បន្ទាយមានជ័យ ៖ ក្មេង២ក្រុម បានបើកការប្រយុទ្ធគ្នាស៊ីសាច់ហុតឈាមក្មេង១ក្រុមទៀតចាញ់បានរត់ទៅយកកាំភ្លើងមកសងសឹកកំពុងបើកការប្រយុទ្ធបន្តត្រូវបានកម្លាំងអាវុធហត្ថមួយក្រុមដឹកនាំដោយលោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានចុះឃាត់ខ្លួនបានចំនួន៣នាក់វេលាម៉ោង ២ និង ៣០នាទីរសៀល ថ្ងៃទី១៦ ខែតុលា ឆ្នាំ២០១៨ នៅចំណុចបរវេណកាស៊ីណូផ្កាយប្រាំ ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ជនសង្ស័យទាំង៣នាក់នោះ ១មានឈ្មោះ មាស សុភ័ក្ត្រ ហៅ ចិន ភេទ ប្រុស អាយុ ៣០ឆ្នាំ មុខរបរមិនពិតប្រាកដ ស្នាក់នៅបណ្តោះអាសន្នក្នុងភូមិក្បាលកោះ សង្កាត់ប៉ោយប៉ែត ក្រុងប៉ោយប៉ែត ២-ឈ្មោះ ចិន ស័ក្ត ភេទប្រុស អាយុ១៩ឆ្នាំស្នាក់នៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ៣មានឈ្មោះ ញ៉ ឆារ៉ាន់ ភេទប្រុស អាយុ១៨ឆ្នាំ ស្នាក់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
វត្ថុតាងរឹបអូសរួមមាន កាំភ្លើងខ្លីប្រើហ្គាស ១ដើមកាំបិតផ្គាក់ដងឈើ ១ដើម អង្រែបុកគ្រឿង ១ដើមគ្រឿងញៀនមេតំហ្វេតាមីនទឹកកក ចំនួន ២កូនថង់តូច បន្ទាប់ពីធ្វើការឃាត់ខ្លួនហើយជនសង្ស័យខាងលើ លោកបានកសាងសំណុំរឿងបញ្ជូនមកទៅទីបញ្ជាការដ្ឋានកងរាជអាវុធហត្ថខេត្ត ដើម្បីសាកសួរបន្ត។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារយុត្តិធម៌ ដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យលោកបានធ្វើការសាកសួរជនសង្ស័យបានឆ្លើយសារភាពថា នៅមុនពេលកើតហេតុនោះនៅវេលាម៉ោងប្រមាណ ២ ក្រុមខ្លួនមានគ្នាប្រមាណ ៤នាក់ បាននាំគ្នាដើរលេង លុះទៅដល់ចំណុចផ្សាររ៉ា ស្រាប់តែមានក្មេង ១ក្រុមផ្សេងទៀតមកសំឡុត និងដេញវ៉ៃក្រុមខ្លួន ហើយក្រុមខ្លួនមានកំហឹងជាខ្លាំងបាននាំគ្នាទៅផ្ទះនិងយកអាវុធរៀងៗខ្លួនដើម្បីមកសងសឹកលុះមកដល់ចំណុចបរិវេណកាស៊ីណូផ្កាយប្រាំ ក៏បានជួបក្រុមក្មេងដែលដេញវ៉ៃក្រុមខ្លួន ហើយក្រុមខ្លួនក៏បានដកកាំភ្លើងភ្ជង់ និងយកកាំបិតដេញកាប់ក្មេងទាំងនោះ តែមិនបានបង្កឲ្យមានរបួសស្នាមឡើយ ពេលកំពុងដេញកាប់គ្នា ស្រាប់តែមានកម្លាំងកងរាជអាវុធហត្ថមកចាប់ឃាត់ខ្លួនតែម្តង កម្លាំងអាវុធហត្ថធ្វើការឆែកក្នុងខ្លួនបានរកឃើញថ្នាំញៀន២កូនបញ្ចប់តូច គឺក្រុមខ្លួនបានទិញពីជនមិនស្គាល់ឈ្មោះ ដើម្បីយកមកទុកជក់។ ផ្អែកលើចម្លើយសារភាពរបស់ជនសង្ស័យខាងលើ អាចត្រូវចោទពីបទហិង្សាដោយចេតនានិងមានអាវុធសម្រាប់ប្រហារផ្សេងៗ កម្លាំងជំនាញបានកសាងសំណុំរឿងបញ្ជូនជនសង្ស័យ និងវត្ថុតាង ទៅតុលាការ ដើម្បីចាត់ការច្បាប់៕
Source: Kampuchea Thmey Daily
0 Comments