ភ្នំពេញ ៖ ក្រសួងធនធានទឹក និងឧតុនិយម បានប្រកាសអំពាវនាវឲ្យប្រជាពលរដ្ឋ បងប្អូនប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
ក្រសួងធនធានទឹក និងឧតុនិយម បានប្រកាសថា នៅម៉ោង ០១យប់ រំលងអធ្រាត្រ ឈានចូលថ្ងៃទី២០ ខែតុលា ឆ្នាំ២០១៨ មានវិសម្ពាធ TD មួយ បានកើតឡើងនៅក្នុងឈូងសមុទ្រថៃ។ វិសម្ពាធនេះ បាន និងកំពុងធ្វើដំណើរឆ្ពោះទៅកាន់ប្រទេសថៃ។ ស្ថានភាពអាកាសធាតុដូច្នេះ បង្កឲ្យផ្ទៃមេឃមានសភាពអាប់អួ មានភ្លៀងធ្លាក់ខ្លាំង ពិសេសរលកសមុទ្រមានកម្ពស់ខ្ពស់ៗ ពិសេសចាប់ពីថ្ងៃទី២០ ដល់ថ្ងៃទី២១ ខែតុលា ឆ្នាំ២០១៨។
សេចក្តីប្រកាសរបស់ក្រសួងធនធានទឹក និងឧតុនិយម បានប្រកាសថា តំបន់មាត់សមុទ្រ ផ្ទៃមេឃមានសភាពអាប់អួ មានភ្លៀងធ្លាក់ខ្លាំង ខ្យល់បក់មានល្បឿនពី ១៧-១៩ ម៉ែត្រ ក្នុងមួយវិនាទី។ រលកសមុទ្រ មានកម្ពស់ខ្ពស់ៗ ពិសេសនៅថ្ងៃទី២០ និងថ្ងៃទី២១ ខែតុលា។
ចំណែកនៅតំបន់ទំនាបកណ្តាល គឺនៅបណ្តាខេត្ត ដែលឋិតនៅតាមបណ្តោយព្រំដែន កម្ពុជា-វៀតណាម អាចនឹងមានភ្លៀងធ្លាក់ពីបង្គួរ ទៅច្រើន។ តំបន់ខ្ពង់រាប មានភ្លៀងធ្លាក់ពីតិចទៅមធ្យម។ជាមួយគ្នានេះ ក្រសួងធនធានទឹក និងឧតុនិយម បានប្រកាសអំពាវនាវឲ្យប្រជាពលរដ្ឋ បងប្អូនប្រជានេសាទ និងអ្នកធ្វើដំណើរតាមសមុទ្រ បង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
Source: Kampuchea Thmey Daily
0 Comments