ពលរដ្ឋប្រទះឃើញថ្នាំញៀនរាប់លានគ្រាប់ នៅក្នុងខេត្តឈៀងរ៉ាយ
ប្រទេសថៃ ៖ ថ្នាំញៀនប្រភេទយ៉ាម៉ា ចំនួន ១០ លានគ្រាប់ ត្រូវបានកំលាំងសមត្ថកិច្ចជំនាញធ្វើការរឹបអូសយកទៅរក្សាទុក ដើម្បីស្រាវជ្រាវរកសាវតារម្ចាស់ ខណៈដែលប្រជាពលរដ្ឋដែលចេញទៅរកត្រីក្នុងព្រៃ បានប្រទះឃើញគេលាក់ទុក ចម្ងាយពីស្ថានីយតម្រួតប្រមាណ ១០០ ម៉ែត្រ។
យោងតាមរបាយការណ៍ដែលកម្ពុជាថ្មីទទួលបានគឺ នៅថ្ងៃទី១៤ ខែតុលា ឆ្នាំ២០១៨ វេលាម៉ោង ២ រសៀល មានប្រជាពលរដ្ឋរស់នៅប្របមាត់ស្ទឹងម៉ែឡាវ បានចេញទៅរកត្រី ដល់ចំណុចក្នុងព្រៃមួយកន្លែង ស្ថិតក្នុងភូមិ ៣ឃុំដុងម៉ាក់ដាក់ ស្រុកម៉ែឡាវ ខេត្តឈៀងរ៉ាយ ប្រទេសថៃ ចម្ងាយពីស្ថានីយតម្រួតប្រហែល ១០០ ម៉ែត្រ និងចេញពីផ្លូវជាតិ ប្រហែល ៨០ ម៉ែត្រ ក៏បានប្រទះឃើញមានការុងជីជាច្រើនការ៉ុង ដែលជនមិនស្គាល់មុខបានលាក់ទុកនៅក្នុងព្រៃ។
បន្ទាប់ពីបានរាយការណ៍ទៅសមត្ថកិច្ចរួចមក កំលាំងក៏បានចុះទៅពិនិត្យ ដោយសង្កេតឃើញថា ការុងជីទាំងអស់មានចំនួន ៥០ ការុង ក្នុងនោះដែរគឺក្នុង ១ ការុងមានថ្នាំញៀនប្រភេទយ៉ាម៉ាចំនួន ២០០ ០០០ គ្រាប់ ( ២ សែន គ្រាប់ ) សរុបទាំងអស់មានចំនួន ១០ ០០០ ០០០ គ្រាប់ ( ១០លានគ្រាប់ ) ។
ពាក់ព័ន្ធនឹងថ្នាំញៀនទាំងនេះ សមត្ថកិច្ចបានសន្និដ្ឋានថា ជនសង្ស័យអាចដឹកនឹងរថយន្តធុនធ្ងន់ ព្រោះនៅកន្លែងកើតហេតុមានស្នាមកង់រថយន្ត ហើយការលាក់ទុកនេះទំនងជាជនសង្ស័យមិនទាន់ហ៊ានទៅមុខដោយសារតែ នៅ ១០០ ម៉ែត្រខាងមុខគឺជាស្ថានីយតម្រួត ដូច្នេះគេត្រូវបង្ខំចិត្តលាក់ទុកសិន តែក៏ត្រូវបែកការណ៍អស់ដោយសារតែពលរដ្ឋ ចេញទៅប្រកបមុខរបរនេសាទ ដែលបានដើរឆ្លងកាត់។
បច្ចុប្បន្នថ្នាំញៀនទំាងនេះ ត្រូវបានកំលាំងជំនាញយកទៅរក្សាទុកនៅអង្គភាពជាបណ្តោះអាសន្ន ដើម្បីធ្វើការស្រាវជ្រាវរកមុខសញ្ញា ដែលជាដើមចមក្នុងការលាក់គ្រឿងញៀនទាំងនេះ យកទៅផ្តន្ទាទោសតាមផ្លូវច្បាប់៕
Source: Kampuchea Thmey Daily
0 Comments