ក្រុមអ្នកនិយមសាសនាហិណ្ឌូជ្រុល បានបិទផ្លូវប្រសព្វនានា គំរាមអ្នកបើកបរ និងបានបញ្ជាឲ្យធ្វើកូដកម្មរយៈពេល១២ម៉ោងកាលពីថ្ងៃព្រហស្បតិ៍នៅពេលពួកគេបង្កើនយុទ្ធនាការរបស់ពួកគេដើម្បីរារាំងស្ត្រីពីការចូលប្រាសាទដ៏ពិសិដ្ឋមួយរបស់ប្រទេសឥណ្ឌា។
ប្រាសាទ Lord Ayyappa នៅ Sabarimala ក្នុងរដ្ឋភាគខាងត្បូង Kerala ត្រូវបានអនុញ្ញាតចំពោះស្ត្រីចាប់ពីថ្ងៃពុធទៅតាមបញ្ជារបស់តុលាការកំពូលឥណ្ឌា។
ប៉ុន្តែអ្នកប្រពៃណីនិយមរាប់រយនាក់ដែលគប់ដុំថ្មដាក់ប៉ូលិសគឺបានផ្គើននឹងបញ្ជានេះដោយនៅព័ទ្ធជុំវិញនិងស្រែកដាក់ស្ត្រីណាម្នាក់ដែលប៉ុនប៉ងធ្វើដំណើរទៅកាន់ទីតាំងលើកំពូលភ្នំ។
យុវជនដែលមានការខឹងសម្បាក៏បានឡោមព័ទ្ធនិងវាយបំបែកកញ្ចក់បង្អួចរថយន្តរបស់អ្នកកាសែតទូរទស្សន៍ស្ត្រីនិងគំរាមអ្នកដទៃទៀតរួមទាំងអ្នកយកព័ត៌មានរបស់ AFP ផងដែរ។ អ្នកឆ្លើយឆ្លងព័ត៌មានស្រីម្នាក់ទៀតត្រូវបានគេទាត់។
នៅពេលយប់ ក្រុមអ្នកកាន់សាសនាហិណ្ឌូក្នុងមូលដ្ឋានបានប្រកាសបិទអាជីវកម្មក្នុងស្រុករយៈពេល១២ម៉ោងដោយប្រាប់អ្នកបើកបរថា យានយន្តរបស់ពួកគេនឹងត្រូវរងការវាយប្រហារប្រសិនបើពួកគេនាំនរណាម្នាក់ឆ្ពោះទៅកាន់ប្រាសាទនេះ។
អាជ្ញាធររដ្ឋបានទទូចថា ពួកគេនឹងធានាដល់ការចូលទៅកាន់ប្រាសាទនេះដោយដាក់កំហិតទៅលើការប្រមូលផ្តុំគ្នាជាសាធារណៈដែលចូលជាធរមានចាប់ពីពាក់កណ្ដាលយប់ទៅ។
ប៉ូលិសរដ្ឋ Kerala ដែលគ្រោងបន្ថែមកម្លាំងបានធ្វើការអមឡានក្រុងមួយចំនួន។ ប៉ូលិសក៏បានដើរល្បាតនៅពេលយប់និងពង្រឹងវត្តមាននៅជំរំ Nilackal ខាងក្រោមប្រាសាទផងដែរ។
ប៉ុន្តែក្រុមយុវជនដែលមានគ្នាចន្លោះពី៥០ទៅ១០០នាក់បានជួបជុំគ្នានៅចំណុចប្រសព្វកាលពីថ្ងៃព្រហស្បតិ៍ដោយរារាំងយានយន្តទាំងអស់មិនឲ្យបន្តដំណើរឆ្ពោះទៅកាន់ប្រាសាទនេះ។
គួរបញ្ជាក់ជាថ្មីថា កាលពីខែមុន តុលាការជាន់ខ្ពស់ឥណ្ឌាបានលុបចោលបម្រាមលើស្ត្រីដែលមានអាយុមករដូវចន្លោះពី១០ទៅ៥០ឆ្នាំពីការចូលនិងអធិស្ឋាននៅប្រាសាទលើកំពូលភ្នំនេះ៕ AFP
Source: Kampuchea Thmey Daily
0 Comments