បាត់ដំបង ៖ ជនសង្ស័យម្នាក់ ត្រូវបានកម្លាំងសមត្ថកិច្ចធ្វើការឃាត់ខ្លួនបានភ្លាមៗក្រោយពេលកើតហេតុ ពាក់ព័ន្ធនឹងករណីប៉ុនប៉ងមនុស្សឃាត បន្ទាប់ពីជនសង្ស័យរូបនេះ បានយកកំប៉ុងហ្គាស៍មករុំផ្អោបជាមួយនឹង ផាវគ្រាប់បែក ហើយដុតបោះចូលផ្ទះជនរងគ្រោះ តែជាសំណាងម្ចាស់ផ្ទះឃើញទាន់។
ករណីនេះ បានកើតឡើងនៅវេលាម៉ោង ៤ ល្ងាច ថ្ងៃទី១៤ ខែតុលា ឆ្នាំ២០១៨ នៅចំណុចក្រុមទី០៦ ភូមិស្សលាកែត សង្កាត់ស្លាកែត ក្រុងបាត់ដំបង ខេត្តបាត់ដំបង ដែលជនបង្កមាន ឈ្មោះ ចំរើន ឆេងឡា ហៅ ង៉ុយ ភេទប្រុស អាយុ ២៩ ឆ្នាំ មុខរបរ មិនពិតប្រាកដ មានទីលំនៅត្រង់ចំណុចកើតហេតុខាងលើ។
យោងតាមពាក្យបណ្តឹង របស់ជនរងគ្រោះ ដែលមានឈ្មោះ ម៉ៅ វណ្ណី ភេទស្រី អាយុ ៣៥ ឆ្នាំ មុខរបរ មេផ្ទះ មានទីលំនៅភូមិ សង្កាត់ ជាមួយគ្នា បានរៀបរាប់ថា នៅមុនពេលកើតហេតុ គឺនាងកំពុង អង្គុយលាងចាននៅក្នុងផ្ទះ ក៏ស្រាប់តែមានគេគប់កំប៉ុងហ្គាស៍ដែលមានរុំស្កុតផ្អោបជប់ជាមួយនឹងផាវគ្រាប់បែក ដែលគេបានដុតរួចជស្រេច ចូលមកក្នុងផ្ទះ គឺពេលនោះនាងបានជះទឹកធ្វើអោយផាវនោះរលត់មិនបណ្តាលអោយផ្ទុះឡើយ ឃើញបែបនេះជនសង្ស័យបានរត់ទៅទាញកូនកាំបិតមកប៉ងសម្លាប់ទៀត តែត្រូវអ្នកជិតខាងជួយទាន់ ដោយគេ គឺជាមនុស្សដែលមានផ្ទះជាប់គ្នា ដោយកន្លងមកគេធ្លាប់មានទំនាស់ជាមួយគ្នាផង ទើបនាងប្តឹងសមត្ថកិច្ចអោយឃាត់ខ្លួនតែម្តង។
បច្ចុប្បន្នជនសង្ស័យរូបនេះ រួមជាមួយនឹងវត្ថុតាង ត្រូវបានកម្លាំងសមត្ថកិច្ចរៀបចំឯកសារដើម្បីបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តហើយ ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments