ភ្នំពេញ ៖ ក្រុមហ៊ុនជីប ម៉ុង អ៊ិនស៊ី ដោយសហការជាមួយនឹងអង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក បានសម្ពោធគម្រោងការអប់រំសុវត្ថិភាពចរាចរណ៍សហគមន៍ ដើម្បីលើកកម្ពស់ការយល់ដឹងពីសុវត្ថិភាពចរាចរណ៍ក្នុងចំណោមសិស្សានុសិស្ស និងប្រជាជនទូទៅនៅក្នុងស្រុកបន្ទាយមាស ខេត្តកំពត កាលពីព្រឹកថ្ងៃទី ១២ ខែតុលា ឆ្នាំ២០១៨។
ប្រជាពលរដ្ឋ លោកគ្រូ អ្នកគ្រូ សិស្សានុសិស្ស និងអាជ្ញាធរប្រមាណជាង ៤០០ នាក់ បានចូលរួមនៅក្នុងកម្មវិធី ក្នុងនោះដែរ សិស្សានុសិស្ស និងគ្រូបង្គោលសុវត្ថិភាពចរាចរណ៍ ដែលត្រូវបានជ្រើសរើសក្នុងសហគមន៍ទទួលបានមួកសុវត្ថិភាពម្នាក់មួយ និងឧបករណ៍សម្រាប់ឆ្លងផ្លូវទៅកាន់សាលាពីរដែលជាប់នឹងផ្លូវលេខ៣៣។
លោកស្រីលឹម សុខជា ទីប្រឹក្សាជាន់ខ្ពស់នៃ អង្គការសម្ព័ន្ធដើម្បីសុវត្ថិភាពចរាចរណ៍ផ្លូវគោក មានប្រសាសន៍ថា តាម ប្រព័ន្ធទិន្នន័យ ជនរងគ្រោះថ្នាក់ចរាចរណ៍ក្នុងឆ្នាំ ២០១៧ ចំនួនអ្នក ស្លាប់ ៧៥% ពាក់ ព័ន្ធនឹងការប្រើប្រាស់ទោចក្រ យានយន្ត និងរងរបួសក្បាលហើយមានតែ ៦៩% ប៉ុណ្ណោះ ដែលពាក់មួកសុវត្ថិភាព។ ហេតុដូច្នេះហើយទើប ក្រុមហ៊ុនសម្រេច បានជ្រើសរើស និងបណ្តុះបណ្តាលគ្រូបង្គោលចំនួន៣០នាក់ដើម្បីឱ្យពួកគាត់បន្តធ្វើការអប់រំសុវត្ថិភាពចរាចរណ៍ទៅកាន់សិស្សានុសិស្ស ប្រជាជននៅក្នុងសហគមន៍បន្តទៀត។
លោកទៀង សុភៈវិជ្ជា តំណាងឱ្យក្រុមហ៊ុនជីប ម៉ុង អ៊ិនស៊ី បានមានប្រសាសន៍ថា ក្រុមហ៊ុនជីប ម៉ុង អ៊ិនស៊ី តែងតែយកចិត្តទុកដាក់ទៅលើសុវត្ថិភាពរបស់ប្រជាជននៅក្នុងសហគមន៍។ លោកបានគូសបញ្ជាក់ ថា នេះមិនមែនជាលើកទីមួយនោះទេ ដែលក្រុមហ៊ុន បានរៀបចំកម្មវិធីស្ដីពីសុវត្ថិភាពចរាចរណ៍ ហើយក្រុមហ៊ុននឹងនៅតែបន្តសហការជាមួយនឹងអ្នកពាក់ព័ន្ធ និងធ្វើសកម្មភាពអប់រំ ផ្សព្វផ្សាយ ដល់ប្រជាជននៅក្នុងសហគមន៍ឱ្យយល់ដឹងអំពីសុវត្ថិភាពចរាចរណ៍នេះ៕
Source: Kampuchea Thmey Daily
0 Comments