បាត់ដំបង ៖ រថយន្តទំនើបដែលមានតម្លៃប្រមាណជាង ៤ម៉ឺន ដុល្លារ ត្រូវបានបុរសម្នាក់ ដែលជាម្ចាស់ផ្ទះយកកូនកាំបិតចុងស្រួចមកឆូតលើក្បាលរថយន្ត និងពីចំហៀង ដាច់ថ្នាំប្រវែង ជិត ២ ម៉ែត្រ បន្ទាប់ពីម្ចាស់រថយន្តដ៏ទំនើបនេះ ចតនៅលើដីចិញ្ចើមថ្នល់ សាធារណៈ រួចដើរចូលទៅញុំាអាហារជប៉ុន រយៈពេលប្រមាណជា ១ ម៉ោងប៉ុណ្ណោះ។
យោងតាមពាក្យបណ្តឹងរបស់ម្ចាស់រថយន្តម៉ាក ឈែរឺឡែត ពណ៌ស តម្លៃ ជាង៤ម៉ឺន ដុល្លារ ដែលលោកជាមន្ត្រីនគរបាល នៃស្នងការដ្ឋាន នគរបាលខេត្តបាត់ដំបង បានរៀបរាប់ថា នៅវេលាម៉ោង ៨ យប់ ថ្ងៃទី ២៤ ខែតុលា ឆ្នាំ២០១៨ដែលជាយប់បង្ហើយ នៃពិធីបុណ្យអុំទូក ក្នុងខេត្តបាត់ដំបង គឺលោកបានបើករថយន្តនេះទៅឈប់សំចតនៅលើចិញ្ចើមផ្លូវ ១ កន្លែង ដែលស្ថិតនៅក្នុងអាហារដ្ឋាន « គូរេន ស៊ុប » ក្នុងភូមិរតនៈ សង្កាត់រតនៈ ក្រុងបាត់ដំបង ដើម្បីចូលទៅរកញុំាអាហារជប៉ុន។
ពាក្យបណ្តឹងបានបន្តថា លុះប្រហែលជាម៉ោង ៩ លោកក៏បានវិលត្រឡប់ទៅលំនៅដ្ឋានវិញ ប៉ុន្តែនៅព្រឹកឡើង ពេលដែលលោកយករថយន្តទៅលាង ទើបលោកមានការភ្ញាក់ក្រញាង ដោយសារតែនៅលើកាបូ និងនៅពីចំហៀងរថយន្តរបស់លោក មានស្នាមឆូតយ៉ាងជ្រៅរហូតដល់ដែក ព្រមទាំងមានប្រវែងវែងថែមទៀតផង។
ដោយមិនអស់ចិត្ត លោកក៏បានសុំកម្លាំងសមត្ថកិច្ចអោយជួយអន្តរាគមន៍ ក្នុងការចុះពិនិត្យទៅលើកាមេរ៉ារបស់ម្ចាស់ហាង ប៉ុន្តែកាមេរ៉ាសុវត្ថិភាពនោះចាប់មិនដល់ផ្ទុយទៅវិញក៏មានសាក្សីដ៏សំខាន់មួយរូប ដែលជាបុគ្គលិកក្នុងហាងអាហារជប៉ុនចេញមុខមកបំភ្លឺតែម្តង ដោយសារតែលោកបានឃើញផ្ទាល់នឹងភ្នែក។
នៅចំពោះមុខសមត្ថកិច្ច នៃការិយាល័យ ព្រហ្មទណ្ឌកម្រិតស្រាល លោក មុន តាក់អាយុ៣៨ឆ្នាំ រស់នៅភូមិ សាលាបាឡាត់ សង្កាត់អូរម៉ាល់ ក្រុងបាត់ដំបង បច្ចុប្បន្នជាបុគ្គលិកក្នុងអាហារដ្ឋានខាងលើ បានរៀបរាប់ថា នៅយប់នោះ គឺពេលដែលលោកបានចេញពីក្នុងហាងមកខាងក្រៅ ក៏ស្រាប់តែឃើញឈ្មោះ ឆាន កកហេងហៅបារាំង អាយុ ២៨ ឆ្នាំ ដែលមានលំនៅដ្ឋានជាប់គ្នាជាមួយអហារដ្ឋាន បានបើករថយន្តមកឈប់ខាងក្រោយរថយន្តរងគ្រោះ ហើយគេក៏បានស្រែកសួរថាឡានអ្នកណាគេ មកចតខាងមុខផ្ទះខ្ញុំនេះ ? ពេលនោះដោយសារតែលោកមិនបានដឹង ទើបបានឆ្លើយតបថា លោកមិនបានដឹងទេ ប្រហែលឡានរបស់អ្នកចូលទៅមើលបុណ្យអុំទូកទេដឹង !
គ្រាន់តែប៉ុណ្ណឹង គេសង្កេតឃើញបុរសចិត្តពាលនោះ ដើរចុះពីរថយន្តម៉ាកហាយឡិនឌ័រ ពណ៌ស ហើយបានយកដៃអូសពីលើរថយន្តជាច្រើនដង ហើយលោកក៏មិនបានចាប់អារម្មណ៍ថា គេមានគំនិតបែបនេះដែរ លុះមានសមត្ថកិច្ចមកសុំឆែកកាមេរ៉ា សុវត្ថិភាព ទើបលោកមានការចាប់អារម្មណ៍។
ភ្លាមៗនោះដែរ គឺនៅម៉ោងប្រមាណ ១២ ថ្ងៃត្រង់ នាថ្ងៃទី ២៥ ខែតុលា កម្លាំងបានសុំគោលការណ៍ចុះទៅនាំខ្លួនជនសង្ស័យខាងលើមកសាកសួរ ទីបំផុតជនរូបនេះបានសារភាពថា គេពិតជាបានប្រើប្រាស់កូនកាំបិតចិតបន្លែ ឆូតទៅលើរថយន្តដ៏ទំនើបនេះមែន ដោយសារតែខ្លួនមានកំហឹងព្រោះរថយន្តនេះមកឈប់ខាងមុខផ្ទះ។
ស្របពេលដែលដើមបណ្តឹងបានប្តឹងទាមទារសំណង ព្រមទាំងសុំអោយសមត្ថកិច្ចអនុវត្តទៅតាមផ្លូវច្បាប់បន្តទៀតនោះ ស្រាប់តែមានលោក ស្នងការរងមួយរូបដែលគេស្គាល់ថា បច្ចុប្បន្នកំពុងមានឈ្មោះ បោះសំឡេងនៅក្នុងអង្គភាព បានធ្វើការអន្តរាគមន៍ ដោយស្នើសុំអោយកម្លាំងជំនាញ បង្វែរទិសដៅទៅជារឿងក្រៅឃុំទៅវិញ គឺវាផ្ទុយអំពីនីតិវិធី ទាំងស្រុង ប៉ុន្តែទោះបីជាយ៉ាងណាក៏ដោយក៏សមត្ថកិច្ចសម្រេចសុំគោលការទៅលោកព្រះរាជអាជ្ញា ដើម្បីបញ្ជូនខ្លួនជនសង្ស័យទៅតាមផ្លូវច្បាប់ តាមសំណើរបស់ដើមបណ្តឹង៕
Source: Kampuchea Thmey Daily
0 Comments