សៀមរាប ៖ ពលរដ្ឋបានសម្តែងនូវកង្វល់និងបានសំណូមពរទៅអាជ្ញាធរមូលដ្ឋាននៃក្រុងសៀមរាប ឲ្យជួយដោះស្រាយជូនពួកគាត់ផង ជុំវិញករណី ក្លិនស្អុយរ៉ាំរ៉ៃបានជះចេញពីអាងចិញ្ចឹមក្រពើដែលគេបានស្គាល់ថា មានម្ចាស់ដីឈ្មោះ លោក ណៅ ធួក អតីតប្រធានរដ្ឋបាលជលផល។
ដែលមានទីតាំងនៅក្រោយស្ថានីយតេលា អង្គរ ស្ថិតក្នុងក្រុមទី១៩ភូមិគ្រួស សង្កាត់ស្វាយដង្គំ ក្រុងសៀមរាប មានក្រពើប្រមាណជា ជិត១០០០ក្បាល។
នៅរសៀលថ្ងៃទី២៧ ខែតុលា ឆ្នាំ២០១៨នេះ ស្ត្រីម្នាក់ក្នុងចំណោមពលរដ្ឋជាច្រើននាក់ទៀតដែលមានលំនៅឋានជាប់និងអាងក្រពើនេះបានសម្តែងនូវក្តីកង្វល់ និង សំណូមពរតាមរយៈបណ្តាញសង្គមហ្វេសបុក និងអ្នកកាសែតថា ពួកគាត់ពិតជាមានការពិបាកក្នុងដកដង្ហើមខ្លាំងណាស់រាល់ថ្ងៃនេះ គឺដោយសារតែ ម្ចាស់អាងក្រពើដែលឈ្មោះណៅ ធួក បានចិញ្ចឹមក្រពើជាច្រើនក្បាល ហើយមិនមានអនាម័យ មានក្លិនស្អុយស្ទើរទ្រាំមិនបាន។
ស្ត្រីដដែលបន្តថា កូនៗរបស់គាត់មានសុខភាពមិនសូវល្អទេឈឺជាប់រហូតគឺដោយសារទ្រាំនិងក្លិនស្អុយនេះមិនបាន។ ស្ត្រីរូបនេះបានបន្តថា គាត់សូមសំណូមពរទៅអាជ្ញាធរមូលដ្ឋាននៃក្រុងសៀមរាប ឲ្យជួយដោះស្រាយជូនពួកគាត់ផង ជុំវិញករណី ក្លិនស្អុយរ៉ាំរ៉ៃបានជះចេញពីអាងចិញ្ចឹមក្រពើដែលគេបានស្គាល់ថា មានម្ចាស់ដីឈ្មោះ លោក ណៅ នេះ សូមអាជ្ញាធរជួយប្រាប់ឲ្យម្ចាស់ទីតាំងខាងលើរកទីតាំងណាថ្មីសមរម្យផងចុះ ទីនេះជាទីប្រជុំជនមានមនុស្សរស់នៅច្រើន
ចំណែកបុរសម្នាក់ទៀតបានឲ្យដឹងថា សូមអាជ្ញាធរមូលដ្ឋាន ចុះមកពិនិត្យមើលផង ទោះបីជាម្ចាស់ដីជាអ្នកធំប៉ុណ្ណាក៏ដោយគឺត្រូវគិតពីផលប្រយោជន៍រួមរបស់ពលរដ្ឋផង។ ទាក់ទិនទៅនិងករណីនេះដែរលោក ណៅ ធួក អតីតប្រធានរដ្ឋបាលជលផល និងត្រូវជាម្ចាស់ដីខាងលើបានឲ្យដឹងនៅរសៀលថ្ងៃទី២៧នេះថា ករណីនេះលោកបានដឹងហើយ លោកកំពុងរកទីតាំងថ្មីហើយដីរបស់លោកមាននៅសង្កាត់ទឹកវិលជិត១០ហិចតា តែខាងអាជ្ញាធរអប្សរាមិនឲ្យសាងសង់កុំអីលោកប្តូរទៅយូរហើយ។
លោកបន្តថា ទីតាំងដីនេះលោកមករស់នៅមុនគេ ចឹងហើយអ្នកមកក្រោយត្រូវចេះគិតផងនិងត្រូវបើកផ្លូវ១ម៉ែត្រទៅក្រោយទៀត ទើបត្រឹមត្រូវ។ លោកបញ្ជាក់ថា ប្រាប់ពលរដ្ឋនោះផង កុំភ័យអីលោកកំពុងរកកន្លែងថ្មី ព្រោះទីតាំងនេះលោកមានគំរោងបើកប៉ូទិច នៅពេលខាងមុខ ចឹងទេក្រពើទាំងនេះនឹងត្រូវដូរទៅកន្លែងផ្សេង។
ចំពោះករណីខាងលើនេះដែរ លោក សូ ប្លាតុង អភិបាលក្រុងសៀមរាប មិនអាចសុំការពន្យល់ពីលោកចំពោះករណីនេះបានទេដោយហៅទូរស័ព្ទនៅក្រៅតំបន់សេវា។
ទោះបីជាយ៉ាងនេះក្តី ក្រុមពលរដ្ឋមានសង្ឃឹមយ៉ាងមុតមាំទៅលើអាជ្ញាធរនិងម្ចាស់ដីខាងលើ ដែលអាចយល់យោគនិងគិតពីសុខភាពពលរដ្ឋជាធំ៕
Source: Kampuchea Thmey Daily
0 Comments