ភ្នំពេញ ៖ យោងតាមរបាយការណ៍ដែលកាសែតកម្ពុជាថ្មីទទួលបានពីក្រសួងសាធារណការ និង ដឹកជញ្ជូន កាលពីថ្ងៃទី២៣ ខែតុលា ឆ្នាំ២០១៨ អោយដឹងថា ភ្លើងបំភ្លឺផ្លូវជាតិលេខ១ ចាប់ពីផ្លូវក្រវាត់ក្រុងទី២ ដល់ព្រំប្រទល់ខេត្តកណ្តាល ចំនួន១០៦បង្គោល លើចំនួនសរុប ២២៨បង្គោល ត្រូវបានដាក់អោយបំភ្លឺ ដើម្បីសម្រួលដល់ប្រជាពលរដ្ឋដែលធ្វើដំណើរតាមបណ្តោយផ្លូវជាតិលេខ១ នាពេលយប់។
សូមបញ្ជាក់អោយដឹងថា ភ្លើងបំភ្លឺផ្លូវនៅតាមបណ្តោយផ្លូវជាតិលេខ១ ក្នុងភូមិសាស្ត្រខណ្ឌច្បារអំពៅចែកចេញជា២ផ្នែក។ ផ្នែកទី១ ចាប់ពីគល់ស្ពានព្រះមុនីវង្សត្រើយខាងកើតទៅដល់សង្កាត់វាលស្បូវ។ ភ្លើងបំភ្លឺផ្លូវ ត្រូវបានក្រុមការងារបច្ចេកទេសដាក់នៅតាមបណ្តោយសួនច្បារពុះចែកគន្លងផ្លូវ និងដាក់នៅតាមចិញ្ចើមផ្លូវទាំងសងខាង ក្នុងនោះមានភ្លើងស្តុប ចំនួន ៦កន្លែងដូចខាងក្រោមៈ ១-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវលេខ ៣៦៣ ផ្សារច្បារអំពៅ
២-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវលេខ ៦២៨ ចូលទៅវត្តច្បារអំពៅ
៣-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវលេខ ៣៥១ វត្តនិរោធ
៤-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវចូលទៅទូរទស្សន៍បាយ័ន
៥-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវចូលបុរី ប៉េង ហួត បឹងស្នោរ
៦-ភ្លើងស្តុប ប្រសព្វរវាងផ្លូវជាតិលេខ ១ និងផ្លូវចូលមន្ទីរពេទ្យចារីយ៍ ។
ផ្នែកទី២ បង្គោលភ្លើងបំភ្លឺផ្លូវចាប់ពីសង្កាត់វាលស្បូវទៅដល់ព្រំប្រទល់ស្រុកកៀនស្វាយ ត្រូវបានក្រុមការងារដាក់នៅតាមបណ្តោយផ្លូវទាំងសងខាងមាន ចំនួន ២២៨ដើម ត្រូវបានដាក់អោយដំណើរបំភ្លឺផ្លូវ ដើម្បីសម្រួលដល់ការធ្វើចរាចររបស់ប្រជាពលរដ្ឋនៅពេលយប់ ក៏ដូចជា ជួយកាត់បន្ថយមិនអោយកើតមានបទល្មើសនៅពេលយប់ផងដែរ៕
Source: Kampuchea Thmey Daily
0 Comments