អ្នកប្រដាល់ជើងខ្លាំងកម្ពុជាផល សោភ័ណ្ឌ ក្លិបតាឡីដំរីមានរិទ្ធ បានផ្តួលអ្នកប្រដាល់ថៃLuk yod Site Sor.Kor ក្នុងទឹកទី៣ ឯ ចាន់ ប៊ុនលាភ អ្នកប្រដាល់ក្លិបនិរោធមានជ័យ បានវាយឈ្នះJak petch Phor.Ziwluck ដោយពិន្ទុ នៅក្នុងការជួបប្រកួតគ្នា នាយប់ថ្ងៃសុក្រទី១៩ តុលា ២០១៨ នៅក្នុងកម្មវិធីប្រដាល់គូបូតារបស់បាយ័ននៅសង្វៀនស្ទឹងមានជ័យ។
Lukyod ដែលមានកម្ពស់ខ្ពស់ជាងផល សោភ័ណ្ឌ នោះ ត្រូវសោភ័ណ្ឌទាត់បំបែកកង់ និងបោះបង់ចោលការប្រកួតក្នុងទឹកទី៣ ។ នៅក្នុងការប្រកួតទឹកទី៣នេះ ផល សោភ័ណ្ឌ បានប្រើកណ្តាប់ដៃនិងកែងវាយទៅលើLukyod ប៉ុន្តែពុំបានសម្រេចក្នុងការផ្តួលអ្នកប្រដាល់ថៃនេះបាន ។ដូច្នេះ សោភ័ណ្ឌ បានប្តូរស្នៀតពីការវាយលើមកវាយខាងក្រោមវិញ ដោយបានទាត់បំបែកកង់(ជើង)របស់Lukyod ធ្វើអោយខូចជើងខាងឆ្វេង ក្រោកលែងរួច ហើយបោះបង់ចោលការប្រកួត បន្ទាប់ពីអាជ្ញាកណ្តាលរាប់ដល់១០ហើយនោះ ។
សូមបញ្ជាក់ថា Lukyodនេះ ជាអ្នកប្រដាល់ជើងខ្លាំងនៅស្រុកថៃ ។ តាមប្រវត្តិ Lukyod ធ្លាប់មកប្រកួតនៅសង្វៀនស្រុកខ្មែរច្រើនលើកហើយកន្លងមក ។
ចំពោះ អ្នកប្រដាល់ជើងចាស់ ចាន់ ប៊ុនលាភ ក្លិបនិរោធមានជ័យ បានវាយឈ្នះអ្នកប្រដាល់ថៃ Jakpetch Phor.Ziwluck ដោយពិន្ទុទាំងលំបាក បន្ទាប់ពីប្រកួតគ្នា៥ទឹកពេញនោះ ។ ប៊ុនលាភ ប្រកួតបីទឹកដំបូងល្អនិងខ្លាំង ដោយបានវាយ Jakpetch អោយអាជ្ញាកណ្តាលរាប់៨ដល់ទៅ២ដង គឺក្នុងទឹកទី២ម្តង និងក្នុងទឹកទី៣ម្តង តាមរយៈការប្រើកែងបុកទៅលើថ្គាមរបស់ Jakpetch បណ្តាលអោយអ្នកប្រដាល់ថៃរូបនេះ ស្រុតដួលលើរេញ ។
ប៉ុន្តែយ៉ាងណា Jakpetch ពុំបានបោះបង់ការប្រកួតនោះឡើយ គឺបន្តការប្រកួតរហូតដល់ចប់ទឹក៥ ហើយថែមទាំងវាយប៊ុនលាភឲ្យថិតក្នុងសភាពទ្រុតទ្រោមខ្លាំង ខណះដែលចាន់ ប៊ុនលាភ ក្នុងពីរទឹកចុងក្រោយនេះ កំពុងស្រុតចុះខ្លាំងកម្លាំងស៊ុហ្វស្រាប់ផងនោះ ។
ទោះជាយ៉ាងណា ចាន់ ប៊ុនលាភ នៅតែឈ្នះ Jakpetch ដោយពិន្ទុដែរ ព្រោះគេបានវាយអ្នកប្រដាល់ថៃរូបនេះ រាប់ពីរលើកទៅហើយ ដូច្នេះប៊ុនលាភ គេត្រូវបានពិន្ទុច្រើនជាង Jakpetch ដែរ បើទោះជាពីរទឹកចុងក្រោយគេវាយមិនបានល្អក៏ដោយ ។
ដោយឡែក សម្រាប់ការប្រកួតរវាងអ្នកប្រដាល់រួមជាតិវិញ នូវ ដារ៉ូ អ្នកប្រដាល់ស្រករក្រោយក្លិបអាណាចក្រគុនខ្មែរ បានផ្តួល ទី ពន្លែត អ្នកប្រដាល់ជើងចាស់ក្លិបអង្គរមានជ័យខេត្តសៀមរាប អោយសន្លប់ក្នុងទឹកទី៣ ។ ចំណែក ចែម ចឺម អ្នកប្រដាល់ក្លិបរាជសីហ៍ខេត្តរតនគិរី ប្រកួតឈ្នះគឹម សុខហេង អ្នកប្រដាល់ក្លិបកងពលតូចទ័ពឆ័ត្រយោង៩១១ ដោយពិន្ទុដែរ ។ ដោយឡែក លាន់ សំអូន ក្លិបអារុណរះកីឡា បានផ្តួលថុក សណ្ឋាន ក្លិបយុវវាលស្បូវខណ្ឌច្បារអំពៅអោយសន្លប់ក្នុងទឹកទី២៕
Source: Kampuchea Thmey Daily
0 Comments