ជនអន្តោប្រវេសន៍ហុងឌូរ៉ាសរាប់ពាន់នាក់ ដែលការធ្វើដំណើររបស់ពួកគេឆ្ពោះទៅកាន់សហរដ្ឋអាមេរិកបានបង្កឲ្យមានការខឹងសម្បាយ៉ាងខ្លាំងពីប្រធានាធិបតីអាមេរិកលោក Donald Trump នោះគឺបានទៅដល់ប្រទេសម៉ិកស៊ិកហើយកាលពីថ្ងៃអាទិត្យបន្ទាប់ពីឆ្លងកាត់ទន្លេមួយ។
អាជ្ញាធរម៉ិកស៊ិកបានព្យាយាមដើម្បីរារាំងក្បួននៃជនចំណាកស្រុកនេះនៅលើស្ពានព្រំដែនមួយដែលខណ្ឌចែករវាងប្រទេសម៉ិកស៊ិកនិងហ្គាតេម៉ាឡាប៉ុន្តែក្រោយមក មនុស្សជាច្រើនបានឆ្លងកាត់ទន្លេនៅខាងក្រោមដោយជិះលើក្បូនមុនពេលដើរឆ្ពោះទៅកាន់ភាគខាងជើង។
លោក Trump បានអះអាងថា “កិច្ចខិតខំប្រឹងប្រែងគ្រប់បែបយ៉ាង” កំពុងដំណើរការដើម្បីបញ្ឈប់ដំណើររបស់ជនអន្តោប្រវេសន៍ទាំងនេះមកកាន់សហរដ្ឋអាមេរិក។
លោក Trump បានបង្ហោះ Twitter ថា “កិច្ចខិតខំប្រឹងប្រែងយ៉ាងពេញទំហឹងត្រូវបានធ្វើឡើងដើម្បីបញ្ឈប់ការវាយលុករបស់ជនបរទេសខុសច្បាប់ពីការឆ្លងកាត់ព្រំដែនភាគខាងត្បូងរបស់យើង។ មនុស្សត្រូវតែដាក់ពាក្យសុំសិទ្ធិជ្រកកោននៅក្នុងប្រទេសម៉ិកស៊ិកជាមុនសិនហើយប្រសិនបើពួកគេមិនធ្វើដូច្នេះទេ សហរដ្ឋអាមេរិកនឹងរុញច្រានពួកគេឲ្យត្រឡប់ទៅវិញ”។
យ៉ាងណាក៏ដោយ មនុស្សប្រហែល៣,០០០នាក់កំពុងដើរក្បួននៅលើទឹកដីម៉ិកស៊ិក។ នេះបើយោងតាមការប៉ាន់ប្រមាណពីមេបញ្ជាការប៉ូលិសសហព័ន្ធដែលកងកម្លាំងរបស់គាត់បានឃ្លាំមើលយ៉ាងដិតដល់អំពីដំណើររបស់ជនចំណាកស្រុក។
ជនចំណាកស្រុកប្រហែលមួយពាន់នាក់រួមទាំងស្ត្រីនិងកុមារផងដែរនៅតែត្រូវជាប់គាំងលើស្ពានព្រំដែនក្នុងសង្ឃឹមថានឹងចូលទៅប្រទេសមិកស៊ិកដោយស្របច្បាប់តាមរយៈហ្គាតេម៉ាឡា។
អាជ្ញាធរម៉ិកស៊ិកបានទទូចថា អ្នកដែលស្ថិតនៅលើស្ពាននឹងត្រូវដាក់ពាក្យសុំសិទ្ធិជ្រកកោនម្តងម្នាក់ៗដើម្បីចូលក្នុងប្រទេសនេះ។
ហើយក្រុមដាច់ដោយឡែកមួយផ្សេងទៀតដែលមានជនជាតិហុងឌូរ៉ាសប្រហែល១,០០០នាក់ បានចាប់ផ្តើមដើរក្បួនរបស់ពួកគេឆ្លងកាត់ប្រទេសហ្គាតេម៉ាឡាឆ្ពោះទៅប្រទេសម៉ិកស៊ិកនិងបន្ទាប់មកសហរដ្ឋអាមេរិក។ ក្រុមបុរស ស្ត្រីនិងកុមារបានប្រមូលផ្តុំគ្នានៅទីក្រុង Esquipulas មុនពេលចេញដំណើរ៕ AFP
Source: Kampuchea Thmey Daily
0 Comments