វៀតណាម​តែងតាំង​ប្រធាន​គណ​បក្សកុម្មុយនិស្ត​ជា​ប្រធានាធិបតី

គណ​បក្សកុម្មុយនិស្ត​វៀ​ត​ណា​ម ​ដែល​កំពុងកាន់​អំណាច​ បា​នស​ម្រេច​តែងតាំង​អគ្គលេខាធិការ​របស់ខ្លួន​ធ្វើជា​បេក្ខជន​ប្រធានាធិបតី​តែមួយគត់​ ដើម្បី​ជំនួស​លោក Tran Dai Quang។

រដ្ឋាភិបាល​បាន​និយាយ​នៅក្នុង​សេចក្តីថ្លែងការណ៍​មួយ​លើ​គេហទំព័រ​របស់ខ្លួន​កាលពី​ល្ងាច​ថ្ងៃ​ពុធ​ថា សមាជិក​នៃ​គណៈកម្មាធិការ​ម​ជ្ឈឹ​ម​បក្ស​បាន​ឯកភាព​ក្នុងការ​តែងតាំង​សម​មិត្ត Nguyen Phu Trong សម្រាប់​តំណែង​នេះ។

បើសិនជា​មានការ​បញ្ជា​ក់​ពី​រដ្ឋសភា​មែន​នោះ លោក Trong អាយុ​៧៤​ឆ្នាំ​នឹង​ក្លាយជា​មេដឹកនាំ​វៀតណាម​ដំបូង​គេ​ដែល​កាន់តំណែង​ពីរ​ចាប់តាំងពី​លោក​ប្រធានាធិបតី ហូ ជី​មិញ នៅក្នុង​ទសវត្សរ៍​ឆ្នាំ​១៩៦០។

លោក Quang ទទួលមរណភាព​កាលពី​ខែ​មុន​ក្រោយពី​តស៊ូ​ជាមួយ​ជំងឺ​រយៈពេល​ជាង​មួយឆ្នាំ​។​
​សេដ្ឋវិទូ Le Dang Doanh ដែលជា​អតីត​ទីប្រឹក្សា​ផ្នែក​សេដ្ឋកិច្ច​របស់​រដ្ឋាភិបាល​បាន​និយាយថា វា​សម​ហេតុផល​ដើម្បី​បង្រួបបង្រួម​តំណែង​ដ៏​មានអំណាច​របស់​លេខា​បក្ស​ប៉ុន្តែ​លោក​បាន​ព្រមាន​ថា គួរតែមាន​យន្តការ​ដើម្បី​គ្រប់គ្រង​អំណាច​។​
​
លោក​បាន​បន្ថែមថា វា​មិន​ច្បាស់​ទេ​ថា​តើ​មេដឹកនាំ​បន្ទាប់​របស់​ប្រទេស​នេះ​នឹង​កាន់តំណែង​ពីរ​ដែរ​ឬ​អត់​ហើយ​ថា គណបក្ស​នឹង​សម្រេច​លើ​បេក្ខជន​ជាក់លាក់​មួយ​ថា​តើ​ត្រូវ​ផ្តល់​តំណែង​ពីរ​ឬក៏​យ៉ាងណា​។​
​
លោក Trong ត្រូវបាន​បោះឆ្នោត​ជា​មន្ត្រី​ការិយាល័យ​នយោបាយ​ដ៏​មានអំណាច​ក្នុង​ឆ្នាំ​១៩៩៧ ដោយ​បម្រើការ​ជា​ប្រធាន​បក្សកុម្មុយនិស្ត​ក្រុង​ហាណូយ​និង​ធ្វើជា​ប្រធានរដ្ឋសភា​មុនពេល​ត្រូវបាន​ដំឡើង​ឋានៈ​ជា​អគ្គលេខាធិការ​ក្នុង​ឆ្នាំ​២០១១​។ លោក​ត្រូវបាន​ជាប់ឆ្នោត​ជាថ្មី​កាន់តំណែង​អាណត្តិ​៥​ឆ្នាំ​ទៀត​នៅ​ខែមករា​ឆ្នាំ​២០១៦៕ AP

​

Source: Kampuchea Thmey Daily