រដ្ឋមន្ត្រីការពារជាតិអាមេរិកលោក Jim Mattis នឹងជួបជាមួយសមភាគីចិនរបស់លោកនៅថ្ងៃព្រហស្បតិ៍បន្ទាប់ពីកិច្ចពិភាក្សាលើកមុនត្រូវបានលុបចោលចំពេលមានភាពតានតឹងខ្ពស់រវាងមហាអំណាចនុយក្លេអ៊ែរទាំងពីរនេះអំពីបញ្ហាពន្ធគយនិងការដាក់ទណ្ឌកម្ម។
កិច្ចប្រជុំរវាងប្រធានមន្ទីរបញ្ចកោណនិងលោកឧត្តមសេនីយ៍ Wei Fenghe នៅខាងក្រៅកិច្ចប្រជុំកំពូលសន្តិសុខក្នុងតំបន់នៅប្រទេសសិង្ហបុរីត្រូវបានគេរំពឹងថានឹងឃើញបុរសទាំងពីរនេះបន្តទំនាក់ទំនងយោធាយូរអង្វែង។
លោក Randall Schriver ជំនួយការរដ្ឋមន្ត្រីការពារជាតិសម្រាប់កិច្ចការអាស៊ីនិងប៉ាស៊ីហ្វិករបស់មន្ទីរបញ្ចកោណបានប្រាប់ក្រុមអ្នកយកព័ត៌មានថា “ការពិតដែលថាលោក Mattis នឹងជួបជាមួយលោករដ្ឋមន្ត្រី Wei គឺជាភស្តុតាងដែលថា ចិនមានចំណាប់អារម្មណ៍ក្នុងការរក្សាភាពធម្មតានិងស្ថិរភាពដូចយើងដែរ”។
ជំនួបរវាងលោក Mattis និងលោក Wei ត្រូវបានគេរំពឹងថានឹងធ្វើឡើងនៅទីក្រុងប៉េកាំងកាលពីចុងសប្តាហ៍មុនប៉ុន្តែវាត្រូវបានលុបចោលវិញបន្ទាប់ពីប្រទេសចិនបានបដិសេធ។
ប្រទេសចិនបានប្រតិកម្មយ៉ាងខឹងសម្បាបន្ទាប់ពីក្រុងវ៉ាស៊ីនតោនបានដាក់ទណ្ឌកម្មក្រោយក្រុងប៉េកាំងទិញយន្តហោះចម្បាំងនិងមីស៊ីលរបស់រុស្ស៊ីនិងការជួបគ្នាយ៉ាងជិតរវាងនាវាចម្បាំងនៅក្នុងសមុទ្រចិនខាងត្បូង។
សកម្មភាពផ្សេងទៀតរបស់ក្រុងប៉េកាំងរួមមាន ការលុបចោលនូវការធ្វើទស្សនកិច្ចកំពង់ផែមួយដែលបានគ្រោងទុករបស់នាវាចម្បាំងអាមេរិកទៅទីក្រុងហុងកុងនិងលុបចោលកិច្ចប្រជុំមួយរវាងប្រមុខកងទ័ពជើងទឹកចិនជាមួយសមភាគីអាមេរិក។
លោក Mattis បានធ្វើដំណើរចំនួនប្រាំបីលើកទៅកាន់តំបន់ឥណ្ឌូ - ប៉ាស៊ីហ្វិកក្នុងនាមជាប្រធានមន្ទីរបញ្ចកោណហើយបេសកកម្មចម្បងមួយគឺដើម្បីជំរុញឲ្យបណ្ដាប្រទេសទាំងឡាយក្រោកឈរឡើងប្រឆាំងនឹងការទាមទារអធិបតេយ្យភាពយ៉ាងធំធេងរបស់ចិននៅក្នុងសមុទ្រចិនខាងត្បូងដ៏សំខាន់៕ AFP
Source: Kampuchea Thmey Daily
0 Comments