ភ្នំពេញ ៖ ក្រសួងការងារនិងបណ្តុះបណ្តាលវិជ្ជាជីវៈបានអះអាងថា ចាប់ឆ្នាំ២០១៩តទៅប្រាក់ខែកម្មករនិយោជិតផ្នែកវាយនភណ្ឌ កាត់ដេរនិងផលិតស្បែកជើងជាមធ្យមនឹងទទួលបានចាប់ពី១៩៩ដុល្លារដល់២១០ដុល្លារ ក្នុង១ខែ។
យោងតាមសេចក្តីប្រកាសព័ត៌មានរបស់ក្រសួងការងារនិងបណ្ដុះបណ្ដាលវិជ្ជាជីវៈដែលចេញផ្សាយកាលពីល្ងាចថ្ងៃទី៥ ខែតុលា ឆ្នាំ២០១៨បានឲ្យដឹងថា ការដំឡើងប្រាក់ឈ្នួលអប្បបរមាដល់កម្មករនិយោជិតក្នុងវិស័យវាយនភណ្ឌ កាត់ដេរនិងផលិតស្បែកជើង ចំនួន១៨២ដុល្លារសម្រាប់ឆ្នាំ២០១៩នេះ នឹងចូលរួមចំណែកធ្វើឲ្យស្ថានភាពជីវភាពរស់នៅរបស់បងប្អូនកម្មករនិយោជិតកាន់តែមានភាពល្អប្រសើរជាងមុន ហើយក៏ជាកក្តាសំខាន់ក្នុងការជំរុញផលិតភាពផងដែរ។
ថ្លែងក្រោយបើកកិច្ចប្រជុំគណៈកម្មកាប្រឹក្សាការងារកាលពីល្ងាចថ្ងៃទី៥ ខែតុលា ឆ្នាំ២០១៨នៅទីស្តីការក្រសួង លោកបណ្ឌិត អ៊ិតសំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈនិងជាប្រធានគណៈកម្មកាប្រឹក្សាការងារបានមានប្រសាសន៍ថា ប្រាក់ឈ្នួលថ្មីចំនួន១៨២ដុល្លារបូករួមទាំងសម្តេចតេជោហ៊ុនសែនបន្ថែមចំនួន៥ដុល្លារ នឹងចាប់ផ្តើមអនុវត្តចាប់ថ្ងៃទី០១ខែមករាឆ្នាំ២០១៩ខាងមុខនេះតទៅដោយកើនឡើងចំនួន១២ដុល្លារបើធៀបនឹងប្រាក់ឈ្នួលឆ្នាំ២០១៨ ដែលមានត្រឹមតែ១៧០ដុល្លារប៉ុណ្ណោះក្នុង១ខែ។
លោករដ្ឋមន្ត្រីបានបន្តថា តែបើបូកជាមួយប្រាក់អត្ថប្រយោជន៍ផ្សេងៗទៀតដែលកម្មករនិយោជិតទទួលបានដូចជាប្រាក់សោហ៊ុយធ្វើដំណើរនិងស្នាក់នៅចំនួន៧ដុល្លារក្នុង១ខែប្រាក់រង្វាន់ការងារទៀងទាត់១០ដុល្លារប្រាក់អតីតភាព ដែលមានពី២ដុល្លារដល់១១ដុល្លារក្នុង១ខែសម្រាប់កម្មករនិយោជិតដែលធ្វើការចាប់ពីឆ្នាំទី២ដល់ឆ្នាំទី១១រួមទាំងប្រាក់ថ្លៃធ្វើការបន្ថែមម៉ោងដោយស្ម័គ្រចិត្តចំនួន២០០០រៀលក្នុង១ថ្ងៃឬការទទួលបានបាយមួយពេលដោយឥតគិតថ្លៃធ្វើឲ្យកម្មករទទួលបានប្រាក់ខែជាមធ្យមក្នុងម្នាក់ក្នុង១ខែពី១៩៩ដុល្លារដល់២១០ដុល្លារ។
ទន្ទឹមនឹងប្រាក់ខែកម្មករត្រូវបានដំឡើងនោះលោកបណ្ឌិតអ៊ិត សំហេង ក៏បានធ្វើការអំពាវនាវដល់ម្ចាស់ផ្ទះជួលទាំងឡាយសូមមេត្តាបន្តការគោរពទៅតាមច្បាប់បិតិសន្យាសម្រាប់ការគ្រប់គ្រងថ្លៃឈ្នួលផ្ទះដោយមិនត្រូវដំឡើងថ្លៃផ្ទះជួលនិងទំនិញនិងម្ហូបអាហារផ្សេងៗនោះទេពោលគឺត្រូវរក្សាតម្លៃឲ្យនៅដដែលដើម្បីកុំឲ្យប៉ះពាល់ដល់ប្រាក់ចំណូលរបស់កម្មករនិយោជិតរបស់យើងនិងស្របទៅតាមគោលនយោបាយរបស់រាជរដ្ឋាភិបាលដែ លនាពេលបច្ចុប្បន្នដែលតែងតែគិតគូពីសុខទុក្ខនិងជីវភាពរស់នៅរបស់បងប្អូនកម្មករ។
ចំណែកលោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជាបានថ្លែងអំណរគុណចំពោះប្រមុខរាជរដ្ឋាភិបាលកម្ពុជាសម្តេចតេជោនាយករដ្ឋមន្ត្រីដែលបានជួយសម្រួលបន្ទុកចំណាយអគ្គិសនីរបស់និយោជកចំនួន០,១៤៧ដុល្លារក្នុង១គីឡូវ៉ាត់ម៉ោងសម្រាបវិស័យវាយនភណ្ឌ កាត់ដេរនិងផលិតស្បែកជើងដែលចាប់ផ្តើមអនុវត្តពីឆ្នាំ២០១៩តទៅ។
លោកបានបន្តថា បើទោះបីជាមិនការបញ្ចុះតម្លៃអគ្គិសនីឲ្យបាន១០០ភាគរយដូចអ្វីដែលបានស្នើសុំរបស់និយោជកក៏ពិតមែនតែវាបានជួយសម្រួលដល់សម្ពាធក្នុងការដំឡើងប្រាក់ឈ្នួលថ្មីនេះផងដែរព្រោះថាប្រាក់ឈ្នួលថ្មីចំនួន១៨២ដុល្លារនេះវាជាចំនួនមួយដ៏ច្រើនហើយក៏ជាបន្ទុកមួយដ៏ធ្ងន់សម្រាប់ភាគីនិយោជក។
ប៉ុន្តែលោកកាំងម៉ូនីកាបានស្នើថាទន្ទឹមនឹងប្រាក់ឈ្នួលដំឡើងហើយអ្វីដែលគ្រប់ភាគីពាក់ព័ន្ធត្រូវធ្វើបន្តនោះគឺការផ្តោតទៅលើភាពប្រកួតប្រជែងផលិតភាពរបស់ប្រទេសកម្ពុជា៕
Source: Kampuchea Thmey Daily
0 Comments