ក្រុមជំនួយបាននិយាយនៅថ្ងៃព្រហស្បតិ៍ថា កុមារជាច្រើនត្រូវបានបំបែកពីក្រុមគ្រួសាររបស់ពួកគេហើយពួកគេមានភាពតក់ស្លុតនិងប៉ះទង្គិចផ្លូវចិត្តបន្ទាប់ពីការរញ្ជួយដីនិងរលកយក្សស៊ូណាមិនៅប្រទេសឥណ្ឌូនេស៊ីខណៈគ្រឿងផ្គត់ផ្គង់ដែលត្រូវការជាចាំបាច់បានចូលទៅដល់សហគមន៍ដែលរងការវាយប្រហារ.
មនុស្សសរុបចំនួន១,៤១១នាក់ត្រូវបានគេអះអាងថាស្លាប់និងជាង២,៥០០នាក់រងរបួសបន្ទាប់ពីការរញ្ជួយដីដ៏សាហាវបានវាយប្រហារកោះ Sulawesi កាលពីថ្ងៃសុក្រមុន។
គ្រោះមហន្តរាយនេះបានធ្វើឲ្យអគារនៅក្នុងទីក្រុងមាត់សមុទ្រ Palu ក្លាយទៅជាកម្ទេចថ្ម ខ្សែដឹកជញ្ជូនបានប៉ះពាល់យ៉ាងធ្ងន់ធ្ងរ ជំនួយមានភាពយឺតយ៉ាវក្នុងការចូលទៅដល់និងការលួចទំនិញបានរីករាលដាល។
ខណៈដែលអ្នកជួយសង្គ្រោះបានបន្តស្វែងរកតាមគំនរអគារបាក់បែក, ក្តីសង្ឃឹមបានថយចុះដែលថា មនុស្សគ្រប់គ្នានឹងត្រូវបានរកឃើញនៅក្រោមកម្ទេចថ្ម។ អាជ្ញាធរនិយាយថា មនុស្សជាង១០០នាក់នៅតែមិនទាន់ត្រូវបានរាប់បញ្ចូល។
ស្របពេលដែលក្រុមមន្ត្រីកំពុងព្យាយាមដោះស្រាយតម្រូវការមូលដ្ឋានរបស់អ្នករស់រានមានជីវិតហើយក្រុមជំនួយបរទេសបានប្រញាប់ប្រញាល់ឆ្ពោះទៅកាន់តំបន់គ្រោះមហន្តរាយនោះ, ការយកចិត្តទុកដាក់គឺផ្តោតលើចំនួនកុមារយ៉ាងច្រើនដែលកំព្រាឬបាក់បែកគ្រួសារ។
អង្គការ Save the Children បាននិយាយថា ក្មេងៗជាច្រើនកំពុងដេកនៅតាមដងផ្លូវក្នុងចំណោមគំនរបាក់បែកនៅទីក្រុង Palu ហើយអាជ្ញាធរចាំបាច់ត្រូវកំណត់អត្តសញ្ញាណនិងបង្រួបបង្រួមពួកគេជាមួយសាច់ញាតិរបស់ពួកគេជាបន្ទាន់។
លោក Zubedy Koteng អ្នកផ្តល់ប្រឹក្សាផ្នែកការពារកុមាររបស់អង្គការនេះប្រចាំទីក្រុងនេះបាននិយាយថា “វាពិតជាពិបាកក្នុងការស្រមើស្រមៃពីស្ថានការណ៍គួរឲ្យខ្លាចសម្រាប់កុមារ។ ក្មេងៗជាច្រើនមានការភ្ញាក់ផ្អើលនិងបាត់បង់ស្មារតី នៅម្នាក់ឯងហើយភ័យខ្លាច។ កុមារតូចៗដែលកំពុងស្វែងរកសាច់ញាតិដែលនៅរស់នឹងជួបប្រទះនិងរស់នៅដោយឆ្លងកាត់បទពិសោធន៍ដ៏គួរឲ្យរន្ធត់ដែលមិនគួរឲ្យកុមារមើលឃើញ”។
រដ្ឋាភិបាលឥណ្ឌូនេស៊ីពីដំបូងឡើយបានបដិសេធទទួលយកជំនួយអន្តរជាតិដោយទទូចថា កងយោធារបស់ខ្លួនអាចឆ្លើយតបបានប៉ុន្តែនៅពេលដែលទំហំនៃមហន្តរាយនេះបានលេចឡើងកាន់តែច្បាស់នោះ លោកប្រធានាធិបតី Joko Widodo បានយល់ព្រមទាំងស្ទាក់ស្ទើរក្នុងការអនុញ្ញាតឲ្យក្រុមជំនួយនិងរដ្ឋាភិបាលបរទេសចូលមក។
ទោះបីជាយ៉ាងណាក៏ដោយ មន្ត្រីបាននិយាយថា តាមការពិតខ្លួននៅតែពិបាកក្នុងការផ្តល់អ្វីដល់អ្នករស់រានមានជីវិតដែលកំពុងប្រឈមនឹងការស្រេកឃ្លាននិងភាពអត់ឃ្លាន៕ AFP
Source: Kampuchea Thmey Daily
0 Comments