សេង ស្រឿន អ្នកប្រដាល់កម្ពុជា ក្លិបមហិទ្ធរិទ្ធមេសរថ្ងកខេត្តស្វាយរៀង ត្រូវគេផ្តល់ ឱកាសឲ្យជួបសងសឹកជាមួយអ្នកប្រដាល់ថៃ Chhouk Chhai នាព្រឹកថ្ងៃអាទិត្យទី២៨ តុលា ២០១៨នេះ លើសង្វៀនBoostrong Fighter On Fire នៅប៉ុស្តិ៍អាស៊ីអាគ្នេយ៍។
ពួកគេពីរនាក់នេះ ជួបគ្នាក្នុងប្រភេទទម្ងន់ ៦៣,៥០០ គីឡូក្រាម ។សេង ស្រឿន និង Chhouk Chhai នេះ ធ្លាប់ជួបគ្នាម្តងហើយកាលពីថ្ងៃទី៣០កញ្ញា២០១៧កន្លងមក ដែលពេលនោះ សេង ស្រឿន ត្រូវ Chhouk Chhai វាយអោយសន្លប់ក្នុងទឹកទី២។
សេង ស្រឿន គេជាជើងឯករងខ្សែក្រវាត់គូបូតាទម្ងន់៦៥គ.ក្រ ។អ្នកប្រដាល់រូបនេះ គេល្អទាំងកណ្តាប់ដៃ ជង្គង់ និង កែង ។ សេង ស្រឿនធ្លាប់ជួបប្រកួតជាមួយថៃជិត៣០លើកហើយកន្លងមក ដោយឈ្នះ១៨លើកនិងចាញ់០៨លើក ដែលការប្រកួតចុងក្រោយរបស់គេ គឺវាយចាញ់អ្នកប្រដាល់ថៃចំណូលថ្មីSen Sak ដោយពិន្ទុ កាលពីថ្ងៃទី២៣កញ្ញា២០១៨ ។
Chhouk Chhai គេធ្លាប់មកប្រកួតនៅស្រុកខ្មែរច្រើនលើកហើយកន្លងមក ។ក្នុងការជួបប្រកួតជាមួយអ្នកប្រដាល់កម្ពុជាកន្លងមក គេមិនមែនតែធ្លាប់ឈ្នះឡៅ ចន្ទ្រានោះទេ គឺគេធ្លាប់វាយឈ្នះឃីម ឌីម៉ា ជើងខ្លាំងរបស់កម្ពុជាយើងដោយពិន្ទុទៀត ប៉ុន្តែចុងក្រោយនេះគេវាយចាញ់មឿន សុខហ៊ុចក្លិបពុទ្ធសេរីវង្សកីឡាក្នុងទឹកទី២ ដោយសារសុខហ៊ុចទាត់អោយខូចជើង ។
ទោះជាយ៉ាងណា ការដែលអាចយកឈ្នះលើឃីម ឌីម៉ា និងឡៅ ចន្ទ្រាបានដូច្នេះ គឺបញ្ជាក់ថា Chhouk Chhai គេមិនធម្មតានោះឡើយ ។អ្នកប្រដាល់ថៃរូបនេះ មានប្រវត្តិប្រកួត៨៦លើក ឈ្នះ៦៤លើក ចាញ់១៩លើកនិងស្មើ០៣លើក ខណះដែលសេង ស្រឿន មានកំនត់ត្រាប្រកួត៨០លើក ឈ្នះ៦៥លើក ចាញ់១៥លើក និងមិនដែលស្មើ ។
អ្នកប្រដាល់ក្លិបមហិទ្ធរិទ្ធមេសរថ្ងករូបនេះ តាំងពីដូររបៀបវ៉ៃ ដោយមិនចាំគូបដិបក្ខវាយមុននោះទេ គឺគេចូលវាយមុនតែម្តង ។ ដោយសារការប្តូរយុទ្ធវិធីប្រកួតបែបនេះ ធ្វើអោយគេទទួលជោគជ័យជាបន្តបន្ទាប់ក្នុងការប្រកួតជាមួយអ្នកប្រដាល់ថៃកន្លងមកនោះ ។ តែលើកនេះ សេង ស្រឿនត្រូវជួបជើងខ្លាំងលើសគូប្រកួតលើកមុនទៅទៀត ហេតុនេះមិនជាការងាយស្រួលប៉ុន្មានឡើយ ។ ចាំមើល សេង ស្រឿន អាចសងសឹកយកឈ្នះChhouk Chh ai បានសម្រេចឬអត់ ? ។
អេ រដ្ឋា អ្នកប្រដាល់ក្លិបអេភូថងកីឡា គេនឹងត្រូវជួបប្រកួតជាមួយអ្នកប្រដាល់ថៃ ឈ្មោះ Pek Am ។ ពីរនាក់នេះ ប្រកួតគ្នាក្នុងប្រភេទទម្ងន់ ៥៧ គីឡូក្រាម ។
នេះជាឱកាសដែលអេរដ្ឋា ដែលពីមុនជា ម៉នរដ្ឋានោះ គេត្រូវធ្វើខ្លួនអោយល្បីឈ្មោះដូចពីមុនហើយ។ រដ្ឋាពីមុនខ្លាំង តែមួយរយៈចុងក្រោយនេះ គេវាយមិនសូវខ្លាំងនិងល្អនោះឡើយ ។ ប៉ុន្តែយ៉ាងណា អេ រដ្ឋា ក្រោយមករស់នៅក្លិបអេភូថង គេមានការឈានឡើងបន្តិចវិញហើយ ។ប្រកួតលើកចុងក្រោយជាមួយថៃកាលពីថ្ងៃទី១៥កញ្ញាកន្លងទៅនេះ គេបានផ្តួលថៃChhay Monkhun អោយសន្លប់ក្នុងទឹកទី៣ ។
Pek Am ដែលមកជួបអេ រដ្ឋានេះ ជាអ្នកប្រដាល់ថៃចំណូលថ្មី មិនធ្លាប់មកប្រកួតនៅកម្ពុជានោះទេកន្លងមក។ តាមលោកញាណ សុធី អ្នកគ្រប់គ្រងកម្មវិធីប្រដាល់ប្រចាំSEATV អោយដឹងនោះថា អ្នកប្រដាល់ថៃរូបនេះនៅស្រុកថៃ គេជាជើងខ្លាំងមួយរូប ដែលអេ រដ្ឋា មិនអាចមើលស្រាលគេបានឡើយ ។
អ្នកប្រដាល់ថៃរូបនេះ មានកំនត់ត្រាប្រកួតចំនួន៥៨លើក ក្នុងនោះវាយឈ្នះ៥២លើកទៅហើយ និងចាញ់តែ៦លើកប៉ុណ្ណោះ ។ទោះជាយ៉ាងនេះក្តីក្រុមអ្នកវិភាគប្រដាល់ពួកគេនៅតែមានជំនឿទុកចិត្តថា អេ រដ្ឋា ឈ្នះលើ Pek Am នោះដែរ ព្រោះថាអេ រដ្ឋាឬម៉ន រដ្ឋានេះ គេជាជើងខ្លាំង ។
ធី តុងហ៊ី អ្នកប្រដាល់ក្លិបពន្លឺវិបុលមានរិទ្ធ នឹងត្រូវជួបប្រកួតជាអ្នកប្រដាល់បារាំង Naser ដោយេជួបគ្នាក្នុងប្រភេទទម្ងន់៧១គីឡូក្រាម ។តុងហ៊ី អ្នកប្រដាល់របស់កម្ពុជារូបនេះ ធ្លាប់ជួបអ្នកប្រដាល់បរទេសទើបតែបាន១៥នាក់ប៉ុណ្ណោះ ក្នុងនោះធ្លាប់ប៉ះថៃ១៣នាក់និងឆេក១នាក់ ដោយឈ្នះ ៥ ចាញ់ ៨ និង ស្មើ ១ នាក់ ក្នុងនោះឈ្នះឆេកក្នុងទឹកទី៣ ។
Naser វិញ គេធ្លាប់មកប្រកួតនៅកម្ពុជាតែ៤លើកហើយ ដោយវាយស្មើនិងឈ្នះជាមួយហេង វិឆ័យ ចាញ់នន់ ជំនិតដោយពិន្ទុ និងចុងក្រោយឈ្នះតូច ទូ ក្នុងទឹកទី២ កាលពីថ្ងៃទី០៦តុលា២០១៨ ។
អ្នកប្រដាល់បារាំងរូបនេះ គេចេះប្រដាល់ច្បាស់ល្អណាស់ ហើយគួបផ្សំនឹងមានកម្លាំងស៊ុហ្វរឹងមាំថែមទៀត ធី តុងហ៊ី រឹតតែពិបាកក្នុងការផ្តួលយកឈ្នះគេណាស់ ។ Naser មានប្រវត្តិប្រកួតចំនួន៣២លើក ឈ្នះ២០លើក ចាញ់១២លើក មិនដែលស្មើ ។
ធី តុងហ៊ី ប៉ះជាមួយគេ មិនដឹងថាតុងហ៊ីជួបសំណាងល្អឬអត់ទេ ? ។ ធី តុងហ៊ី ឆ្លងកាត់សង្វៀន១០៥លើក ឈ្នះ៨១លើក ចាញ់២១លើក ស្មើ០៣លើក ។
ទោះជាយ៉ាងណា រវាងធី តុងហ៊ី និង Naser នេះ មិនដឹងថា អ្នកណាជាអ្នកឈ្នះទេ សំរាប់ការជួបគ្នានេះ ? ។ ព្រោះថា អ្នកប្រដាល់បារាំង Naser នេះ មានស្នៀតប្រដាល់ល្អនិងវាយខ្លាំង ដែលធី តុងហ៊ី មិនអាចមើលស្រាលគេបានឡើយ ។ ចាំមើល តើធី តុងហ៊ី និង Naser នរណាជាអ្នកឈ្នះនោះ ? ៕
Source: Kampuchea Thmey Daily
0 Comments