ប៉ៃលិន ៖ ក្រោមកិច្ចសហការរវាងក្រសួងអប់រំ យុវជន និងកីឡា អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន និងគណៈកម្មាធិការត្រួតពិនិត្យគ្រឿងញៀនខេត្តប៉ៃលិនបានបើក វគ្គផ្សព្វផ្សាយអប់រំស្តីពីគ្រោះថ្នាក់នៃការប្រើប្រាស់គ្រឿងញៀនខុសច្បាប់ និងចរាចរណ៍ផ្លូវគោកកាលពីថ្ងៃទី២៥ ខែ តុលា ឆ្នាំ២០១៨ ។
វត្តមានអញ្ជើញចូលរួមវគ្គផ្សព្វផ្សាយអប់រំនាឱកាសនោះរួមមាន លោកស្រី បណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា លោក ធូ ភា អភិបាលរងប្រធានលេខាធិការដ្ឋានគណៈកម្មាធិការត្រួតពិនិត្យគ្រឿងញៀនខេត្ត លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា និងតំណាងគណៈកម្មាធិការត្រួតពិនិត្យគ្រឿងញៀនខេត្ត ក្រុង ស្រុក ឃុំ សង្កាត់ និងវិស័យអប់រំ សរុបចំនួន២៥០នាក់។
ក្នុងនាមគណៈកម្មាធិការត្រួតពិនិត្យគ្រឿងញៀន លោក ធូ ភា បានមានប្រសាសន៍ថា ខេត្តប៉ៃលិនមិនមែនជាខេត្តផលិត រក្សាទុក ជួញដូរ ចែកចាយ និងប្រើប្រាស់គ្រឿងញៀនទេ ប៉ុន្តែមានការលាក់លួចប្រើប្រាស់គ្រឿងញៀនដែលសមត្ថកិច្ចពាក់ព័ន្ធខិតខំតស៊ូផ្សព្វផ្សាយអប់រំ បង្ក្រាប និងដោះស្រាយបញ្ហាគ្រឿងញៀន និងបានផ្តាំដល់អ្នកចូលរួមទាំងអស់ត្រូវយកពេលទៅសិក្សាបង្កើនចំណេះដឹងប្រសើរយកពេលទៅប្រព្រឹត្តអំពើអំបាយមុខផ្សេងៗពិសេសគ្រឿងញៀននាំទុក្ខទោសដល់ខ្លួន គ្រួសារនិងសង្គមជាតិទាំងមូល។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទាបានបញ្ជាក់ថា សមត្ថកិច្ចពាក់ព័ន្ធបានខិតខំតស៊ូធ្វើការបង្ការទប់ស្កាត់ការពារប្រជាពលរដ្ឋយើងបញ្ហាគ្រឿងញៀនតាមរយៈការអប់រំផ្សព្វផ្សាយបង្កើនការយល់ដឹងពីផលពិបាកនៃគ្រឿងញៀន បង្ក្រាបជនល្មើសជួញដូរ ចែកចាយគ្រឿងញៀនក្នុងស្រុក និងសហការជាមួយប្រទេសជិតខាងបង្ក្រាបទប់ស្កាត់ការហូរចូលគ្រឿងញៀនឆ្លងកាត់ព្រំដែន។
ក្នុងឱកាសនោះ លោកស្រី បណ្ឌិត សឿ សុជាតា បានមានប្រសាសន៍ថា គ្រឿងញៀនបង្កឲ្យមានវិបត្តិសង្គម គំរាមកំហែងដល់សុវត្ថិភាពសន្តិសុខសង្គម និងបង្កើតឲ្យមានអំពើហិង្សាក្នុងគ្រួសារ និងជាដើមចមនាំឲ្យមានបទល្មើសព្រហ្មទណ្ឌ។ ស្រីបណ្ឌិតថា ដើម្បីឲ្យសហគមន៍យើងមានសុវត្ថិភាពពីបញ្ហាគ្រឿងញៀនចាប់ផ្តើមពីយើងម្នាក់ៗ ដែលមានកាតព្វកិច្ចត្រូវតែចូលរួមទាំងអស់គ្នាដោយមិនត្រូវទុកឲ្យបញ្ហាគ្រឿងញៀនត្រួតត្រាជីវិត និងសហគមន៍យើង ហើយក្មួយៗជាសិស្សត្រូវប្រតិបត្តិខ្លួនជាកូនល្អ សិស្សល្អ ពលរដ្ឋល្អ ជាទំពាំងស្នងឫស្សីដែលត្រូវបន្តវេនរបស់ប្រទេសជាតិត្រូវតែជៀសឲ្យឆ្ងាយពីគ្រឿងញៀន និងឆ្លើយថាទេចំពោះគ្រឿងញៀន៕
Source: Kampuchea Thmey Daily
0 Comments