ភ្នំពេញ ៖ តារាស្រីពហុជំនាញអ្នកនាង ខាត់ សុឃីម ដោយសារតែសង្កេតឃើញនូវទង្វើអសកម្មរបស់ភ្ញៀវទេសចរខ្មែរមួយចំនួន ដែលបានធ្វើដំណើរទៅលេងនៅតំបន់កម្សាន្តវត្តពុទ្ធគិរីវង្សស្ថិតក្នុងទឹកដីខេត្តតាកែវតាមរយៈការបោះចោលសំរាមគ្មានសណ្ដាប់ធ្នាប់នោះ នាងក៏បានបង្ហាញអារម្មណ៍មិនសប្បាយចិត្តនិងថែមទាំងធ្វើការរិះគន់យ៉ាងចាស់ដៃចំពោះទង្វើបែបនេះ។
ការរិះគន់របស់តារាស្រីចាស់វស្សាអ្នកនាង ខាត់ សុឃីម នាពេលនេះគឺស្របពេលដែលថ្មីៗកន្លងមកនោះ មានអ្នកនិយមលេងបណ្តាញសង្គមហ្វេសប៊ុកមួយចំនួនបាននាំគ្នាធ្វើការបង្ហោះនិងស៊ែរចែករំលែកធ្វើការបញ្ចេញមតិរិះគន់សំដៅលើអ្នកទេសចរខ្មែរ និងអន្តរជាតិមួយចំនួនតូច ដែលបានធ្វើដំណើរទៅកម្សាន្តនៅទីតាំងវត្តពុទ្ធគិរីវង្ស ដែលជាកន្លែងកម្សាន្តនិងទីគោរពបូជាមានព្រះពុទ្ធបដិមារាប់ម៉ឺនអង្គនៅលើភ្នំ។
អ្នកនាង ខាត់ សុឃីម បានលើកឡើងថា ទៅណាមកណាភ្ញៀវបរទេសគេចំណាំខ្មែរត្រង់ថាពេលអង្គុយហើយក្រោកឈរ បោសគូថខោ ហ្នឹងគឺខ្មែរហើយ តែឥឡូវអាចចំណាំមួយទៀតបានគឺទៅដើរនៅទីណាចោលសំរាមតែផ្តេសតែផ្តាសគ្មានរបៀបរៀបរយដូចជាមាននៅក្នុងរូបនេះស្រាប់។
តារាពហុជំនាញដែលរក្សាបានប្រជាប្រិយភាពអ្នកនាង ខាត់ សុឃីម បានលើកឡើងទៀតថាទូរទស្សន៍ក៏ចាក់ផ្សាយរឿងចោលសំរាមនេះដែរ ដូចបានសំណូមពរហើយនៅក្នុងហ្វេសប៊ុក ចុះច្រើនហូរហែអំពីទិដ្ឋភាពមិនគួរកើតមាននេះ តែខ្មែរមួយចំនួន ដែលបានចោលសំរាមនេះ មិនព្រមយកភ្នែកមើលទេ ហើយបើគេនិយាយប្រាប់ស្រួលមិនស្រួលខឹងគេទៀត។ ហ៊ឺ…….។
ជាមួយគ្នានៃការបញ្ចេញមតិរិះគន់របស់អ្នកនាង ខាត់ សុឃីម ខាងលើនេះដែរ ក៏មានមហាជនមួយចំនួនទៀតបានបង្ហាញការគាំទ្រ និងទទូចស្នើឲ្យអ្នកទេសចរ របស់ខ្មែរទាំងនោះត្រូវតែរក្សាឲ្យបាននូវសណ្ដាប់ធ្នាប់តាមរយៈការទុកដាក់សំរាមឲ្យមានរបៀបរៀបរយផងដែរ៕
Source: Kampuchea Thmey Daily
0 Comments