ភ្នំពេញ ៖ មុខរបរលក់បាញ់ឆែវនិងនំគ្រក់គឺបើនិយាយពីគ្រួសារបងស្រីម្នាក់រស់នៅច្បារអំពៅគាត់ធានាចិញ្ចឹមក្រុមគ្រួសារមានសមាជិកដល់១០នាក់បានដោយងាយស្រួលមិនភ័យព្រួយឲ្យសមាជិកក្នុងគ្រួសារទៅរកការងារធ្វើឯក្រៅប្រទេស។
បងស្រីសា វិន បាននិយាយថា សព្វថ្ងៃបងចាប់យកមុខរបរចាក់បាញ់ឆែវនិងនំគ្រក់លក់នៅក្នុងភូមិដើមម៉ាក់ក្លឿ សង្កាត់ច្បារអំពៅទី១ខណ្ឌច្បារអំពៅរាជធានីភ្នំពេញ។ មុខរបរនេះបងស្រីចំណាយដើមត្រឹមតែ១០ម៉ឺនរៀល ប៉ុន្តែទទួលបានមកវិញមិនតិចជាង៣០ម៉ឺនរៀលទេក្នុងមួយថ្ងៃ។
បងស្រីបន្ថែមថា មុខរបរនេះគឺបងស្រីជាម្តាយជាអ្នកចាក់នំគ្រក់ដោយឡែកកូនប្រុសច្បងជាអ្នកចាក់បាញ់ឆែវហើយកូនប្រុស២នាក់ទៀត ជាអ្នករត់តុនិងវិចខ្ចប់នំឲ្យម៉ូយ។
បងស្រីសាវិន បន្តថាថ្វីត្បិតតែរបរនេះនៅជាប់និងចង្ក្រានមានកំដៅក្តៅក៏ពិតមែនប៉ុន្តែបងស្រីនិងកូនៗនៅបន្តខិតខំធ្វើដើម្បីបានចំអិននំលក់ឲ្យម៉ូយដោយគ្មានទំនេរដៃហើយម្យ៉ាងទៀតមុខរបរនេះបងស្រីអាចចិញ្ចឹមកូនចៅបានរស់ស្រួលមិនលំបាកចេញទៅរកការងារធ្វើឆ្ងាយពីផ្ទះនិងក្រៅស្រុក។ ចំពោះតម្លៃនំបាញ់ឆែវគឺ១តម្លៃ៣០០០រៀល រួមជាមួយបន្លែគ្រប់មុខបើជាស្ត្រីគឺល្មមមួយចំអែតហើយបុរសអាចដល់ទៅ២។ ហើយនំគ្រប់វិញគឺនំ១តម្លៃ៥០០រៀល។
បងស្រី សាវិន ក៏បានបញ្ជាក់ដែរថា បងស្រីជាកូនអ្នកច្បារអំពៅនេះឯងតែបងស្រីត្រូវបានខកខានរៀនសូត្រតាំងពីនៅក្មេងក៏ព្រោះតែឪពុកម្តាយបងស្រីគ្មានលុយកាក់ឲ្យបងស្រីបានទៅរៀន។ ឥឡូវធ្លាក់មកដល់កូនៗគឺរៀនបានត្រឹមបាក់ឌុបក៏មិនបានបន្តទៅរៀនទៀតដែរ ដោយកូនគាត់សម្រេចចិត្តបោះបង់ការរៀនសូត្រមកជួយលក់នំជាមួយបងស្រីដោយការស្ម័គ្រចិត្តព្រោះកូនគាត់អាណិតម្តាយដែលខិតខំចំអិននំលក់ទាំងថ្ងៃចែសបែបនេះ៕
Source: Kampuchea Thmey Daily
0 Comments