ភ្នំពេញ ៖ ជនជាតិចិនប្រុសស្រី ចំនួន៩១នាក់ ក្នុងនោះមានស្រីចំនួន២១នាក់ ត្រូវបានអាជ្ញាធរកម្ពុជាសហការជាមួយ អគ្គនាយកដ្ឋានអន្តោប្រវេសន៍នៃ ក្រសួងមហាផ្ទៃ រួមជាមួយកម្លាំងសមត្ថកិច្ចមកពីប្រទេសចិនស្រាវជ្រាវ ចាប់បញ្ជូនឲ្យវិលត្រឡប់ទៅប្រទេសដើមវិញ នាព្រឹកថ្ងៃទី១៥ ខែតុលា ឆ្នាំ២០១៨នេះ បន្ទាប់ពីជនជាតិចិនទាំងនោះចូលមកស្នាក់នៅក្នុងប្រទេសកម្ពុជាដោយខុសច្បាប់និងមួយចំនួនទៀតប្រព្រឹត្តបទល្មើស រកសុីខុសច្បាប់ ហើយត្រូវបានសមត្ថកិច្ចបង្ក្រាបចាប់បានជាបន្ដបន្ទាប់។
ពិធីនេះបានប្រព្រឹត្តទៅនៅព្រឹកថ្ងៃទី១៥ ខែតុលា ឆ្នាំ២០១៨ ក្រោមការចាត់ចែងដោយកម្លាំងនគរបាល នៃអគ្គនាយកដ្ឋានអន្តោប្រវេសន៍ដែលធ្វើឡើងនៅអគ្គនាយកដ្ឋានអន្តោប្រវេសន៍ បន្ទាប់ពីជនជាតិចិនទាំងនោះ ប្រព្រឹត្តល្មើស មករកស៊ីនៅកម្ពុជាខុសច្បាប់ ជំរឹតទារប្រាក់ ហើយត្រូវបានសមត្ថកិច្ចចាប់ឃាត់ខ្លួន កាលពីពេលថ្មីៗនេះ។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានថ្លែងប្រាប់ក្រុមអ្នកយកព័ត៌មាននៅអាកាសយានដ្ឋានអន្តរជាតិភ្នំពេញថា ជនជាតិចិនទាំង៩១នាក់ ស្រី២១នាក់ ដែលត្រូវបណ្តេញចេញនៅថ្ងៃនេះ គឺពួកគេជាប់ពាក់ព័ន្ធករណី គំរាមកំហែង ជំរឹតទារប្រាក់ ប្រព្រឹត្តបទល្មើសផ្ទុយពីច្បាប់នៅព្រះរាជាណាចក្រកម្ពុជាហើយត្រូវបានសមត្ថកិច្ចជំនាញបង្ក្រាបចាប់ខ្លួនកន្លងមកនៅក្នុងខេត្តកំពត។
លោកបន្ដថា យើងបានសហការគ្នាជាមួយសមត្ថកិច្ចចិនក្នុងការ បញ្ជូនជនល្មើសឲ្យត្រឡប់ទៅស្រុកកំណើតវិញ ស្របតាមច្បាប់អន្តរជាតិ និងកិច្ចព្រមព្រៀង ជាមួយប្រទេសទាំងពីរ តាមជើងយន្តហោះ របស់ប្រទេសចិន នាព្រឹកថ្ងៃទី១៥ ខែតុលា ឆ្នាំ២០១៨នេះ សរុបចំនួន៩១នាក់ ស្រី២១នាក់។ សព្វថ្ងៃនេះគេសង្កេតឃើញជនជាតិចិនហាក់បង្កបញ្ហាមិនចេះចប់មិនចេះហើយ បទល្មើសដែលពួកគេប្រព្រឹត្តគឺគ្រប់រឿងទាំងអស់បូករួមទាំងបទល្មើសចរាចរផងដែរ៕
Source: Kampuchea Thmey Daily
0 Comments