ក្រុម​បឹងកេត​អែ​ហ្វ​ស៊ី នាំយក​ខ្សែការពារ សឿត ណា​វ៉ា ចូលរួម​ក្នុង​ក្រុម បន្ទាប់ពី​យុវជន​រូបនេះ​ផុត​កិច្ចសន្យា​នៅ​សាលា​បាល់ទាត់​ជាតិ​បាទី​

ក្លិប​ជើងឯក​រង​ពានរង្វាន់​លី​គ​កំពូល​កម្ពុជា (Metfone Cambodian League 2018) បឹងកេត​អែ​ហ្វ​ស៊ី បានប្រកាស​នៅ​ថ្ងៃ​ព្រ​ហ​ស្បតិ៍ ទី​៤​ខែតុលា​ឆ្នាំ​២០១៨ សប្ដាហ៍​នេះ​ថា ក្លិប​បាន​ចុះកិច្ចសន្យា​ជាមួយ​ខ្សែការពារ ក្រុម​ជម្រើសជាតិ​យុវជន​កម្ពុជា សឿត ណា​វ៉ា ដែល​ធ្លាប់​បណ្តុះបណ្តាល​នៅ​មជ្ឈមណ្ឌល​និង​សាលា​បាល់ទាត់​ជាតិ​បាទី ក្នុង​ខេត្តតាកែវ​។

ក្លិប​បានផ្តល់​អាវ​លេខ​៥​ដល់​ខ្សែការពារ​វ័យ​១៨​ឆ្នាំ​រូប​នេះ​ ក្នុងពេល​ប្រកួត​ផ្លូវការ​នៅពេល​ខាងមុខ ខណៈ​អាវ​នេះ​ធ្លាប់​ពាក់​ដោយ​កីឡាករ សុខ សុវណ្ណ ដែល​ទើបតែ​ចាកចេញ​ទៅកាន់​ក្លិប​វិសាខា កាលពី​ជើង​ទី​២​រដូវ​កាល​ឆ្នាំ​២០១៨ កន្លងទៅ​។ ក្រោយពី​ផុត​កិច្ចសន្យា​ហើយ​ចាក​ចេញពី​សាលា​បាល់ទាត់​ជាតិ​បាទី រូបគេ​បាន​ផ្លាស់​ទ្រនំ​មកកាន់​ក្រុម​បឹងកេត​អែ​ហ្វ​ស៊ី នេះ​តែម្តង​។ យុវជន​ដែលមាន​ស្រុកកំណើត​នៅ​ខេត្តបន្ទាយមានជ័យ រូបនេះ បាន​ជាប់​ជា​យុវជន​ថ្នាល​របស់​សាលា​បាល់ទាត់​ជាតិ​បាទី​ក្នុង​ឆ្នាំ​២០១៤​។



កីឡាករ សឿត ណា​វ៉ា ធ្លាប់​ជាប់​បង្ហាញខ្លួន​នៅក្នុង​ប្រកួត​លើ​ឆាក​អន្តរជាតិ​ជាច្រើន​ជាមួយ​ក្រុម​ជម្រើសជាតិ​យុវជន​កម្ពុជា ព្រមទាំង​ក្នុង​ពានរង្វាន់​ជើងឯក​អាស៊ី ជើង​តំបន់​អាស៊ាន និង​ពានរង្វាន់​ក្រៅផ្លូវការ​មួយចំនួន​ផងដែរ ជាក់ស្តែង​ដូចជា​ក្នុង​ពានរង្វាន់ AFF U16 Championship, AFC U16 Championship, AFF U17, AFF U18, និង AFF U19 Championship ឆ្នាំ​២០១៨​នៅ​ប្រទេស​ឥណ្ឌូណេស៊ី ក្នុង​ខែកក្កដា​កន្លងទៅនេះ​។​ថ្មីៗ​នេះ​រូបគេ​ទើប​ធ្វើដំណើរ​ត្រឡប់​មកពី​ហ្វឹកហាត់​នៅ​ប្រទេស​ជប៉ុន រយៈពេល​៣​សប្ដាហ៍​។

​កីឡាករ សឿត ណា​វ៉ា គឺជា​សមាជិក​ចំណូល​ថ្មី​ទី​២ បន្ទាប់ពី​មិត្ត​រួម​ក្រុម​អ្នកចាំទី ហ៊ុល គីម​ហ៊ុយ នៅ​សាលា​បាល់ទាត់​ជាតិ​បាទី​ដូចគ្នា ដែល​បាន​សម្រេចចិត្ត​រូ​ម​ជាមួយ​ក្រុម​បឹងកេត​អែ​ហ្វ​ស៊ី នៅ​ចុងឆ្នាំ​២០១៨​នេះ​។ ដំណើរ​មកដល់​របស់​កីឡាករ​ទាំង​២​រូបនេះ​នឹង​ជួយ​បំពេញ​ចន្លោះប្រហោង​នៅលើ​ទីលាន​ដល់​លោក ហៅ សុជាតិ ដែលជា​គ្រូ​បង្វឹក​កំពុង​ជួប​ប្រទះ​នា​ពេល​កន្លង​ទៅ​នេះ​៕

Source: Kampuchea Thmey Daily