ឆេះហាងលក់គ្រឿងបន្លាស់រថយន្ត ក្បែរស្ថានីយប្រេងPTT អង់តែនទួលគោក រងរបួសប៉ូលិស និងខូចខាតសម្ភារៈប្រមាណ៤០%

ភ្នំពេញ ៖ ហាងលក់គ្រឿង តុបតែង រថយន្តមួយកន្លែងត្រូវបានអគ្គិភ័យឆាបឆេះបណ្ដាលឲ្យខូចខាតសម្ភារៈអស់មួយចំនួនធំ បង្កឲ្យមានការភ្ញាក់ផ្អើលដល់សមត្ថកិច្ច ចេញរថយន្តពន្លត់អគ្គិភ័យជាច្រើនគ្រឿងមកជួយអន្តរាគមន៍ ទើបភ្លើងបានរលត់។

ហេតុការណ៍អាក្រក់នេះ បានកើតឡើងកាលពីវេលាម៉ោង១០និង៣៥នាទីយប់ថ្ងៃទី២៦ ខែតុលា ឆ្នាំ ២០១៨ នៅហាងលក់គ្រឿង តុបតែង រថយន្តយីហោ ស៊ាង ហាក់ តូបB24 ក្បែរ អង់តែន ទួលគោក ភូមិ ១៣ ស្ថិត ក្នុងសង្កាត់ បឹងកក់ ទី ១ ខណ្ឌទួលគោក។

សាក្សីនៅកន្លែងកើតហេតុ បានឲ្យ ដឹងថា នៅមុនពេលកើតហេតុគេបានធុំក្លិន ឈ្ងៀម និងមានផ្សែងចេញមកពីខាងក្នុង ហាងលក់ គ្រឿង តុប តែងរថយន្ត យីហោ ស៊ាង ហាក់ តូប B24 ខាងលើ ដែលម្ចាស់បានបិទចាក់សោពីខាងក្រៅ ហើយ ក៏ កើត មាន ការ ភ្ញាក់ ផ្អើល ដល់ប្រជាពលរដ្ឋ ដែល រស់ នៅ ក្បែរ ខាង នាំគ្នាចោមរោម មើល។ បន្ទាប់មកក៏ស្រាប់តែឃើញមាន អណ្ដាត ភ្លើង ចេញ មកពីក្នុងនោះ។ ភ្លាម ៗ នោះ ប្រជាពលរដ្ឋ ក៏បាន នាំគ្នាវាយបំបែកសោ និងគាស់ទ្វារហាងកើតហេតុ ហើយបាននាំគ្នាយក បំពង់ ពន្លត់ អគ្គិភ័យ មកបាញ់ ពន្លត់ អស់៨ទៅ៩បំពង់ តែដោយមិនអាចគ្រប់គ្រងអណ្តាតភ្លើង ដែលកំពុងឆេះបាន ក៏បាន រាយការណ៍ ជូនសមត្ថកិច្ច មូលដ្ឋាន និង រថយន្ត ពន្លត់ អោយ ចុះមកជួយអន្តរាគមន៍។

ក្រោយ មកក៏ឃើញមានរថយន្ត ពន្លត់ អគ្គិភ័យ របស់ ស្នងការ នគរបាល រាជធានី ភ្នំពេញ មកចំនួន ១៦គ្រឿង រួចក៏បានធ្វើការ បាញ់ ទឹក ពន្លត់ អស់ ចំនួន ៧គ្រឿងទើបភ្លើងបានរលត់ទៅវិញ។

សមត្ថកិច្ចមូលដ្ឋាន បានអោយដឹងថា ករណី អគ្គិភ័យ ខាងលើ គឺមិនបណ្តាលអោយឆេះ រៀល ដាល ដល់តូបដែលនៅក្បែរខាងនោះទេ គឺគ្រាន់តែ ខូចខាត សម្ភារៈ សម្រាប់ លក់ ដែល នៅក្នុងហាង ខាងលើ អស់ប្រមាណ៤០ភាគរយប៉ុណ្ណោះ ក្នុងនោះមានដូចជា ធុងបាស់ អំពូល ភ្លើង រថយន្ត កម្រាល ពូក រថយន្ត និងសម្ភារៈមួយចំនួនទៀត។

ក្នុងហេតុការណ៍នេះក៏បានធ្វើអោយកម្លាំងជំនាញពន្លត់អគ្គិភ័យ ម្នាក់រងរបួសរយះជើង ខាងឆ្វេង ខណៈដែលកំពុង ប្រតិបត្តិការ បាញ់ ពន្លត់ ករណី ខាងលើ តែបានជាន់នឹងកញ្ចក់។

ចំពោះករណីឆាបឆេះខាងលើនេះ សមត្ថកិច្ចប៉ូលិស បានសន្និដ្ឋាន ថា អាចបណ្តាលមកពីឆ្លងចរន្តអគ្គិសនីចេញពីប្រអប់ ព្រីភ្លើង នៅក្នុងហាងកើតហេតុខាងលើ ហើយបន្តរាលដាលឆាបឆេះជាអណ្តាតភ្លើងតែម្តង៕