អ្នក​ ដែល​ផ្ញើ​កញ្ចប់​សង្ស័យ​ទៅ​មន្ទីរ​បញ្ច​កោណ​ ត្រូវបាន​ចាប់ខ្លួន

ប៉ូលិស​អាមេរិក​កាលពី​ថ្ងៃ​ពុធ​បាន​ចាប់ខ្លួន​ជនសង្ស័យ​ម្នាក់​ បន្ទាប់ពី​កញ្ចប់​ដ៏​គួរ​ឲ្យ​សង្ស័យ​ដែល​មាន​ផ្ទុក​គ្រាប់​ល្ហុងខ្វង ​ត្រូវ​បាន​បញ្ជូន​ទៅកាន់​មន្ទីរ​បញ្ច​កោណ​នៅ​សប្តាហ៍​នេះ។

លោក William Clyde Allen មកពី​ទីក្រុង Logan នៃ​រដ្ឋ Utah ត្រូវ​បាន​ឃុំឃាំង​ហើយ​ទំនងជា​ប្រឈមមុខ​នឹង​ការចោទប្រកាន់​នៅ​ថ្ងៃ​សុក្រ​។ នេះ​បើតាម​សេចក្តីរាយការណ៍​របស់​ទូរទស្សន៍ KSL នៅលើ​គេហទំព័រ​របស់ខ្លួន​ដោយ​លើកឡើង​ប្រភពពី​ក្រសួងយុត្តិធម៌។

ទីតាំង​ពិនិត្យ​សំបុត្រ​របស់​មន្ទីរ​បញ្ច​កោណ​កាលពី​ថ្ងៃ​ចន្ទ​បាន​ស្ទាក់​ចាប់បាន​កញ្ចប់​យ៉ាងហោចណាស់​ពីរ​ដែល​ផ្ញើ​ទៅ​ឲ្យ​រដ្ឋមន្ត្រី​ក្រសួងការពារជាតិ​លោក Jim Mattis និង​ឧត្ដមសេនីយ៍ត្រី​លោក John Richardson ដែល​អាជ្ញាធរ​សង្ស័យថា មាន​ផ្ទុក​សារធាតុ Ricin ។​

អ្នកនាំពាក្យ​មន្ទីរ​បញ្ច​កោណ​លោកស្រី Dana White បាន​និយាយថា “​យោងតាម​ការវិភាគ​បឋម​របស់​យើង សារធាតុ​នេះ​គឺជា​គ្រាប់​ល្ហុងខ្វង​ដែល​អាច​ចម្រាញ់​ទៅជា​សា​ធារ​ធាតុ Ricin”​។ លោកស្រី​បាន​កត់សម្គាល់ថា បញ្ហា​នេះ​កំពុង​ត្រូវបាន​ស៊ើបអង្កេត​ដោយ FBI ។​

សំបុត្រ​ទាំងអស់​នៅ​មន្ទីរ​បញ្ច​កោណ​ត្រូវបាន​គេ​កំណត់​ឲ្យ​នៅ​ដាច់ដោយឡែក​ពីគ្នា​នៅពេលដែល​កញ្ចប់​ត្រូវបាន​រកឃើញ​។ ទោះបីជា​យ៉ាងណាក៏ដោយ​គ្មាន​នរណាម្នាក់​រង​ផលប៉ះពាល់​ទេ​។​
​សេវា​សម្ងាត់​អាមេរិក​ក៏បាន​រាយការណ៍​ផងដែរ​ថា ខ្លួន​ទទួលបាន​ស្រោមសំបុត្រ​ដ៏​គួរ​ឲ្យ​សង្ស័យ​មួយ​ដែល​បាន​ផ្ញើរ​ទៅកាន់​លោក​ប្រធានាធិបតី Donald Trump កាលពី​ថ្ងៃ​ចន្ទ​។​

សេវា​សម្ងាត់​បាន​និយាយថា “​ស្រោមសំបុត្រ​មិនត្រូវ​បានទទួល​នៅឯ​សេត​វិមាន​ហើយក៏​មិនបាន​ចូល​សេត​វិមាន​ដែរ​”​។​

គួរបញ្ជាក់​ជាថ្មី ដោយ​ផលិត​ពី​ការកែច្នៃ​គ្រាប់​ល្ហុងខ្វង​, Ricin អាច​សម្លាប់​មនុស្ស​ក្នុង​រយៈពេល​ត្រឹមតែ​ប៉ុន្មាន​នាទី​ប៉ុណ្ណោះ​បើសិនជា​លេប ស្រូប​ឬ​ចាក់​ចូល​។ វា​ខ្លាំង​ជាង​សារធាតុ cyanide រហូតដល់​ទៅ​៦,០០០​ដង​ហើយ​គេ​មិន​ស្គាល់​ថ្នាំបន្សាប​ទេ​៕ AFP

​

Source: Kampuchea Thmey Daily