កំពង់ចាម ៖ អំពើហិង្សាក្នុងគ្រួសារបង្កឡើងដោយកូនប្រុសអមត្តញ្ញូម្នាក់ ព្រោះតែខឹងម្តាយ និងប្អូនស្រីបង្កើតមិនអោយយកម៉ូតូជិះដើរលេងក៏ស្ទុះ ទៅទាត់ប្អូន និងទះក្មួយដែលនៅតូចមិនដឹងអ្វីផងហើយថែមទាំងយកដាវគំរាមសម្លាប់ទៀតផង។
ប៉ូលិសបានអោយដឹងថា នៅថ្ងៃទី១២ ខែតុលា ឆ្នាំ២០១៨ ម៉ោង១៨និង៣០នាទីប៉ុស្តិ៍ នគរបាលរដ្ឋបាលឃុំក្រូច បានទទួលពាក្យបណ្តឹងពីឈ្មោះជួប ភាព ភេទស្រី អាយុ៤៨ឆ្នាំ ជនជាតិខ្មែរនៅ ភូមិថ្មី ឃុំក្រូច ស្រុកព្រៃឈរ ខេត្តកំពង់ចាមថា នៅម៉ោង១៤និង៣០នាទី នាថ្ងៃខែឆ្នាំដដែលឈ្មោះ ទ្រី រ័ត្ន ភេទប្រុស អាយុ២៣ឆ្នាំ ជនជាតិខ្មែរ ជាកូនបង្កើត បម្រុងយកម៉ូតូជិះដើរលេង តែអ្នកស្រីជាម្តាយនិងកូនស្រីមិនឲ្យ ស្រាប់តែវាយកជើងធាក់ទៅលើប្អូនស្រីឈ្មោះទ្រី សុខរ៉ា អាយុ២២ឆ្នាំត្រូវចំពោះ មួយជើង និងទះកំផ្លៀងទៅលើក្មួយប្រុសឈ្មោះគា ម៉េង អាយុ៦ឆ្នាំ ត្រូវចំថ្ពាល់ខាងឆ្វេង មួយដៃព្រមទាំងយកដាវឆ្នៃចំនួន១ដើមដេញគំរាមកាប់សម្លាប់ចោលទាំងអស់។
ប៉ូលិសបានបន្តថា បន្ទាប់ពីទទួលបណ្ដឹងហើយប៉ុស្តិ៍ បានសហការជាមួយជំនាញឃាត់ខ្លួនជនសង្ស័យនាំមកអធិការដ្ឋាននគរបាលស្រុកព្រៃឈរធ្វើតេស្តរកសារធាតុញៀនឃើញថា វិជ្ជមាន និងសាកសួរកសាងសំណុំរឿងតាមនីតិវិធី៕
Source: Kampuchea Thmey Daily
0 Comments