ប្រទេសបារ៉ែន កាមេរូននិងហ្វីលីពីនគឺស្ថិតក្នុងចំណោមប្រទេសមួយចំនួនដែលត្រូវបានជ្រើសរើសនៅក្នុងក្រុមប្រឹក្សាសិទ្ធិមនុស្សនៃអង្គការសហប្រជាជាតិកាលពីថ្ងៃសុក្រ ដែលជាហេតុធ្វើឲ្យមានការរិះគន់យ៉ាងខ្លាំងពីសំណាក់អង្គការសិទ្ធិមនុស្សនិងសហរដ្ឋអាមេរិក។
ប្រហែលមួយភាគបីនៃអាសនៈនៅក្រុមប្រឹក្សាមានសមាជិកចំនួន៤៧ដែលមានមូលដ្ឋាននៅទីក្រុងហ្សឺណែវមួយនេះបានបើកចំហរសម្រាប់តំណែងឆ្នាំ២០១៩ដល់ឆ្នាំ២០២២។ សំឡេងឆ្នោតភាគច្រើន៩៧សំឡេងមកពីប្រទេសចំនួន១៩៣នៃមហាសន្និបាតរបស់អង្គការសហប្រជាជាតិគឺចាំបាច់សម្រាប់ការអនុម័ត។
ជាលើកដំបូងហើយចាប់តាំងពីក្រុមប្រឹក្សានេះត្រូវបានបង្កើតឡើងនៅក្នុងឆ្នាំ២០០៦, តំបន់បោះឆ្នោតនីមួយៗបានយល់ព្រមជាមុនលើបេក្ខជនចំនួន១៨នាក់ដែលកំពុងឈរឈ្មោះសម្រាប់១៨អាសនៈហើយដកចេញនូវការប្រកួតប្រជែងទាំងឡាយ។
សមាជិកថ្មីដូចជាបារ៉ែន កាមេរូន ហ្វីលីពីន សូម៉ាលី បង់ក្លាដែសនិងអេរីទ្រាត្រូវបានបោះឆ្នោតជ្រើសរើសដោយសំឡេងចន្លោះ១៦០ដល់១៧៨ហើយភ្លាមៗនោះបានទាក់ទាញការរិះគន់ពីសំណាក់ក្រុមសកម្មជននៅទ្វីបអឺរ៉ុបនិងអាមេរិកខាងជើងដែលច្រានចោលពួកគេថា “មិនមានលក្ខណៈគ្រប់គ្រាន់” ដោយសារតែកំណត់ត្រាសិទ្ធិមនុស្សរបស់ពួកគេ។
អង្គការសិទ្ធិមនុស្ស Human Rights Watch ដែលមានមូលដ្ឋាននៅទីក្រុងញូវយ៉កបាននិយាយថា “ដោយសារតែការដាក់អ្នករំលោភបំពានសិទ្ធិមនុស្សធ្ងន់ធ្ងរនិងបង្ហាញបេក្ខជនដែលមានចំនួនច្រើន, ក្រុមក្នុងតំបន់នេះកំពុងប្រឈមនឹងការប៉ះពាល់ដល់ភាពជឿទុកចិត្តនិងប្រសិទ្ធភាពរបស់ក្រុមប្រឹក្សានេះ”។
នៅពេលចាប់ផ្តើមនៃការបោះឆ្នោត ប្រធានមហាសន្និបាតលោកស្រី Maria Fernanda Espinosa បានកត់សម្គាល់ថា រដ្ឋជាសមាជិកទាំងអស់ត្រូវបានអនុញ្ញាតឲ្យដាក់ពាក្យសម្រាប់អាសនៈ។
ទោះបីជាយ៉ាងណាក៏ដោយ អ្នកនាំពាក្យរបស់លោកស្រីក្រោយមកបានបដិសេធនិយាយអំពីការរិះគន់ដោយផ្ទាល់ប៉ុន្តែបានកត់សម្គាល់ថា “វាច្បាស់ណាស់ថា ពិភពលោករំពឹងថា សមាជិកនៃស្ថាប័នអន្តរជាតិនឹងគោរពតាមស្តង់ដារនៃអាកប្បកិរិយាជាក់លាក់ស្របនឹងស្ថាប័នដែលពួកគេត្រូវបានជ្រើសរើស”។
គួរបញ្ជាក់ថា សមាជិកថ្មីចំនួន៥គឺមកពីទ្វីបអាហ្វ្រិក, ៥មកពីអាស៊ី, ២មកពីអឺរ៉ុបខាងកើត, ៣មកពីអាមេរិកឡាទីននិងការាប៊ីននិង៣មកពីអឺរ៉ុបខាងលិច៕ AFP
Source: Kampuchea Thmey Daily
0 Comments