បន្ទាយមានជ័យ ៖ ស្ត្រីម្នាក់ ជំពាក់លុយធនាគារ និងគេ វ័ណ្ឌក អារឿងយកលុយទៅការកូនដើមនៅឯស្រុក ស្រាប់តែប្រឌិតរឿងថា មានចោរប្លន់ទ្រព្យសម្បត្តិអស់ជាច្រើនម៉ឺនដុល្លារ។
លោកវរសេនីយ៍ សៅ សារឿន អធិការនគរបាលស្រុកថ្មពួកបានប្រាប់អ្នកយកព័ត៌មាននៅព្រឹក ថ្ងៃទី២៥ ខែតុលា ឆ្នាំ២០១៨នេះថា ស្ត្រីដែលជំពាក់លុយធនាគារ និងគេនោះ មានឈ្មោះ បុណ្យ ចន្ថា ភេទស្រី អាយុ៣៧ឆ្នាំ រស់នៅភូមិត្រពាំងសំរោង ឃុំគោករមៀត ស្រុកថ្មពួក ខេត្តបន្ទាយមានជ័យ។
លោកបន្តថា ស្ត្រីនេះ ក្រោយពីកើតហេតុ បានរាយការណ៍ប្តឹងសមត្ថកិច្ចថា នៅម៉ោង៧កន្លះយប់ថ្ងៃទី២៣ ខែតុលា ឆ្នាំ២០១៨ មានជនល្មើសមិនស្គាល់មុខចំនួន២នាក់ បិទមុខជិត ប្រដាប់ដោយអាវុធខ្លីចំនួន១ដើម បានចូលក្នុងផ្ទះខ្លួន ធ្វើសកម្មភាពភ្ជង់សម្លុតគំរាមយកលុយ។ ពេលនោះជនរងគ្រោះស្រែក ហើយជនល្មើស ក៏យកខ្សែភ្លើងចងដៃ និងយកស្កុតរុំមាត់ខ្លួនពីរនាក់ និងកូនស្រីស្របពេលនោះចោរបានចូលទៅក្នុងបន្ទប់ខ្លួន ហើយប្លន់យក ទ្រព្យសម្បត្តិអស់រួមមាន ធំ ខ្សែកមាស១ខ្សែទម្ងន់៥ជីខ្សែដៃមាស១ខ្សែទម្ងន់១តម្លឹងចិញ្ចៀនមាស១វង់ ទម្ងន់៥ជី ខ្សែដៃប្លាទីន១ខ្សែ ទម្ងន់៣ជី ខ្សែកប្លាទីន១ខ្សែ ទម្ងន់៤ជី៧ហ៊ុន ចិញ្ចៀនប្លាទីន១វង់ទម្ងន់២ជី ប្រាក់ថៃ ៦.០០០បាត ប្រាក់ខ្មែរ ៧ លានរៀល។
ជនល្មើសពេលធ្វើសកម្មភាពរួចបាននាំគ្នារត់គេចខ្លួនទៅទិសខាងជើងបាត់។ លោកសៅ សារឿនហៅបោន បឿនបានឲ្យដឹងបន្តថា ទៀតថា ក្រោយពីទទួលបានព័ត៌មាននេះ ក្រោមការដឹកនាំបញ្ជាផ្ទាល់ពីលោកឧត្ដមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងដឹកកម្លាំងដោយលោកឧត្ដមសេនីយ៍ត្រី សិទ្ធិ ឡោះ ស្នងការរងទទួលព្រហ្មទណ្ឌ លោកផ្ទាល់ អធិការនគរបាលស្រុកថ្មពួក កម្លាំងនគរបាលការពារព្រំដែនគោកវរៈសេនាតូច៨០៧ សហការជាមួយកម្លាំងកងរាជអាវុធហត្ថស្រុកថ្មពួក បានចុះស្រាវជ្រាវ កំណត់មុខសញ្ញានិង រហូតដល់បំបែកសំណុំរឿងបាននៅវេលាម៉ោង១២និង៣០នាទីថ្ងៃនាទី ល្ងាចថ្ងៃទី២៤ ខែតុលា។
សមត្ថកិច្ចនគរបាលឲ្យដឹងថា អារឿងចោរប្លន់នេះ វាជារឿងប្រឌិត តាមការពិតស្ត្រីនេះបានខ្ចីលុយធនាគារ និងលុយអ្នកជិតខាងដើម្បីយកលុយទៅការកូនដើមនៅស្រុកកំណើតអស់ គ្មានលុយសងគេទើបប្រឌិតរឿងចោរប្លន់នេះឡើង។
លោកបានបញ្ជាក់ឲ្យដឹងទៀតថា ក្នុងនោះស្ត្រីនោះបានឲ្យកូនស្រីអាយុ១៣ឆ្នាំ និយាយកុហកប្តីឪពុកនាងនិងសមត្ថកិច្ចថា មានចោរចូលប្លន់ក្នុងបន្ទប់ ហើយនាំយកទ្រព្យសម្បត្តិមានតម្លៃដូចខាងលើ។ ប៉ុន្តែធាតុពិតជាក់ស្តែង ការរៀបចំសម្តែងល្ខោនឆ្ពិនភ្នែក ពីព្រោះស្ត្រីនោះ ជំពាក់បំណុលគេច្រើនកាលដែលខ្លួនការកូនស្រីកាលពីឆ្នាំទៅមិញផង និងជំពាក់ធនាគារឯកជនផងដល់គ្មានអ្វីសងគេ ហើយចង់គេចវេះនិងអូសបន្លាយការសងបំណុល ក៏បែកគំនិតផ្តេសផ្តាសកុហកទាំងប្តី ទាំងសមត្ថកិច្ចដូច្នេះទៅ។
លោកឧត្ដមសេនីយ៍ត្រី សិទ្ធិ ឡោះ ស្នងការរងទទួលព្រហ្មទណ្ឌខេត្តបន្ទាយមានជ័យនិយាយថា ក្នុងនាមមន្ត្រីសមត្ថកិច្ចការពារ ថែរក្សាសុខសុវត្ថិភាព និងសេចក្ដីជូនពលរដ្ឋនិងសង្គមនោះ ឲ្យតែពលរដ្ឋប្តឹងឬសំណូមពរឲ្យសមត្ថកិច្ចតែងចុះធ្វើជាបន្ទាន់ទាំងយប់ទាំងថ្ងៃ ទោះពិតឬកុហកដូច្នេះក៏ដោយ។
លុះសមត្ថកិច្ចចុះបង្ក្រាបនិងស្រាវជ្រាវរកការពិតឃើញហើយ សមត្ថកិច្ចហួសចិត្ត ហើយណែនាំកុំឲ្យពលរដ្ឋនេះ និងពលរដ្ឋដទៃទៀតកុហកបោកបញ្ឆោតដូច្នេះទៀត ។ សមត្ថកិច្ចបានឲ្យសាមីខ្លួន គឺស្ត្រីដែលហៅខ្លួនឯងថាជាជនរងគ្រោះនិងកូនស្រី និយាយសុំទោសជាសាធារណៈ ថាមិនមែនជាករណីប្លន់យកទ្រព្យអីទេ តែដោយសារខ្លួនជំពាក់លុយគេច្រើន ហើយគ្មានលទ្ធភាពសង ក៏រៀបចំជាឆាកល្ខោនថា មានចោរប្លន់៕
Source: Kampuchea Thmey Daily
0 Comments