កីឡាករ​២០​នាក់​ជាប់​ឈ្មោះ​ក្នុង​បញ្ជី​បឋម​នៃ​ក្រុម​ជម្រើសជាតិ​ហ្វូ​ត​សាល ត្រៀម​ចេញទៅ​ប្រកួត​ជើងឯក​អាស៊ាន​នៅ​ប្រទេស​ឥណ្ឌូណេស៊ី

សហព័ន្ធ​កីឡាបាល់ទាត់​កម្ពុជា (​ស​.​ប​.​ក​) នៅ ដើមខែ​តុលា ឆ្នាំ​២០១៨​នេះ​បានចេញ​បញ្ជី​ឈ្មោះ​កោះហៅ​កីឡាករ​ចំនួន​៥០​នាក់​មកពី​បណ្តា​ក្លិប​មួយចំនួន​ដើម្បី​ចូលរួម​ធ្វើតេស្ត​ចូល​ហ្វឹកហាត់​ក្នុង​ក្រុម​ជម្រើសជាតិ​ហ្វូ​ត​សាល​កម្ពុជា ត្រៀម​ចេញទៅ​ប្រកួត​ក្នុង​ពានរង្វាន់​ជើងឯក​ប្រចាំ​តំបន់​អាស៊ាន 2018 AFF Futsal Championship នៅ​ប្រទេស​ឥណ្ឌូណេស៊ី​។

ជា​លទ្ធផល​ក្រោយ​ធ្វើតេស្ត​មក​ឃើញថា​មាន​កីឡាករ​២០​នាក់​ត្រូវបាន​ជាប់​ឈ្មោះ​ជាបឋម​នៅក្នុង​ក្រុម ក្នុងនោះ​មាន​កីឡាករ ហេង សុខលី​, រស់ រតនៈ​, រស់ ស៊ី​ចំរើន​,​គន្ធ លន់​ដា​រ៉ុ​ត​,​គឹម សុខ​យុទ្ធ​,​កែវ ជា​តូ​, គឹម ហាប់​,​អ៊ុក សេរី​រតនៈ​, នៅ រ៉ូ​ហ្សេ​ត​,​តា​ត់ ផាត់​ឌី​,​សឹង ចាន់​វ៉ាន​ណូ​,​វង្ស ដា​រ៉ា​,​ផុន ចាន់​ឧ​ត្ត​ម​, ញឹក ថា​លីដា​, ហូ អត្រា​,​អ៊ឹង ស្លូត​,​ចន្ថា ចន្ទាកា​, សេដ្ឋា សច្ចៈ​បុត្រ​, កែវ ណា​រ៉េត និង ឡាក់ ភីរុណ​។



​ពានរង្វាន់​ជើងឯក​បាល់ទាត់​អាស៊ាន​ក្នុង​សាល​ឆ្នាំ​២០១៨ ឬ AFF Futsal Championship 2018 នឹងត្រូវ​ប្រកួត​នៅក្នុង​ខែវិច្ឆិកា​ខាងមុខ​នេះហើយ ពោលគឺ​សហព័ន្ធ​កីឡាបាល់ទាត់​អាស៊ាន សម្រេច​ធ្វើឡើង​នៅ​ប្រទេស​ឥណ្ឌូណេស៊ី ខណៈ​កម្ពុជា បានសម្រេច​បញ្ជូន​ក្រុម​ចូលរួម​ប្រកួត​ឡើងវិញ​ដែរ ក្រោយ​ខកខាន​តាំងពី​ឆ្នាំ​២០១២ មកម្ល៉េះ​។ ចំណែក​កីឡាករ​ជម្រើសជាតិ​ហ្វូ​ត​សាល​កម្ពុជា​វិញ នឹងធ្វើ​ការហ្វឹកហាត់​និង​បន្ត​ជម្រុះ​ដើម្បី​សម្រេចយក​អ្នកខ្លាំង​ចូល​ហ្វឹកហាត់​ក្នុង​ក្រុម​ត្រៀម​ចេញទៅ​ប្រកួត​ផងដែរ​។​

តាមរយៈ​កិច្ចប្រជុំ​របស់​សមាជិក​បាល់ទាត់​ក្នុង​តំបន់​អាស៊ាន​នៅ​ទីក្រុង​កូ​ឡា​ឡាំ​ពួរ កាលពីពេល​ថ្មីៗ បានកំណត់​ពី​កាលបរិច្ឆេទ​ប្រកួត​ក្នុង​ពានរង្វាន់​ជើងឯក​អាស៊ាន នេះ​ដោយ​គ្រោង​ចាប់ផ្ដើម​ពីថ្ងៃ​ទី​០៥ ដល់ ១១ វិច្ឆិកា ឆ្នាំ ២០១៨ ក្នុង​ទីក្រុង Jakarta ប្រទេស​ឥណ្ឌូណេស៊ី ដែលមាន​ក្រុម​៨​ចូលរួម​។ ពូ​ល A មាន​៖ កម្ពុជា ម៉ាឡេស៊ី ឥណ្ឌូណេស៊ី និង​មី​យ៉ាន់​ម៉ា​ខណៈ​ពូ​ល B មាន​ថៃ វៀតណាម ប្រ៊ុយណេ និង​ទី​ម័​រ​ខាងកើត​។​

សូម​រំលឹក​ថា ​ពានរង្វាន់​ហ្វូ​ត​សាល​នៅ​កម្ពុជា បាន​ផ្អាក​សកម្មភាព​មួយរយៈ​តាំងពី​ឆ្នាំ​២០១៣ ទាំង​ក្រុម​ជម្រើសជាតិ​និង​ក្លិប​ឯកជន​។ ប៉ុន្តែ​នៅ​ឆ្នាំ​២០១៧ កន្លងទៅ​សហព័ន្ធ​កីឡាបាល់ទាត់​កម្ពុជា បាន​បង្កើត​សកម្មភាព​ឡើងវិញ ព្រមទាំង​មានកម្ម​វិធី​ប្រកួត​ជើងឯក​ក្លិប​ក្នុងស្រុក រហូតដល់​ក្រុម​ឈ្នះ​ជើងឯក​ទទួលបាន​កៅអី​ចេញទៅ​ប្រកួត​ជើងឯក​ប្រចាំ​អាស៊ាន​កាលពីពេល​ថ្មីៗ​ផងដែរ​។ សកម្មភាព​នេះ​ក៏​ជា​ផ្នែក​មួយ​ដើម្បី​ជ្រើសរើស​កីឡាករ​ចូល​ហ្វឹកហាត់​ក្នុង​ក្រុម​ជម្រើសជាតិ​ផងដែរ​។​

ការ​បង្ហាញ​ខ្លួន​នៅលើ​ឆាក​អន្តរជាតិ​ចុងក្រោយ​ក្រុម​ជម្រើសជាតិ​កម្ពុជា នៅ​ឆ្នាំ​២០១២ បាន​ធ្លាក់​ចេញ​ត្រឹម​វគ្គ​ជម្រុះ​តាម​ពូ​ល ក្រោយ​ប្រកួត​ចាញ់​ម៉ាឡេស៊ី ៨​ទល់​០ ចាញ់​មី​យ៉ាន់​ម៉ា ៧​ទល់​៦ ចាញ់​វៀតណាម ៤​ទល់​១ និង​ឈ្នះ​ហ្វីលីពីន​៩​ទល់​៥​។ ក្រុម​ជម្រើសជាតិ​ថៃ ឈ្នះ​ជើងឯក​បាន​ច្រើនជាងគេ​ពោលគឺ​រហូតដល់​១២​លើក​៕

Source: Kampuchea Thmey Daily