បន្ទាយមានជ័យ ៖ ជនសង្ស័យម្នាក់សាក់ពេញខ្លួនញៀនថ្នាំខ្លាំង ព្រមទាំងមានវត្ថុសម្រាប់សម្លាប់ជីវិតមនុស្សជាច្រើនជាប់នឹងខ្លួន ត្រូវបានកម្លាំងអាវុធហត្ថក្រុងប៉ោយប៉ែតឃាត់ខ្លួនបាននៅវេលាម៉ោង២រសៀលថ្ងៃទី២៦ ខែតុលា ឆ្នាំ២០១៨នៅចំណុចម្ដុំផ្សាររ៉ាចាស់ ភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ជនសង្ស័យមានឈ្មោះ ពេញ តួ ភេទប្រុស អាយុ ១៧ឆ្នាំ រស់នៅ ភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
លោកបានបញ្ជាក់ឲ្យដឹងទៀតថា នៅមុនពេលកើតហេតុជននោះមានសាក់ពេញខ្លួនដូចជនអ្នកលេងកាប់ចាក់មានសភាពញៀនថ្នាំខ្លាំងហើយមានវត្ថុតាងជាប់និងខ្លួនដូចជា ពូថៅ ១ដើម កាំបិតប៉័ងតោ ១ដើម ដាវសាំម៉ូរ៉ៃ ១ដើម និងឧបករណ៍ប្រើប្រាស់គ្រឿងញៀន មួយចំនួនធំទៀតផងដោយខ្លាចជននេះយកពូថៅ កាំបិតតាំងតោ សាំម៉ូរ៉ៃ ទៅសម្លាប់អ្នកដទៃទើបអាវុធហត្ថឃាត់ខ្លួនហើយបានបញ្ជូនមកទីបញ្ជាការកងរាជអាវុធហត្ថខេត្តដើម្បីសាកសួរបន្ត។
លោកវរសេនីយ៍ឯក ស ប៊ុនសឿង មេបញ្ជាការរង ទទួលការងារប្រឆាំងបទល្មើសគ្រឿងញៀន បាន បញ្ជាក់ឲ្យដឹងថា ការឈានទៅឃាត់ខ្លួនជនសង្ស័យនោះបានដោយអនុវត្តតាមបទបញ្ជារបស់លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត ឲ្យចុះបង្ក្រាបជននេះព្រោះខ្លាចបង្កដល់អសន្តិសុខដល់ប្រពលរដ្ឋនៅថ្ងៃខាងមុខនិងកសាងសំណុំរឿងបញ្ជូនទៅតុលាដើម្បីធ្វើតាមនីតិវិធីរបស់ច្បាប់៕
Source: Kampuchea Thmey Daily
0 Comments