ភ្នំពេញ ៖ ដើម្បីចូលរួមអបអរសាទរពិធីបុណ្យភ្ជុំបិណ្ឌ និងការប្រារព្ធពិធីឆ្លងឆ្នាំសកលនាចុងឆ្នាំនេះ ក្រុមហ៊ុន Vietjet កំពុងតែពង្រីកបណ្តាញហោះហើររបស់ខ្លួនដើម្បីផ្តល់ភាពកាន់តែងាយស្រួល និង ផ្តល់ឱកាសកាន់តែច្រើនសម្រាប់ការហោះហើរដោយផ្ទាល់ទៅកាន់គោលដៅជាច្រើន។
ជើងហោះហើរថ្មីមួយរវាងកោះភូកុ (វៀតណាម) និង ទីក្រុងសេអ៊ូល (កូរ៉េខាងត្បូង) នឹងចាប់ផ្តើមពីថ្ងៃទី២២ ខែធ្នូ ឆ្នាំ២០១៨ នេះតទៅ។ ជើងហោះហើរនេះ នឹងភ្ជាប់ទិសដៅទេសចរណ៍ដ៏ល្បីល្បាញទាំងពីរ ដើម្បីឆ្លើយតបទៅនឹងតម្រូវការធ្វើដំណើររបស់ភ្ញៀវទេសចរក៏ដូចជាប្រជាជនក្នុងស្រុកនៃភាគីទាំងពីរ ហើយវាក៏ជាការរួមចំណែកដើម្បីអភិវឌ្ឍន៍ពាណិជ្ជកម្ម និងសមាហរណកម្មនៅក្នុងតំបន់ផងដែរ។
ការហោះហើរដែលមានរយៈពេលប្រាំម៉ោងកន្លះរៀងរាល់ជើង ជារៀងរាល់ថ្ងៃ នឹងធ្វើឲ្យជើងហោះហើរទៅមករវាងកោះភូកុ និង ទីក្រុងសេអ៊ូល មានប្រជាប្រិយភាព។ ជើងហោះហើរពីកោះភូកុ ត្រូវបានគ្រោងនឹងចេញដំណើរជារៀងរាល់ថ្ងៃនៅម៉ោង ១៥និង៣០ ហើយមកដល់ទីក្រុងសេអ៊ូលនៅម៉ោង ២២និង៤៥ ខណៈពេលដែលជើងហោះហើរត្រឡប់មកវិញ នឹងចេញដំណើរពីទីក្រុងសេអ៊ូលនៅម៉ោង ១និង៤៥នាទី ហើយទៅដល់កោះភូកុនៅវេលាម៉ោង ៥និង៣៥នាទីម៉ោងនៅក្នុងស្រុក។
កោះភូកុ គឺជាផ្នែកមួយនៃខេត្ត កៀន ជាំង (Kien Giang) និងជាកោះធំជាងគេនៅក្នុងប្រទេសវៀតណាម។ កោះភូកុ ជាគោលដៅទេសចរណ៍ដ៏ល្បីល្បាញ ត្រូវបានគេដាក់ឈ្មោះនិងស្គាល់ថាជា «កោះគុជ» ដែលបានទាក់ទាញការវិនិយោគសំខាន់ៗលើអចលនទ្រព្យនៅក្នុងគម្រោងទេសចរណ៍ និង រមណីយដ្ឋាន។ ការបើកជើងហោះហើរថ្មីដែលភ្ជាប់កោះភូកុ និងរដ្ឋធានីនៃប្រទេសកូរ៉េខាងត្បូងនេះបានទទួលការកោតសរសើរថានាំមកនូវការផ្លាស់ប្តូរដែលគួរជាទីមោទក នឹងលើកកម្ពស់ការធ្វើដំណើរតាមផ្លូវអាកាសប្រកបដោយសុវត្ថិភាព ភាពស៊ីវីល័យ និងទំនើប មកដល់ប្រជាជនក្នុងស្រុកនៃតំបន់ទាំងពីរ។ទន្ទឹមនឹងនេះដែរក្រុមហ៊ុន Thai Vietjet ដែលជាក្រុមហ៊ុនអាកាសចរណ៍ថ្មីមួយមានការិយាល័យនៅព្រលានយន្តហោះ សុវណ្ណភូមិ នាទីក្រុងបាងកក គ្រោងនឹងរៀបចំជើងហោះហើរផ្ទាល់ពីក្រុងបាងកកទៅកាន់ប្រទេសវៀតណាម និង តៃវ៉ាន់ផងដែរ៕
Source: Kampuchea Thmey Daily
0 Comments