់​យ៉ាងនេះ​ថា “​ប្រព័ន្ធ​អនុគ្រោះ​ពន្ធ EBA គឺជា​ការ​អនុគ្រោះ​ឲ្យ​បណ្តា​ប្រទេស​ទន់ខ្សោយ អាច​នាំចូល​ទំនិញ​គ្រប់យ៉ាង​លើកលែងតែ​គ្រឿង​សព្វាវុធ​( Everything But. Arms)​។ តាម​លក្ខខណ្ឌ​នៃ​បណ្តា​ប្រទេស​សហគមន៍​អឺរ៉ុប នៅពេលណា​បណ្តា​ប្រទេស​អន់​ខ្សោយ ដែល​ទទួលបាន​ភាពអនុគ្រោះ​ពន្ធ EBA មានការ​រីកចម្រើន​ដល់​កម្រិត​ណាមួយ​ភាពអនុគ្រោះ​ពន្ធ EBA នេះ​នឹងត្រូវ​លុបចោល ប៉ុន្តែ​មិន​មានន័យថា ឈប់​ឲ្យ​នាំ​ទំនិញ​ចូល​ទៀត​ទេ គឺ​នៅតែ​អាច​នាំ​ទំនិញ​ចូល​ទៅ​បណ្តា​ប្រទេស​នៅ​សហគមន៍​អឺរ៉ុប​ដដែល គ្រាន់តែ​គេ​យកពន្ធ​នាំចូល​ប៉ុណ្ណោះ ដែល​អាចធ្វើ​ឲ្យ​តម្លៃ​លក់ទំនិញ​នាំចូល​កើន​ថ្លៃ​មួយចំនួន​”​។

តាម​លោក សុខ ឥសាន ការ​ដែល​មាន​អ្នកខ្លះ​និយាយ​ថា បើ​អត់ EBA នឹង​នាំ​ដល់​ការបាត់​ទីផ្សារ​នោះ គឺជា​ការឃោសនា​ផ្ទុយ​ការពិត ដើម្បី​បំភិតបំភ័យ និង​បំភាន់​មតិ​កម្មករនិយោជិត​ឲ្យ​ចងកំហឹង​ជាមួយ​រាជរដ្ឋាភិបាល​កម្ពុជា​តែប៉ុណ្ណោះ​។ ហេតុ​ដូច្នេះហើយ បានជា​ពួកគេ​នាំគ្នា​បំផុស​ថា បើ​អត់ EBA. កម្មករនិយោជិត នឹង​បាត់បង់​ការងារ​អស់រលីង​តែម្តង​។ បញ្ហា​នេះ​មិនមែន​ដូច​ការឃោសនា​របស់​ពួក​អគតិ​ទាំង​នោះឡើយ​។

ទាក់ទង​បញ្ហា​នេះ សម្តេច​តេ​ជោ ហ៊ុន សែន ធ្លាប់​បាន​បញ្ជាក់​ជូន​ប្រជាពលរដ្ឋ​ខ្មែរ​ប្រមាណ​ជាង​១​ពាន់​នៅ​ទ្វីបអឺរ៉ុប​ថា កម្ពុជា​មិនទាន់​បាត់បង់​អ្វី​ទាំងអស់ ពី​ប្រព័ន្ធ​អនុគ្រោះ​ពន្ធ (EBA) ទាំង​ការងារ ទាំង​ប្រាក់ចំណូល ប៉ុន្តែ​បញ្ហា EBA នេះ ត្រូវ​បាន​មនុស្ស​មួយចំនួន​យក​ទៅ​ធ្វើជា​សង្គ្រាមចិត្តសាស្ត្រ វាយប្រហារ​លើ​រាជរដ្ឋាភិបាល​។ សម្តេច​តេ​ជោ បាន​ពន្យល់​ថា ប្រព័ន្ធ​អនុគ្រោះ​ពន្ធ​សម្រាប់​ទំនិញ​របស់​កម្ពុ​ជា​ពី​សហភាព​អឺរ៉ុប គង់តែ​បាត់បង់​ទេ នៅពេល​កម្ពុជា​ក្លាយជា​ប្រទេស​មាន​សេដ្ឋកិច្ច​ខ្ពស់ ហើយ​សម្តេច​បានធ្វើការ​មួយ​ជំហាន​ជាមួយ​ជប៉ុន ចិន កូរ៉េ​ខាង​ត្បូង និង​ធនាគារអភិវឌ្ឍន៍អាស៊ី ឲ្យ​បន្ត​ផ្តល់​អត្រា​ការប្រាក់​អនុគ្រោះ​រយៈពេល​១០​ឆ្នាំ​ទៀត​ដល់​កម្ពុជា និង​លទ្ធភាព​សង​រយៈពេល​៤០​ឆ្នាំ​។

សម្តេច​តេ​ជោ​ប្រមុខ​រាជ​រដ្ឋាភិបាល​បាន​បញ្ជាក់​ទៀតថា​ នៅ​ឆ្នាំ​២០១៨ នេះ សេដ្ឋកិច្ច​របស់​កម្ពុជា​រំពឹងថា នឹង​មាន​កំណើន​៧,២ ភាគរយ ហើយ​កំណើន​នេះ ត្រូវ​បាន​ស្ថាប័ន​អន្តរជាតិ​ផ្តល់​ចំណាត់​ថា ​ជា​ប្រទេស​ចំណាត់ថ្នាក់​ទី​១ មាន​សេដ្ឋកិច្ច​ខ្លាំង​ជាង​គេ​ក្នុង​តំបន់​អាស៊ីអាគ្នេយ៍ ខណៈ​ប្រទេស​វៀតណាម​ឈរ​កម្រិត​ទី​២៕

Source: Kampuchea Thmey Daily