បាត់ដំបង ៖ យុវជនម្នាក់ បានស្លាប់ភ្លាមៗនៅនឹងកន្លែង ខណៈដែលយុវជនរូបនេះ បានបើកបរម៉ូតូក្នុងល្បឿនយ៉ាងលឿន ហើយបានរេចង្កូតចូលទៅខាងឆ្វេង បណ្តាលអោយបុកនឹងរថយន្តដែលកំពុងបើកបរក្នុងទិសដៅច្រាស់គ្នា និងធ្វើអោយ ស្លាប់ខ្លួនឯងនៅនិងកន្លែងតែម្តង។
ករណីគ្រោះថ្នាក់ចរាចរណ៍នេះ បានកើតឡើងកាលពីថ្ងៃទី៣ ខែតុលា ឆ្នាំ២០១៨ វេលាម៉ោង១១ និង១៥ នាទី យប់ លើកំណាត់ផ្លូវលេខ១៥៩C ស្ថិតក្នុង ក្រុមទី ១៦ ភូមិបវេល១ ឃុំបវេល ស្រុកបវេល ខេត្រតបាត់ដំបង វាងម៉ូតូ ម៉ាកហុងដាឌ្រីមC១២៥ ពណ៌ខ្មៅ ពាក់ស្លាកលេខ1C-8963 ជាមួយ និង រថយន្ត ម៉ាកTAKOMAពណ៌ស ពាក់ស្លាកលេខភ្នំពេញ 2P-0797 ក្នុងទិសដៅច្រាស់គ្នា។
បើតាមការលើកឡើងពីប្រភពមួយចំនួនបាននិយាយថា នៅមុនពេលកើតហេតុ គេសង្កេតឃើញថា ភាគីម៉ូតូដែលបើកបរដោយឈ្មោះ វៃ ឆវ័ន្ត ភេទប្រុស អាយុ១៩ឆ្នាំ រស់នៅភូមិស្ទឹងដាច់ ឃុំបវេល ស្រុកបវេល ខេត្តបាត់ដំបង គឺគេ មានការបើកបរយ៉ាងលឿន ក្នុងទិសដៅពីជើងទៅត្បូង។
ប្រភពដដែលបានបន្តថា លុះ មកដល់កន្លែងកើតហេតុ គេបានរេចង្កូតទៅបុកនឹងរថយន្តតែម្តង ដែលរថយន្តនោះ បើកបរដោយឈ្មោះ ពិវ សៅលិញ ភេទប្រុស អាយុ 29ឆ្នាំ រស់នៅភូមិអន្លង់ថ្ងាន់ ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ បណ្តាលអោយស្លាប់ខ្លួនឯងតែម្តង។
បច្ចុប្បន្ន ក្រោយកើតហេតុកម្លាំងជំនាញ បានចុះត្រួតពិនិត្យវាស់វែង ព្រម ទាំងបានដកហូតសម្ភារៈយកទៅរក្សាទុកនៅអធិការដ្ឋាននគរបាលស្រុកបវេល ចំណែកសព ក៏បានប្រគល់ទៅអោយក្រុមគ្រួសារ សាច់ញាតិយកទៅធ្វើបុណ្យតាមប្រពៃណីហើយ៕
Source: Kampuchea Thmey Daily
0 Comments