ចាប់ខ្លួន​​ចោរ​ម្នាក់ ដែល​ជំនាញ​គាស់​ផ្ទះ​លួច​ទ្រព្យសម្បត្តិ

បាត់ដំបង ​៖​ មុខសញ្ញា​ចោរកម្ម​ម្នាក់ ដែល​មិនទាន់​ជ្រុះ​ពន្លៃ​ពី​ក្បាល ត្រូវបាន​កម្លាំង​សមត្ថកិច្ច នៃ​ការិយាល័យ​ព្រហ្មទណ្ឌ​កម្រិតធ្ងន់ ធ្វើការ​ឃាត់ខ្លួន រួច​ជាមួយ​នឹង​វត្ថុតាង​ដ៏​ច្រើន​សន្ធឹកសន្ធាប់​ផងដែរ បន្ទាប់​ពីមុខ​សញ្ញា​រូប​នេះ​បាន​ធ្វើ​សកម្មភាព​គាស់​ទម្លុះទម្លាយ​ និង​ចូល​លួច​ទ្រព្យសម្បត្តិ​ប្រជាពលរដ្ឋ យក​ទៅ​លាក់​ទុក​មិនបាន​ប៉ុន្មាន​ម៉ោង​ផង។​

គួរ​បញ្ជាក់ដែរថា ហេតុការណ៍​នៃ​អំពើចោរកម្ម​នេះ បាន​កើតឡើង​នៅវេលា ម៉ោង​១ ជាង រំលង​អធ្រា​ត្រ ឈាន​ចូល​ថ្ងៃទី៤ ខែតុលា ឆ្នាំ​២០១៨ នៅ​ចំណុច​ក្រុម​២ ភូមិ​ហៃសាន ឃុំ​ជ្រៃ ស្រុក​ថ្មគោល ខេត្តបាត់ដំបង ដោយសារតែ មាន​ករណី​លួច ដែល បង្កឡើង​ដោយ​ជន​មិន​ស្គាល់​អត្តសញ្ញាណ​បាន​ធ្វើ​សកម្មភាព​គាស់​ទ្វារ​តូប​លក់​ទូរស័ព្ទ​របស់ ជនរងគ្រោះ​ឈ្មោះ សយ ចាន់ណា ភេទ​ប្រុស អាយុ​៤១​ឆ្នាំ រស់នៅ​ភូមិ ឃុំ​ខាងលើ។

បើតាម​ការរៀបរាប់​ពី​ជនរងគ្រោះ​បានអោយដឹងថា នៅពេលនោះ​ខ្លួន​បាន​ដេក​នៅក្នុង​តូប​ជាធម្មតា ដោយ​មិន​បានដឹង​ទាល់តែសោះ​ថា​មាន​ចោរ​ចូល​លួច​ទ្រព្យសម្បត្តិ​បែបនេះ ដោយ​ក្នុង​នោះ​របស់របរ​ដែល​ចោរលួច​យក​ទៅ​រួមមាន​កុំព្យូទ័រ​យួរដៃ​01​គ្រឿង អាយ​ផេ​ត ម៉ាក​សាំ​ស៊ុ​ង​1​គ្រឿង ស្ពី​ក​ឃ័​រ ៣ គ្រឿង ទូរស័ព្ទដៃ​ចំនួន​15​គ្រឿង។

ក្រោយពី​កើតហេតុ សមត្ថកិច្ច​នៃ​ការិយាល័យ ព្រហ្មទណ្ឌ​កម្រិតធ្ងន់ បាន​ចុះ​ត្រួតពិនិត្យ គឺ​សង្កេត​ឃើញថា ជនសង្ស័យ​បាន​ដោះ​វី​ស​ជញ្ជាំង រួច​លូកដៃ​ដក​គន្លឹះទ្វារ​តូប ទើប​គេ​ចូល​ប្រមូល​របស់របរ​គ្មាន​សល់ ខណៈ​ដែល​ម្ចាស់​កំពុង​ដេក​យ៉ាង​លង់លក់​មិនដឹង​ខ្លួន។​

ដោយមាន​ការផ្តល់​យោបល់​ពី​លោក​ស្នងការរង ជេ​ត វណ្ណ​នី ផង​នោះ លោកនាយ​ការិយាល័យ អួន ហ្វៃ បាន​ចាត់​កម្លាំង​ជំនាញ​ចុះ​ស្រាវជ្រាវ​រហូត​ឈានដល់​ការ​ចាប់ខ្លួន​ជនសង្ស័យ​បាន នៅវេលា​ម៉ោង ៣ រសៀល ថ្ងៃ​ដដែល គឺ​ជនសង្ស័យ​រូបនោះ​មានឈ្មោះ ឡុ​ញ ដេវីត ភេទ​ប្រុស អាយុ​១៤​ឆ្នាំ រស់នៅ​ភូមិ​ហៃសាន ឃុំ​ជ្រៃ ស្រុក​ថ្មគោល ដែលជា​ក្ដិ​ប​ចោរ​សុទ្ធសាធ។​

នៅ​ក្នុង​កិច្ចប្រតិបត្តិការ​នេះដែរ កម្លាំង​បាន​ដកហូត វត្ថុតាង មួយចំនួន​ដូចជា​ឡេ​ប​ថប​01​គ្រឿង ទូរស័ព្ទ​19​គ្រឿង អាយ​ផេ​ត​02​គ្រឿង ស្ពិ​ក​ឃឺ​រ​03​គ្រឿង និង នាឡិកា​01​គ្រឿង បច្ចុប្បន្ន ជនសង្ស័យ និង​វត្ថុតាង ត្រូវបាន​កម្លាំង កសាង​សំណុំរឿង​ដើ​ម្បីប​ញ្ជូ​ន​ទៅ​សាលាដំបូង៕

Source: Kampuchea Thmey Daily