បន្ទាយមានជ័យ ៖ មានករណីគ្រោះថ្នាក់ចរាចរណ៍មួយបានកើតឡើង រវាងបុរសម្នាក់បើកម៉ូតូឡើងជែងម៉ូតូសណ្តោងរ៉ឺម៉កមិនផុត ត្រូវរថយន្តម៉ាកឡិចស៊ីសបុកពេញទំហឹងពេលបញ្ជូនទៅដល់មន្ទីរពេទ្យស្លាប់នៅវេលាម៉ោង៥រសៀល ថ្ងៃទី២៦ ខែតុលា ឆ្នាំ២០១៨នេះ នៅលើដងផ្លូវជាតិលេខ៥ ក្នុងភូមិនិមិត្តថ្មី សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា នៅមុនកើតហេតុនោះជនរងគ្រោះជិះម៉ូតូម៉ាក Zoomer-X ពណ៌ក្រហម ពាក់ស្លាកលេខ បាត់ដំបង ១AA-៨៧០០ ក្នុងទិសដៅពីលិចទៅកើតក្នុងល្បឿនលឿនលុះជិះមកដល់ចំណុចកើតហេតុស្រាប់តែឡើងជែងម៉ូតូសណ្តោងរ៉ឺម៉កបើកស្របទិសគ្នាមិនផុត ត្រូវរថយន្តម៉ាកឡិចស៊ីស RX-៣០០ ពណ៌ទឹកប្រាក់ ពាក់ស្លាកលេខ សៀមរាប ២C-៦០០៣បើកបញ្ច្រាសទិសគ្នាឡើងជែងរថយន្តមួយគ្រឿងទៀត បុកពេញទំហឹងលាន់ដូចរន្ទបណ្តាលឲ្យអ្នកបើកម៉ូតូរបួសធ្ងន់ពេលដែលសមត្ថកិច្ចបញ្ជូនដល់មន្ទីរពេទ្យបង្អែកក្រុងប៉ោយប៉ែតមិនទាន់បានជួយសង្គ្រោះផង ស្លាប់តែម្តង ក្រោយពីកើតហេតុហើយ អ្នកបើករថយន្តគេចខ្លួនបាត់។
លោកបានបញ្ជាក់ឲ្យដឹងទៀតថា ជនរងគ្រោះ មានឈ្មោះ ស៊ីង សឹង អាយុ៦២ឆ្នាំ មានទីលំនៅភូមិត្រាង ឃុំអូរតាគី ស្រុកថ្មគោល ខេត្តបាត់ដំបង។ ចំណែករថយន្តនិងម៉ូតូត្រូវបានសមត្ថកិច្ចជំនាញនាំយក ទៅរក្សាទុក នៅប៉ុស្តិ៍រដ្ឋបាលនគរបាលសង្កាត់និមិត្ត ដើម្បីដោះស្រាយតាមច្បាប់នៅពេលក្រោយ៕
Source: Kampuchea Thmey Daily
0 Comments