ភ្នំពេញ ៖ មន្ត្រីជាន់ខ្ពស់គណបក្សប្រជាជនកម្ពុជា លោក សុខ ឥសាន បានអះអាងថា គណបក្សប្រជាជនកម្ពុជា អនុវត្តព្រះរាជបណ្តាំ និងព្រះរាជតម្រិះរបស់ព្រះបរមរតនកោដ្ឋ ដែលបន្សល់ឲ្យកូនចៅអនុវត្ត ដូច្នេះហើយគណបក្សប្រាជនកម្ពុជាប្តេជ្ញាការពាររដ្ឋធម្មនុញ្ញ និងរបបរាជានិយមអាស្រ័យរដ្ឋធម្មនុញ្ញ ឲ្យបានជាដាច់ខាត។
លោក សុខ ឥសាន ថ្លែងកាលពីរសៀលថ្ងៃទី១៥ ខែតុលា ថា គណបក្សប្រជាជនកម្ពុជាប្រកាន់ខ្ជាប់គោលជំហរ ធ្វើជាសុខុដមនីយកម្មសង្គមកម្ពុជា ដែលជាផ្អែកមួយនៃនយោបាយបង្រួបបង្រួមជាតិ ការផ្សះផ្សាជាតិ និងវប្បធម៌សន្ទនា ប៉ុន្តែការបង្រួបបង្រួមជាតិ ការផ្សះផ្សាជាតិ និងវប្បធម៌សន្ទនា ត្រូវតែផ្អែកលើគោលការណ៍ច្បាស់លាស់នោះ គឺតាមគោលការណ៍លទ្ធិប្រជាធិបតេយ្យ និងនីតិរដ្ឋ។ នេះហើយ គឺជាព្រះរាជបណ្តាំរបស់ព្រះបរមរតនកោដ្ឋ ដែលបន្សល់ឲ្យកូនចៅគណបក្សប្រជាជនកម្ពុជាអនុវត្តតរៀងទៅ។
តាមលោក សុខ ឥសាន “ហេតុដូច្នេះហើយបានជាគណបក្សប្រជាជនកម្ពុជា ប្តេជ្ញាការពាររដ្ឋធម្មនុញ្ញ និងរបបរាជានិយមអាស្រ័យរដ្ឋធម្មនុញ្ញឲ្យបានជាដាច់ខាត និងប្តេជ្ញាដើរតាមគន្លងលទ្ធិប្រជាធិបតេយ្យ និងនីតិរដ្ឋ ទោះបីក្រុមណា ជនណានិយាយអ្វីក្រៅពីនេះក៏ដោយ ដែលនេះ គឺជាសិទ្ធិនិយាយរបស់ពួកគេនិយាយ”។
សូមបញ្ជាក់ថា នៅថ្ងៃទី១៥ ខែតុលា ឆ្នាំ២០១៨ នេះ គឺជាខួប៦ឆ្នាំ នៃការសោយទិវង្គត របស់ ព្រះករុណា ព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ។ ព្រះអង្គបានយាងសោយទិវង្គត នៅវេលាម៉ោង១ និង២០នាទី រំលងអធ្រាត្រឈានចូលថ្ងៃទី១៥ ខែតុលា ឆ្នាំ២០១២ ក្នុងព្រះជន្មាយុ៩០ព្រះវស្សា ដោយព្រះជរាពាធ នៅមន្ទីរពេទ្យនាទីក្រុងប៉េកាំង ប្រទេសចិន។ ក្រោយការការសោយទិវង្គត ប្រជារាស្ត្រខ្មែរ បានសោកស្តាយយ៉ាងក្រៃលែង និងបានចងចាំជានិច្ច ចំពោះការលះបង់ និងបូជាព្រះកាយពលដ៏ធំធេងបំផុតចំពោះជាតិ មាតុភូមិកម្ពុជា ដូចជាដណ្តើមឯករាជ្យជាតិពីអាណានិគមបារាំង ការកសាងកម្ពុជា ជាកោះសន្តិភាពជាដើម។
ក្នុងឱកាសគម្រប់ខួប៦ឆ្នាំ នៃការសោយទិវង្គត របស់ព្រះករុណា ព្រះបាទសម្តេច ព្រះនរោត្តមសីហនុ ព្រះបរមរតនកោដ្ឋ នាព្រឹកថ្ងៃទី១៥ ខែតុលា ឆ្នាំ២០១៨ តំណាងស្ថាប័នរាជរដ្ឋាភិបាល ក្រសួង ស្ថាប័ន រដ្ឋសភា ព្រឹទ្ធសភា ថ្នាក់ដឹកនាំស្ថាប័នកំពូលៗរបស់ជាតិ មន្ទីរ ខេត្ត ក្រុង មន្ត្រីរាជការ ប្រជាពលរដ្ឋ គ្រប់ស្រទាប់វណ្ណៈ បាននាំគ្នាយកកម្រងផ្កា ថ្វាយគោរពសក្ការៈ ចំពោះព្រះបរមរូប ហើយក្នុងឱកាសនេះដែរ អាជ្ញាធរខេត្តក្រុងនានាទូទាំងប្រទេស ក៏រៀបចំឲ្យមានទីគោរពព្រះវិញ្ញាណក្ខន្ធនេះផងដែរ នៅតាមមូលដ្ឋានរបស់ខ្លួន។
ក្រោយការយាងចូលទិវង្គតរបស់សម្តេចឪ សម្តេចតា សម្តេចតាទួត ព្រះបិតាឯករាជ្យជាតិ កាលពីថ្ងៃទី១៥ ខែតុលា ឆ្នាំ២០១២ នេះ រាជរដ្ឋាភិបាលបានកំណត់យកថ្ងៃទី១៥ តុលា រៀងរាល់ឆ្នាំ ជាថ្ងៃគោរពព្រះវិញ្ញាណក្ខន្ធ៕
Source: Kampuchea Thmey Daily
0 Comments