ភ្នំពេញ ៖ លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈ បានជំរុញឲ្យយុវជនអាស៊ីអាគ្នេយ៍ត្រូវខិតខំសិក្សារៀនសូត្រពីក្រុមយុវជនមកពីតំបន់អាស៊ាននានាដើម្បីយកនូវចំណុចល្អៗយកមកចូលរួមអភិវឌ្ឍន៍ប្រទេសជាតិជាតិវិញ។
ថ្លែងនៅក្នុងពិធីសំណេះសំណាលជាមួយយុវជនអាស៊ីអាគ្នេយ៍កម្ពុជាចំនួន២៩រូបមុននឹងធ្វើដំណើរចាកចេញពីប្រទេសកម្ពុជាទៅចូលរួមជាមួយយុវជនផ្សេងៗទៀតនៅប្រទេសជប៉ុននាពេលខាងមុខនេះកាលពីព្រឹកថ្ងៃទី០៤ តុលា ឆ្នាំ២០១៨នេះ លោកបណ្ឌិត អ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានផ្តល់អនុសាសន៍និងណែនាំបន្ថែមឲ្យក្រុមយុវជនត្រូវស្វែងយល់អំពីចំណេះដឹងទូទៅទាក់ទងនឹង ស្ថាប័ន តំបន់ និងអន្តរជាតិនានា ដែលកម្ពុជាជាសមាជិក ក្នុងនោះដូចជាអាស៊ាន អន្តរសភាអាស៊ាននិងអង្គការអន្តរជាតិផ្សេងៗទៀត រួមទាំងអត្ថប្រយោជន៍ ដែលកើតចេញពីកិច្ចសហប្រតិបត្តិការជាមួយបណ្តាអង្គការទាំងនោះសម្រាប់កម្ពុជា។
លើសពីនេះទៀត លោកបណ្ឌិតរដ្ឋមន្ត្រីបានណែនាំដល់យុវជនទាំងអស់ត្រូវធ្វើជាមគ្គុទេសដ៏ល្អម្នាក់ ជាអ្នកការទូតម្នាក់តំណាងឲ្យកម្ពុជា ដោយរក្សាឲ្យបាននូវកិត្តិយស តម្លៃ និងវប្បធម៌របស់ជាតិ ដោយត្រូវព្យាយាមលើកកម្ពស់វប្បធម៌ ទេសចរណ៍ និងអត្តសញ្ញាណជាតិ ព្រមទាំងរក្សានូវទំនាក់ទំនងល្អ ជាមួយយុវជនបណ្តាប្រទេសដទៃផ្សេងទៀត។
លោក ហោ សំណាង ប្រធានស្ដីទីសមាគមនាវាយុវជនអាស៊ីអាគ្នេយ៍កម្ពុជា បានឲ្យដឹងថា ក្រុមយុវជននឹងចូលរួមកម្មវិធីនាវាយុវជនអាស៊ីអាគ្នេយ៍ ដែលមានយុវជនមកពីប្រទេសក្នុងអាស៊ាន រួមនឹងប្រទេសជប៉ុនដែលជាអ្នកបង្កើតកម្មវិធីនឹងធ្វើដំណើរតាមនាវា ពីប្រទេសជប៉ុន ឆ្លងកាត់ប្រទេសប្រ៊ុយណេ ហ្វីលីពីន ថៃ និងប្រទេសវៀតណាមរយៈពេល៥២ថ្ងៃ ដោយចាប់ផ្តើមពីថ្ងៃទី២៣ ខែតុលា ដល់ថ្ងៃទី១២ ខែធ្នូ ឆ្នាំ២០១៨ ក្នុងគោ លបំណងពង្រឹងចំណងមិត្តភាព សាមគ្គីភាព និងការយោគយល់គ្នា រវាងយុវជនជប៉ុន និងយុវជនអាស៊ានទាំង១០ប្រទេស ក៏ដូចជាបង្កើនស្មារតីនិងជំនាញច្បាស់លាស់របស់យុវជនក្នុងកិច្ចសហប្រតិបត្តិការអន្តរជាតិជាដើម។
សូមបញ្ជាក់ថា កម្មវិធីនាវាយុវជនអាស៊ីអាគ្នេយ៍-ជប៉ុន បង្កើតឡើងដោយប្រទេសជប៉ុន គឺនៅឆ្នាំ១៩៧៤។ ចំណែក សមាគមនាវាយុវជនអាស៊ីអាគ្នេយ៍កម្ពុជា បានបង្កើតឡើងនៅឆ្នាំ២០០៤ ដែលរហូតមកដល់ពេលនេះ មានយុវជនកម្ពុជា ចំនួន៥៦៩នាក់ ហើយបានចូលរួមជាមួយកម្មវិធីនាវាយុវជនអាស៊ី អាគ្នេយ៍-ជប៉ុននេះ៕
Source: Kampuchea Thmey Daily
0 Comments