ព្យុះ​ព្រិល​សម្លាប់​អ្នក​ឡើង​ភ្នំ​យ៉ាងតិច​៨​នាក់​នៅ​លើ​កំពូលភ្នំ​នេប៉ាល់

ក្រុមមន្ត្រី​បាន​និយាយ​កាលពី​ថ្ងៃ​សៅរ៍​ថា អ្នក​ឡើង​ភ្នំ​យ៉ាងតិច​៨​នាក់​មកពី​បេសកកម្ម​របស់​កូរ៉េខាងត្បូង​ បាន​ស្លាប់​លើ​ភ្នំ Gurja របស់​ប្រទេស​នេ​ប៉ាល់​បន្ទាប់ពី​ជំរំ​របស់​ពួកគេ​ត្រូវបាន​បំផ្លាញ​ដោយ​ព្យុះ​ព្រិល​ដ៏​សាហាវ​មួយ។

សាកសព​អ្នក​ឡើង​ភ្នំ​ទាំង​ប្រាំ​បីនាក់​ដែលមាន​ជនជាតិ​កូរ៉េខាងត្បូង​បួន​នាក់​និង​មគ្គុទ្ទេសក៍​ជនជាតិ​នេ​ប៉ាល់​បួន​នាក់​ត្រូវបាន​ប្រទះឃើញ​នៅក្នុង​ចំណោម​ជំរំ​របស់​ពួកគេ​ដោយ​ក្រុម​ជួយសង្គ្រោះ​មួយ​កាលពី​ព្រឹក​ថ្ងៃ​សៅរ៍​ប៉ុន្តែ​ស្ថាន​ភាពមិន​អំណោយផល​និង​ទឹកកក​បាន​រារាំង​ដល់​កិច្ចខិតខំ​ប្រឹងប្រែង​ស្វែងរក​។​
​
អ្នកនាំពាក្យ​ប៉ូលិស​លោក Sailesh Thapa បាន​ប្រាប់ AFP ថា “​យើង​សន្មត​ថា ឧបទ្ទវ​ហេតុនេះ​បានកើត​ឡើង​ដោយសារតែ​ព្យុះ​ទឹកកក ដោយសារតែ​ដើមឈើ​បាក់​និង​តង់​។ សូម្បីតែ​សាកសព​ក៏​រាយប៉ាយ​ដែរ​”​។ លោក Thapa បាន​បន្តថា អ្នក​ឡើង​ភ្នំ​ទី​៩​ក៏​អាច​បាត់​ខ្លួន​ផងដែរ​។​
​
ឧទ្ធម្ភាគចក្រ​មួយគ្រឿង​បាន​ទៅដល់​ទីតាំង​នោះ​ហើយ​បាន​ព្យាយាម​ចុះចត​នៅ​ខាងលើ​ជំរំ​របស់​ក្រុម​បេសកកម្ម​នេះ​ប៉ុន្តែ​មិនអាច​យក​សាកសព​ណាមួយ​ចេញ​បានទេ​។​
​
លោក Wangchu Sherpa នាយក​គ្រប់គ្រង​ក្រុមហ៊ុន Trekking Camp Nepal ដែល​រៀបចំ​បេសកកម្ម​នេះ​បាន​និយាយថា ពួកគេ​បានបង្ហាញ​ពី​ក្តី​ព្រួយបារម្ភ​បន្ទាប់ពី​ពួកគេ​មិនបាន​ឮដំណឹង​ពី​ក្រុម​នេះ​អស់​រយៈពេល​ជិត​២៤​ម៉ោង​។​
​
លោក​បាន​និយាយថា “​បន្ទាប់ពី​ពួកគេ​លែងមាន​ទំនាក់ទំនង​ចាប់តាំងពី​ម្សិលមិញ​មក យើង​បាន​បញ្ជូន​មនុស្ស​មកពី​ភូមិ​និង​ឧទ្ធម្ភាគចក្រ​មួយគ្រឿង​ដើម្បី​ស្វែងរក​ពួកគេ​”​។​
​
គួរ​បញ្ជាក់ថា ក្រុម​អ្នក​ឡើង​ភ្នំ​កូរ៉េខាងត្បូង​និង​អ្នក​នាំ​ផ្លូវ​នេ​ប៉ាល់​របស់​ពួកគេ​បាន​បោះជំរំ​នៅ​ជើងភ្នំ Gurja ដែលមាន​កម្ពស់​៧,១៩៣​ម៉ែត្រ​ចាប់តាំងពី​ដើមខែ​តុលា​ម​កដោយ​រង់ចាំ​អាកាសធាតុ​ល្អ​ដើម្បី​ឲ្យ​ពួកគេ​អាច​ឈានដល់​កំពូលភ្នំ​នេះ​បាន​៕ AFP

​

Source: Kampuchea Thmey Daily