ភ្នំពេញ ៖ អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ បានអះអាងថា នៅឆ្នាំ២០១៩ ខាងមុខនេះ គម្រោងចំណាយថវិកាជាតិសម្រាប់ក្រសួងការពារជាតិ ត្រូវបានស្នើឡើងប្រមាណ២,៤១៦,៤៣៨លានរៀល ដែលកើនឡើង៩,៩ភាគរយ បើធៀបទៅនឹងឆ្នាំ២០១៨ ដែលមានចំនួនប្រមាណ២,១៩៨,៣៧៨លានរៀល ហើយការដំឡើងប្រាក់បៀវត្សរ៍ដល់កងទ័ពជារៀងរាល់ឆ្នាំ គឺជាចំណុចសំខាន់ ដែលឈានទៅបង្កើនឡើងនូវគម្រោងចំណាយថវិកាសម្រាប់វិស័យការពារជាតិ។
តាមនាយឧត្តមសេនីយ៍ ឈុំ សុជាតិ សម្រាប់គម្រោងចំណាយរបស់រាជរដ្ឋាភិបាលកម្ពុជា ជារួមសម្រាប់វិស័យការពារជាតិ សន្ដិសុខ និងសណ្ដាប់ធ្នាប់សាធារណៈរបស់ព្រះរាជាណាចក្រកម្ពុជា នៅឆ្នាំ២០១៩ ដែលមានចំនួន៤,៤២៥,១៥០លានរៀល ក៏មានការកើនឡើងប្រមាណ១០,៥ ភាគរយផងដែរ បើធៀបនឹងឆ្នាំ២០១៨។ ក្នុងនោះមានចំណាយចរន្ត៤,២៦៣,៥៥៧លានរៀល (ចំណាយបន្ទុកបុគ្គលិក ៣,៣៨៧,៨៦៥លានរៀល, ក្រៅបន្ទុកបុគ្គលិក ៨៧៥,៦៩២លានរៀល) និងចំណាយមូលធន១៦១,៥៩៣លានរៀល។
ការដំឡើងប្រាក់បៀវត្សរ៍ដល់កងទ័ពរៀងរាល់ឆ្នាំ គឺជាចំណុចសំខាន់មួយ ឈានទៅដល់បង្កើនឡើងនូវគម្រោងចំណាយថវិកាសម្រាប់ក្រសួងការពារជាតិ នៅឆ្នាំក្រោយនេះ ដោយធ្វើឡើងស្របជាមួយនឹងកំណើនសេដ្ឋកិច្ចជាតិ ដែលឆ្នាំ២០១៩ ខាងមុខនេះ ផលិតផលក្នុងស្រុកសរុបរបស់កម្ពុជា (ផ.ស.ស-GDP) នឹងអាចកើនឡើងដល់២៧,២២២លានដុល្លារអាមេរិក ខណៈចំណូលសម្រាប់មនុស្សម្នាក់ៗនឹងកើនឡើងដល់១,៧០៦ដុល្លារអាមេរិក។
បៀវត្សយោធិន (ពលទោ) នឹងត្រូវដំឡើងពីចំនួន៩៧៦,៥៥០រៀល នៅឆ្នាំ២០១៨ ដល់ប្រមាណ១,០២៥,៩០០រៀល នៅខែមេសា ឆ្នាំ២០១៩ (មិនគិតបញ្ចូលរបបអង្ករ) ហើយនឹងត្រូវដំឡើងដល់ប្រមាណ១,០៥៥,៩០០រៀល (មិនគិតបញ្ចូលរបបអង្ករ) ហើយបើគិតបញ្ចូលរបបអង្ករ ត្រូវជាប្រមាណ១,១១៤,៣៧៧រៀល ចាប់ពីខែមេសា ឆ្នាំ២០១៩៕
Source: Kampuchea Thmey Daily
0 Comments