រតនគិរី ៖ ជនសង្ស័យម្នាក់ ត្រូវនគរបាលឃាត់ខ្លួនពាក់ព័ន្ធករណីចាប់រំលោភសេពសន្ថវៈលើក្មេងស្រីពិការដៃជើងបានសម្រេច កាលពីវេលាម៉ោង២រសៀលថ្ងៃព្រហស្បតិ៍ ៩កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៨ ខែតុលា ឆ្នាំ២០១៨ ត្រង់ចំណុចភូមិ តាឡាវ ឃុំតាឡាវ ស្រុកអណ្ដូងមាស។
នគរបាលស្រុកអណ្តូងមាសបានឲ្យដឹងថា ជនសង្ស័យឈ្មោះ ជឿន សុភា ភេទប្រុស អាយុ២៤ឆ្នាំ ជនជាតិឡាវ សញ្ជាតិខ្មែរ មុខរបរកសិករ មានទីលំនៅភូមិឃុំកើតហេតុខាងលើ ចោទពីបទរំលោភសេពសន្ថវៈលើអនីតិជន។ ចំណែកក្មេងស្រីរងគ្រោះឈ្មោះ ស.ម អាយុ១២ឆ្នាំ ជនជាតិឡាវ (ខ្វិនជើងនិងដៃ)មានទីលំនៅភូមិឃុំកើតហេតុខាងលើ។
នគរបាលបានបន្តថា នៅវេលាម៉ោង៩ព្រឹកថ្ងៃទី១៩ ខែតុលានេះ កម្លាំង ប៉ុស្តិ៍តាឡាវបានទទួលពាក្យបណ្តឹងពីឈ្មោះ សេង ណាង ត្រូវជាបងស្រីក្មេងរងគ្រោះ ភ្លាមនោះកម្លាំងប៉ុស្តិ៍ បានសហការជាមួយកម្លាំងជំនាញចុះដល់កន្លែងកើតហេតុ ហើយឃាត់ខ្លួនជនសង្ស័យយកមកប៉ុស្តិ៍ដើម្បីសួរនាំ និងកសាងសំណុំរឿងបញ្ជូនទៅអយ្យការអមសាលាដំបូងខេត្តចាត់វិធានការទៅតាមនីតិវិធីច្បាប់៕
Source: Kampuchea Thmey Daily
0 Comments