ភ្នំពេញ ៖ នៅវេលាម៉ោង ៨និង៣០នាទី ព្រឹកថ្ងៃទី២៦ ខែតុលានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រីដើម្បីធ្វើការពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ បន្ទាប់ពីឧត្តមក្រុមប្រឹក្សាពិគ្រោះ និងផ្ដល់យោបល់ដែលមានសមាសភាពមកពីគណបក្សឆ្នោតចំនួន ១៦ បានបើកកិច្ចប្រជុំពិនិត្យពិភាក្សាលើសេចក្តីព្រាងច្បាប់នេះរួចមក។
លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជាបានសរសេរបង្ហោះនៅលើហ្វេសប៊ុករបស់លោកថា នៅថ្ងៃ ទី២៦ ខែតុលា ឆ្នាំ២០១៨ វេលាម៉ោង ៨:៣០នាទីព្រឹក នៅទីស្តីការនាយករដ្ឋមន្ត្រី (វិមានសន្តិភាព)គណៈរដ្ឋមន្ត្រីនឹងបើកកិច្ចប្រជុំពេញអង្គគណៈរដ្ឋមន្ត្រីក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជាដើម្បីពិភាក្សាលើរបៀបវារៈដូចខាងក្រោម៖
ទី១.សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៩។
ទី២. សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៧។
ទី៣.បញ្ហាផ្សេងៗ រួមមាន ៖ សំណើសុំការយល់ព្រមពីគណៈរដ្ឋមន្ត្រីដើម្បីសុំសច្ចាប័នពីស្ថាប័ននីតិប្បញ្ញត្តិលើ៖១-កិច្ចព្រមព្រៀងស្តីពីការចៀសវាងការយកពន្ធត្រួតគ្នានិងការបង្ការការកឹបកេងបន្លំពន្ធពាក់ព័ន្ធនឹងពន្ធលើប្រាក់ចំណូលរវាងកម្ពុជា-វៀតណាមនិងកម្ពុជា-ឥណ្ឌូនេស៊ី។២- សន្ធិសញ្ញារវាងព្រះរាជាណាចក្រកម្ពុជា និងសហព័ន្ធរុស្ស៊ី ស្តីពីបត្យាប័ន។
យោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីចុះថ្ងៃទី ២៤ ខែតុលា ឆ្នាំ២០១៨ បានឲ្យដឹងថាអង្គប្រជុំពេញអង្គគណៈរដ្ឋមន្ត្រីនៅថ្ងៃសុក្រ ទី ២៦ ខែតុលានេះ នៅវិមានសន្តិភាព ធ្វើឡើងក្រោមអធិបតីភាពរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដើម្បីពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩ និងសេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០១៧ ហើយសេចក្តីព្រាងច្បាប់ទាំង ២ នេះក៏ត្រូវបានឧត្តមក្រុមប្រឹក្សាពិគ្រោះនិងផ្ដល់យោបល់បើកកិច្ចប្រជុំពិភាក្សារួចមកហើយកាលពីថ្ងៃទី ២២ខែតុលា ឆ្នាំ ២០១៨ ក្រោមកិច្ចសម្របសម្រួល របស់លោក នួន សុខាវី ប្រធានប្រតិភូគណបក្សពន្លឺថ្មី ប្រធានប្តូរវេនប្រចាំខែតុលា។
សេចក្តីប្រកាសព័ត៌មាននេះបញ្ជាក់ទៀតថា នៅក្នុងកិច្ចប្រជុំរបស់ក្រុមប្រឹក្សាពិគ្រោះ និងផ្ដល់យោបល់នោះ ឯកឧត្តមបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុក៏បានធ្វើបទអន្តរាគមន៍ស្តីពីទិដ្ឋភាពគោលនយោបាយម៉ាក្រូសេដ្ឋកិច្ចនិងគោលនយោបាយហិរញ្ញវត្ថុសាធារ ណៈសម្រាប់ការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៨។ លោក វង្ស៊ី វិស្សុត រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុក៏បានផ្តល់បទអន្តរាគមន៍ស្តីពីបរិការណ៍ក្របខ័ណ្ឌនិងគោលនយោបាយនៃការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩។ លោក ទេព ភយ្យោរិន្ទ្រ អគ្គនាយកនៃអគ្គនាយកដ្ឋានគោលនយោបាយ ក្រសួងសេដ្ឋកិច្ចនិងហិរញ្ញវត្ថុ ក៏បានធ្វើបទបង្ហាញស្តីពីក្របខ័ណ្ឌម៉ាក្រូសេដ្ឋកិច្ចរបស់ប្រទេសកម្ពុជា។ លោក ហាវ រតនៈ ប្រតិភូរាជរដ្ឋាភិបាលទទួលបន្ទុកជាអគ្គនាយក អគ្គនាយកដ្ឋានថវិកានៃក្រសួងសេដ្ឋកិច្ចនិងហិរញ្ញវត្ថុ ធ្វើបទបង្ហាញស្តីពីការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៩៕
Source: Kampuchea Thmey Daily
0 Comments