នាយករដ្ឋមន្ត្រីអូស្ត្រាលីលោក Scott Morrison បានចេញការសុំទោសថ្នាក់ជាតិដល់ជនរងគ្រោះនៃការរំលោភបំពានផ្លូវភេទលើកុមារនៅក្នុងការថ្លែងសុន្ទរកថាមួយទៅកាន់សភានៅថ្ងៃចន្ទដោយទទួលស្គាល់ថា រដ្ឋនេះបានបរាជ័យក្នុងការបញ្ឈប់ “ឧក្រិដ្ឋកម្មដ៏ខ្មៅងងឹត” ដែលបានប្រព្រឹត្តឡើងអស់រយៈពេលជាច្រើនទសវត្សមកហើយ។
លោក Morrison បានថ្លែងទៅកាន់សភាក្នុងសុន្ទរកថាផ្សាយតាមទូរទស្សន៍ទូទាំងប្រទេសថា “រឿងនេះត្រូវបានធ្វើឡើងដោយប្រជាជនអូស្ត្រាលីចំពោះប្រជាជនអូស្ត្រាលី”។
លោកបាននិយាយថា “ក្នុងនាមជាប្រជាជាតិមួយ យើងបានបរាជ័យចំពោះពួកគេ យើងបានបោះបង់ពួកគេហើយនោះគឺជាភាពអាម៉ាស់របស់យើង”។
លោកបន្តថា “ថ្ងៃនេះ យើងសូមនិយាយសុំទោសចំពោះកុមារដែលយើងបរាជ័យ។ សុំទោសចំពោះឪពុកម្តាយដែលទំនុកចិត្តរបស់ពួកគេត្រូវគេក្បត់និងសូមអភ័យទោសចំពោះអ្នករាយការណ៍ដែលយើងមិនបានស្តាប់”។
ការសុំទោសថ្នាក់ជាតិនេះបានកើតឡើងបន្ទាប់ពីគណៈកម្មាការ Royal Commission បានរៀបរាប់លម្អិតអំពីការរំលោភបំពានផ្លូវភេទលើកុមារជាង១៥,០០០នាក់ពាក់ព័ន្ធនឹងស្ថាប័នរាប់ពាន់។
នៅក្នុងសភា តំណាងរាស្ត្របានក្រោកឈរដើម្បីស្មឹងស្មាធមួយភ្លែតបន្ទាប់ពីការថ្លែងសុន្ទរកថាខណៈអ្នករស់រានមានជីវិតរាប់រយនាក់បានមើលព្រឹត្តិការណ៍ជាផ្លូវការនេះនៅទូទាំងប្រទេស។
ស្ថាប័នជាច្រើនបានសុំអភ័យទោសរួចទៅហើយចំពោះកំហុសរបស់ពួកគេដែលរួមមានទាំងមេដឹកនាំសាសនាកាតូលិកអូស្ដ្រាលីផងដែរដែលបានស្តីបន្ទោសអំពីប្រវត្តិសាស្ត្រ “គួរឲ្យអាម៉ាស់” នៃការរំលោភបំពានលើកុមារនិងការបិទបាំង។
យោងតាមគណៈកម្មាការ Royal Commission បានឲ្យដឹងថា ៧ភាគរយនៃអាចារ្យសាសនាកាតូលិកក្នុងប្រទេសអូស្ត្រាលីត្រូវបានគេចោទប្រកាន់ពីបទរំលោភបំពានចន្លោះឆ្នាំ១៩៥០ដល់ឆ្នាំ២០១០ប៉ុន្តែការចោទប្រកាន់ទាំងនេះមិនដែលត្រូវបានស៊ើបអង្កេតទេ៕ AFP
Source: Kampuchea Thmey Daily
0 Comments