ភ្នំពេញ ៖ ពិព័រណ៍ស្នាដៃសិល្បៈគំនូរវិចិត្រកម្មក្រោមប្រធានបទ”ពេលវេលា”ត្រូវបានបើកសម្ពោធដាក់ឲ្យសាធារណជនទូទៅបានចូលទស្សនារយៈពេល១ខែចាប់ពីថ្ងៃទី២៥ ខែតុលា ឆ្នាំ២០១៨ រហូតដល់ថ្ងៃទី២៥ ខែវិច្ឆិកា ឆ្នាំ២០១៨នៅសារមន្ទីរជាតិកម្ពុជាក្រោមការរៀបចំឡើងដោយនាយកដ្ឋានសិល្បៈសូនរូបនិងសិល្បៈសិប្បកម្មនិងនាយកដ្ឋានសារមន្ទីរ។
លោក ឈឹម សុធី ប្រធាននាយកដ្ឋានសិល្បៈសូនរូបនិងសិល្បៈសិប្បកម្មបានប្រាប់ឲ្យដឹងថា សិល្បករខ្មែរចំនួន២០រូបបានយកស្នាដៃសិល្បៈគំនូរវិចិត្រកម្មមកតាំងបង្ហាញនេះមានចំនួន២១ ដោយ១ផ្ទាំងជាស្នាដៃរបស់លោកគ្រូ ចាន់ ឡៃហេង ដែលបានទទួលមរណភាពទៅហើយ។ តែយើងចង់បង្ហាញថា គាត់បានស្លាប់ទៅមែនប៉ុន្តែស្នាដៃនិង”ពេលវេលា”របស់គាត់នៅតែបានបន្សល់ទុក ដល់អ្នកជំនាន់ក្រោយជាពិសេសសំរាប់សិស្សនិស្សិតផ្នែកសិល្បៈគំនូរនេះបានសិក្សាស្វែងយល់រៀនសូត្រ។
លោក ឈឹម សុធី បានបន្ថែមថា ស្នាដៃរបស់សិល្បករដែលដាក់បង្ហាញទាក់ទងនឹងពេលវេលានេះ គឺមានការបង្ហាញពីអារម្មណ៍រៀងៗខ្លួនសិល្បករមានដូចជាការប្រែប្រួលអាកាសធាតុ ទឹក ដី ភ្លើង ខ្យល់ ខ្លះទៀតក៏គូរអំពីការកើត ឈឺ ចាស់ ស្លាប់ ការវិនាសទៅវិញអំពីវិទ្យាសាស្ត្រ អំពីចិត្តវិទ្យា និយាយជារួមគឺអ្វីៗទាំងអស់ទាក់ទងនឹងពេលវេលា បើអត់មានពេលវេលាទេយើងក៏អត់មានអ្វីៗដូចសព្វថ្ងៃដែរ។
ក្នុងនាមជាប្រធាននាយកដ្ឋានសិល្បៈសូនរូបនិងសិល្បៈសិប្បកម្ម លោកឈឹម សុធី បានបញ្ជាក់ថា នៅពេលដែលមានសកម្មភាពសិល្បៈតាំងពិព័រណ៍ស្នាដៃគំនូរ លោកតែងតែបានអញ្ជើញនិងផ្សព្វផ្សាយដល់សិស្សនិស្សិតបានចូលរួមទស្សនា ស្នាដៃរបស់គ្រូៗក៏ដូចជាសិល្បករចាស់ៗបានសំដែងទឹកចិត្ត មនោសញ្ចេតនាតាមរយៈផ្ទាំងស្នាដៃ ឲ្យគាត់មើល ជាបទពិសោធន៍និងឆ្ងល់អាចសួរជាចំណេះដឹង។
ធៀបពីមុននឹងឥឡូវ លោក ឈឹម សុធី បានបន្តឲ្យដឹងថា ជារៀងរាល់ឆ្នាំនិស្សិតចូលរៀនតាមបណ្តាមហាវិទ្យាល័យមានការកើនឡើង តែផ្នែកសិល្បៈគំនូរមានការថយចុះបន្តិច ដោយសារតែនិស្សិតបានចាប់យកផ្នែកឌីហ្សាយ ឬស្ថាបត្យកម្ម សំណង់ វិញដើម្បីតំរូវទៅលើទីផ្សារការងារបច្ចុប្បន្ន។ ព្រោះថា សិល្បៈគំនូរទាមទារ ឲ្យសិស្សមានចិត្តចង់រៀនហើយ និងមានទេពកោសល្យពីកំណើតថែមទៀត៕
Source: Kampuchea Thmey Daily
0 Comments