សៀមរាប ៖ សមត្ថកិច្ចបានឲ្យដឹងថា បុរសម្នាក់បើកម៉ូតូពេលយប់ជ្រុលទៅបុកជាមួយគោយន្តកន្ត្រៃដែលដឹកបង្គោលសសរក្រាក់ ពីក្រោយបណ្តាលឲ្យស្លាប់ភ្លាមៗនៅនឹងកន្លែង រួចគោយន្តកន្ត្រៃនោះបានទម្លាក់បង្គោលក្រាក់ចោល ហើយបើករត់គេចខ្លួនបាត់។
ហេតុការណ៍គ្រោះថ្នាក់ចរាចរណ៍បានកើតឡើងនៅវេលាម៉ោង២២និង៣០នាទី ថ្ងៃទី៣ ខែតុលា ឆ្នាំ២០១៨ ចំណុចភូមិដំរីកូន ឃុំពពេល ស្រុកសូទ្រនិគម ខេត្តសៀមរាប។ នគរបាលស្រុកសូទ្រនិគម បានឲ្យដឹងថា គ្រោះថ្នាក់ចរាចរណ៍ខាងលើបង្កឡើងដោយម៉ូតូធុនC១២៥ ពណ៌ខ្មៅ ស៊េរី២០១៣ ពាក់ស្លាកលេខសៀមរាប១K.៩២៩២ទៅបុកគោយន្តកន្ត្រៃដឹកសសរក្រាក់ពីក្រោយយ៉ាងពេញទំហឹងតែម្តងបណ្ដាលឲ្យស្លាប់នៅនឹងកន្លែងកើតហេតុ។
ក្រោយកើតហេតុគោយន្តកន្ត្រៃនោះបានទម្លាក់សសរក្រាក់ចោលហើយបើករត់គេចខ្លួនបាត់។ ប្រភពបន្តថា ជនរងគ្រោះដែលស្លាប់គឺមានឈ្មោះ ទុំ តន ភេទប្រុស អាយុ៣២ឆ្នាំ មានទីលំនៅភូមិសក្ដា ឃុំបឹងមាលា ស្រុកស្វាយលើ ខេត្តសៀមរាប។
គួរបញ្ជាក់ថា នៅក្នុងខេត្តសៀមរាប គេតែងសង្កេតឃើញមានរថយន្តចាស់ៗនិងគោយន្តកន្ត្រៃភាគច្រើនតែងតែមិនមានចំណាំងផ្លាត ពីក្រោយ។ ចឹងហើយបានជាតែងតែមានករណីគ្រោះថ្នាក់ចរាចរកើតឡើងបែបនេះ៕
Source: Kampuchea Thmey Daily
0 Comments