គិតត្រឹមថ្ងៃសុក្រ ចំនួនអ្នកស្លាប់ដោយសារព្យុះសង្ឃរា Michael បានកើនឡើងដល់យ៉ាងតិច១៦នាក់ចំពេលមានការភ័យខ្លាចថា វានឹងបន្តកើនឡើង ខណៈដែលក្រុមស្វែងរកនិងជួយសង្គ្រោះបានរកសព្វពាសពេញទីក្រុងនៃរដ្ឋ Florida ដែលវាយប្រហារដោយព្យុះបិសាចមួយនេះ។
អភិបាលរដ្ឋ Florida លោក Rick Scott បាននិយាយថា “ទីក្រុង Mexico Beach ត្រូវបានបំផ្លាញ”។ នៅទីក្រុងនេះ ព្យុះ Michael បានបង្កការបាក់ដីក្នុងនាមជាព្យុះប្រភេទ៤កាលពីថ្ងៃពុធ។
លោក Scott បាននិយាយថា “វាដូចជាគ្រាប់បែកផ្ទុះអញ្ចឹង។ វាដូចជាតំបន់សង្គ្រាម”។ លោកបាននិយាយបែបនេះនៅពេលដែលលោកបានធ្វើដំណើរទៅកាន់ទីក្រុងដែលមានប្រជាជន១,០០០នាក់មួយនេះដែលស្ថិតនៅឈូងសមុទ្រម៉ិកស៊ិក។
កាលពីថ្ងៃសុក្រ ក្រុមជួយសង្គ្រោះបានប្រើប្រាស់សត្វឆ្កែហិតក្លិនក្នុងទីក្រុង Mexico Beach ដើម្បីស្វែងរកជនរងគ្រោះដែលអាចកប់នៅក្រោមគំនរបាក់បែក។
លោក Brock Long ប្រធានទីភ្នាក់ងារគ្រប់គ្រងគ្រោះអាសន្នសហព័ន្ធ (FEMA) បានព្រមានថា លោករំពឹងថាចំនួនអ្នកស្លាប់នឹងកើនឡើងបន្តទៀត។ លោកថ្លែងថា “ខ្ញុំរំពឹងថា យើងនឹងមិនឃើញវាកើនឡើងយ៉ាងខ្លាំងទៅចុះប៉ុន្តែខ្ញុំមានហេតុផលដើម្បីជឿថា យើងនៅមិនទាន់អាចចូលទៅដល់តំបន់ដែលរងផលប៉ះពាល់ខ្លាំងបំផុត”។
ក្រុមមន្ត្រីរដ្ឋបាននិយាយថា ទីក្រុង Mexico Beach គឺស្ថិតនៅក្រោមការបញ្ជាឲ្យជម្លៀសជាចាំបាច់ប៉ុន្តែអ្នកស្រុកមួយចំនួនបានសម្រេចចិត្តស្នាក់នៅហើយព្យាយាមគេចចេញពីព្យុះ។
មនុស្សយ៉ាងតិច៤នាក់ដែលស្លាប់ដោយសារខ្យល់ព្យុះនេះត្រូវបានបញ្ជាក់នៅរដ្ឋ Florida, ៥នាក់នៅរដ្ឋ Virginia, ម្នាក់នៅរដ្ឋ Georgia និង៣នាក់ទៀតនៅរដ្ឋ North Carolina ។
ប្រព័ន្ធផ្សព្វផ្សាយរបស់អាមេរិកកាលពីថ្ងៃសុក្របានដកស្រង់សម្តីអាជ្ញាធរនៅក្នុងតំបន់ Jackson County នៃរដ្ឋ Florida ដែលបានរាយការណ៍ថា មានមនុស្ស៣នាក់បានស្លាប់នៅទីនោះដែលធ្វើឲ្យចំនួនអ្នកស្លាប់ដោយសារព្យុះ Michael កើនដល់យ៉ាងតិច១៦នាក់។
ការស្លាប់២នាក់ចុងក្រោយនៅរដ្ឋ North Carolina បានកើតឡើងក្នុងតំបន់ McDowell នៅពេលរថយន្តមួយគ្រឿងបុកដើមឈើដែលបាក់នៅតាមដងផ្លូវ៕ AFP
Source: Kampuchea Thmey Daily
0 Comments